Выбрать язык
Книги Ветхого Завета
Книги Нового Завета
с русским текстом1 Филистим-влак Израиль дене кредалыныт. Израильтян-влак филистим-шамыч деч куржаш тӱҥалыныт, шукышт Гелвуй курыкеш вуйыштым пыштеныт.2 Филистим-влак Саулым да тудын эргыже-шамычым поктен шуыныт да Ионафаным, Авинадавым, Малхисуам – Саул эрге-влакым – пуштыныт.3 Саул дене кредалмаш талышнен. Пикшызе-влак ӱмбакыже лӱйкаленыт да тудым чот сусыртеныт.4 Саул шке саргурал нумалшыжлан каласен: «Кердетым лодак гыч лук да мыйым шуралте, уке гын нине пӱчдымӧ-влак*а толыт, мыйым пуштыт да мыскылаш тӱҥалыт». Но саргурал нумалшыже чот лӱдын, тидым ышташ тоштын огыл. Тунам Саул шке кердыжым шогалтен да ӱмбакше шуҥгалтын.5 Саул колымым ужмеке, саргурал нумалшыжат кердыже ӱмбаке шуҥгалтын да озаж дене пырля колен.
6 Тыге Саул, тудын кум эргыже, саргурал нумалшыже да чыла еҥже ик кечынак коленыт.7 Лапвер вес велне да Иордан шеҥгелне илыше израильтян-влак, израиль еҥ-шамычын чакнен куржмыштым да Саул ден тудын эргыж-влакын колымыштым ужын, шке олаштым коден куржыныт. А филистим-влак толыныт да тушан верланеныт.
8 Эрлашыжым филистим-влак пуштмо еҥ-шамычым агаш толыныт да Гелвуй курыкеш колышо Саулым да тудын кум эргыжым муыныт.9 [Саулым комдык савырен пыштеныт да] вуйжым руалыныт, саргуралжым налыныт. Тушманым сеҥыме нерген шке кумалме пӧртлаштышт да калыклан увертараш манын, пӱтынь филистим мланде мучко уверзе-влакым колтеныт.10 Саулын саргуралжым Астарталан кумалме пӧртыш пыштеныт, а капшым Беф-Сан ола пырдыжеш пудален сакеныт.
11 Галаадысе Иависыште илыше-влак филистим-шамычын Саул дене мом ыштымышт нерген колыныт.12 Тунам тале сарзе-влак чылан корныш тарваненыт да йӱдвошт ошкылыныт. Беф-Саныш толын шумеке, нуно Саул ден эргыж-влакын капыштым пырдыж гыч налыныт, Иависыш конденыт да тушан йӱлалтеныт.13 Вара, лулегыштым налын, Иависеш тамариск пушеҥге йымалан тоеныт да шым кече пӱтым кученыт.
*а 31:4 Пӱчдымӧ-влак – необрезанные. Ончо: 1 Куг 17:10-11.
Глава 31