Выбрать язык
Книги Ветхого Завета
Книги Нового Завета
с русским текстом1 Саван ӱдырамаш кугыжаже, Соломонын Господьын лӱмжылан чапым кондымыж нерген колмеке, тудым неле йодыш-влак дене тергаш миен.2 Тудо Иерусалимыш пеш кугу поянлык дене толын: верблюд-влак ӱмбалан тамлыпушым лукшо настам,*а пеш шуко шӧртньӧ ден шергакан кӱм конден. Ӱдырамаш кугыжа Соломон дек толын да шонен коштмо чыла йодышыжо шотышто тудын дене кутырен.3 Соломон тудын чыла йодышыжлан вашмутым пуэн: кугыжалан палыдыме, умылтарен кертдыме нимоат лийын огыл.4 Саван ӱдырамаш кугыжаже Соломонын чыла шотыштат мунло улмыжым ужын. Тудо тыгак тудын чоҥымо пӧртшым,5 ӱстелысе кочкышыжым, тарзыж-влакын илыме верыштым, тарзыланымыштым, чийымыштым, аракатемкалыше-влакын могай улмыштым, Господьын храмыштыже Соломонын могай надырым йӱлалтен пуымыжым ужын.
Ӱдырамаш кугыжа шкенжым тетла кучен кертын огыл,6 тудо Соломонлан каласен: «Мом мый тыйын ыштымет да мунло улмет нерген шке мландыштем колынам – чыла чын.7 Тышке толын, шке шинчам дене ужмешкем, мом колмемлан ӱшанен омыл ыле. Но ынде умылышым: мылам тышечын пелыжымат каласкален огытыл. Тыйын мунлылык ден поянлыкет мом колмем дечат шукырак!8 Пиалан улыт тыйын еҥет-влак, пиалан улыт тарзет-шамыч – нуно эре тыйын ончылнет улыт да мунло шомакетым колыт!9 Моктымо лийже тыйын Господь Юмет, тыйым Израильын престолышкыжо шындаш Тудын поро кумылжо лийын! Израильым курымеш йӧратымыжлан кӧра Господь чын суд ден чынлыкым ышташ кугыжалан тыйым шогалтен!»10 Ӱдырамаш кугыжа Соломонлан шӱдӧ коло талант шӧртньым, пеш шуко тамлыпушан наста ден шергакан кӱм пӧлеклен. Саван ӱдырамаш кугыжажын Соломонлан пӧлеклыме наре тамлыпушан настам Израильыш нигунам конден огытыл.
11 А Хирамын Офир гыч шӧртньым шупшыктышо корабльже-влак тушеч тыгак пеш шуко йошкар пушеҥге ден шергакан кӱм конденыт.12 Кугыжа тиде йошкар пушеҥге гыч Господьын храмже ден кугыжан пӧртлан тошкалтыш кучемым, мурызо-влаклан кӱсле ден арфым ыштен. Тынар шуко йошкар пушеҥгым тымарте да тиддеч варат нигунам конденат, ужынат огытыл.
13 Соломон кугыжат Саван ӱдырамаш кугыжажлан шке пӧлекше деч посна тудын мом налаш шонымыжым да мом йодмыжым чыла пуэн. Тидын деч вара тудыжо шке тарзыж-влак дене пырля шке мландышкыже каен.
14 Кажне ийын Соломонлан кудшӱдӧ кудло куд талант шӧртньым конден шогеныт.15 Сатум кондышо ден купеч-шамычын ужалыме парышышт, тыгак Аравийысе чыла кугыжа да кундемтӧра-влак деч налме йозак тиде чотыш пурен огыл.
16 Соломон кугыжа таптыме шӧртньӧ дене кокшӱдӧ кугу авыртышым ыштен. Кажныжлан кудшӱдӧ сикль каен.17 Таптыме шӧртньӧ дене тыгак изирак кумшӱдӧ авыртышым ыштен. Кажныжлан кум мине*б шӧртньым кучылтын. Нуным кугыжа Ливанысе кедр дене ыштыме полатыш шогалтен.18 Эше слон лу гыч кугу престолым ыштен да яндар шӧртньӧ дене комыжлен.19 Престолын куд тошкалтышыже лийын, а эҥертышыжын кӱшыл ужашыже йыргешке улмаш. Шинчыме верын кок могырыштыжат – кынервуй эҥертыш, нунын воктене кок лев шоген.20 Тыгак кажне тошкалтышын кок велныже ик лев дене шоген – чылаже латкокыт. Тыгай престол нимогай кугыжанышыште лийын огыл.21 Соломонын йӱмӧ чыла атыже шӧртньӧ дене ыштыме улмаш. Тыгак Ливанысе кедр дене ыштыме полатыштат чыла ате-ӱзгар шӧртньӧ лийын. Ший дене ыштыме нимоат лийын огыл, вет ший Соломон илыме жапыште аклалтын огыл.22 Теҥызыште Хирамын корабльже-влак дене пырля Соломон кугыжан Фарсис корабльже-шамычат лийыныт. Нуно кум ийлан ик гана шӧртньым, шийым, слон лум, маймыл ден павлин-влакым конден шогеныт.
23 Соломон шке поянлыкше да мунлылыкшо дене мландымбалысе чыла кугыжам эртен каен.24 Мландымбалысе чыла [кугыжа], тудын шӱмышкыжӧ Юмын пыштыме мунлылыкым колышташ манын, Соломон дене вашлиймашым кычалын.25 Кажныже шке пӧлекшым конден: ший ден шӧртньӧ арверым, вургемым, саргуралым, тамлыпушан настам, имне ден мулым. Ий гыч ийыш тыге лийын шоген.
26 Соломон шкаланже сарлык орван да имнешкан сарзывийым поген. Тудын тӱжем нылшӱдӧ орва ден латкок тӱжем имнешкыже лийын. Нуным орван сарзывийлан ойырымо олалаште да шкеж дене Иерусалимыште кучен. [Эҥер гыч тӱҥалын, Филистим мланде ден Египет чек марте Соломон чыла теҥыз дене озаланен.]27 Тудын кугыжаланымыж годым ший Иерусалимыште тыглай кӱ наре, а кедр гын лоп верыште кушшо ир смоква пушеҥге наре лийыныт.28 Имньым гын Соломонлан Египет ден Кува гыч конденыт. Кугыжан купечше-влак нуным Куваште оксала налыныт.29 Орвам Египет гыч кудшӱдӧ сикль шийлан, а имньым шӱдӧ витле сикльлан конден шогеныт. Купеч-влак чыла тидым хеттей ден арамей кугыжа-шамычланат конденыт.
*а 10:2 Тамлыпушан наста – благовоние.
*б 10:17 Мине – нелыт висыме единице, кум мине – 1,7 кг наре.
Глава 10