Выбрать язык
Книги Ветхого Завета
Книги Нового Завета
с русским текстом1 Иеровоамын, Нават эргын, латкандашымше ий вуйлатымыж годым Иудан кугыжажлан Авий шогалын.2 Тудо Иерусалимыште кум ий вуйлатен. Аважын лӱмжӧ Мааха, тудо Авессаломын ӱдыржӧ лийын.3 Тудын деч ончыч ачаже могай сулыкым ыштен, Авият чыла тидым ыштен. Шке Господь Юмыжлан тудо Давид кочаж семын пӱтынек ӱшанле лийын огыл.4 Но Давидлан кӧра Господь Юмо Иерусалимыште тудын лампыжлан йӧраш пуэн огыл – Господь тудын деч вара престолыш эргыжым шынден да Иерусалимым пеҥгыдемден.5 Вет Давид Господьлан келшыше пашам ыштен да, хеттей Урий дене мом ыштымыжым шотыш налаш огыл гын, илыме чыла кечылаштыже Тудын кӱштымыж деч кораҥын огыл.6 Авийын илыме кечылаштыже Ровоам ден Иеровоам тукым-влак коклаште сар эре каен шоген.
7 Авийын моло пашаже, мом ыштымыж нерген «Иуда кугыжа-влакын курымсерыш книгаштышт» возымо. Авий ден Иеровоам коклаште сар каен шоген.8 Вара Авий шке кугезыж-влак деке ушнен, тудым Давид-Олаште тоеныт. Олмешыже кугыжалан Аса эргыже шогалын.
9 Иеровоамын, Израиль кугыжан, колымшо ий вуйлатымыж годым Иудан кугыжажлан Аса шогалын.10 Тудо Иерусалимыште нылле ик ий кугыжаланен. Аважын лӱмжӧ Ана,*а тудо Авессаломын ӱдыржӧ лийын.11 Давид кочаж семынак Аса Господь ончылно чын пашам ыштен.12 Тудо кумалме верлаште яжарланыше пӧръеҥ-влакым эл гыч поктен колтен, тыгак ача-кочаж-влакын ыштыме шояк юмыштым кораҥден.13 Эсогыл Ана аважымат Ашера меҥгым ыштымыжлан «кугыжан аваже» лӱм деч посна коден. Аса тиде меҥгым руэн да Кедрон йогын воктене йӱлалтен.14 Кӱкшакасе кумалме верлам гына тудо пытарен огыл, но илыме чыла кечылаштыже Господьлан уло шӱм-чонжо дене ӱшанле лийын.15 Господьлан пӧлеклыме шийым, шӧртньым да ате-влакым, кудым ачаже да шкеже пуэныт, тудо Господьын пӧртышкыжӧ пуртен.
16 Аса ден Израиль кугыжа Вааса коклаште сар эре каен шоген.17 Израиль кугыжа Вааса Иуда ваштареш сар дене лектын. Иуда кугыжа Аса деке нигӧ пурен да лектын ынже керт манын, тудо Рама олам чоткыдемдаш тӱҥалын.18 Тунам Аса Господьын пӧртын да кугыжан пӧртын поянлыкым погымо верлаште кодшо чыла ший ден шӧртньым налын да тудым шке еҥже-влак дене Дамаскыште илыше Сирий кугыжа Венададлан колтен – тудыжо Тавримонын эргыже, Хезионын уныкаже лийын. Аса тыге каласаш кӱштен:19 «Мыйын ачам ден тыйын ачат коклаште ойпидыш лийын, тек тыгай ойпидыш мемнан коклаштат лиеш. Теве мый тылат пӧлеклан ший ден шӧртньым колтем. Израиль кугыжа Вааса дене ыштыме ойпидышетым кӱрл, тек тудо мый дечем чакнен кая».
20 Венадад Аса кугыжам колыштын. Тудо шке сарзывуйжо-шамычым Израиль ола-влак ваштареш колтен. Нуно Ийоным, Даным, Авел-Беф-Маахам, пӱтынь Киннереф кундем ден Неффалим мландым руалтен налыныт.21 Тидын нерген колмеке, Вааса кугыжа Рама олам чоткыдемдымыжым чарнен да Фирцаш пӧртылын.22 Аса кугыжа Иуда калыкым икте кодде поген, да нуно Ваасан чоҥымыж годым кучылтмо кӱ ден пырня-влакым Рама гыч луктыныт. Аса кугыжа нуным Вениамин мландысе Гева ден Мицпам чоткыдемдыме годым кучылтын.
23 Асан моло пашаже, чыла сеҥымашыже, мом ыштымыже да чоҥымо олаж-влак нерген «Иуда кугыжа-шамычын курымсерыш книгаштышт» возымо. Но кунам Аса шоҥгемын, тудын йолжо коршташ тӱҥалын.24 Вара Аса шке кугезыж-влак деке ушнен, тудым нунын пелен Давид кочажын олаштыже тоеныт. Тудын деч вара Иосафат эргыже кугыжаланаш тӱҥалын.
25 Иуда кугыжа Асан кокымшо ий вуйлатымыж годым Израильын кугыжажлан Нават, Иеровоам эрге, шогалын да Израильым кок ий вуйлатен.26 Тудо Господь шинча ончылно тӱрлӧ осал пашам ыштен, Израильым сулыкыш пуртышо ачажын корныж дене коштын да тыгаяк сулык-влакым ыштен.27 Иссахар тукым гыч Вааса, Ахий эрге, тудын ваштареш заговорым ыштен. Кунам Нават ден чыла израильтян-влак филистим Гавафон олам авырен налыныт, Вааса тудым тушан пуштын.28 Вааса тудым Иуда кугыжа Асан кумшо ий кугыжаланымыж годым пуштын да олмешыже кугыжалан шогалын.29 Престолыш шичмекше, тудо Иеровоамын уло урлыкшым пуштын. Господьын Силом гыч улшо Ахий тарзыж гоч каласыме семынак, тудо Иеровоам урлык гыч иктымат илышым коден огыл – чылаштым пытарен.30 Тиде чылажат Иеровоамын сулыкым ыштымыжлан, тидын дене пӱтынь Израильым сулыкыш пуртымыжлан, Израильын Господь Юмыжым шыдештарымыжлан кӧра лийын.31 Наватын моло пашаже, тудын мом ыштымыже нерген «Израиль кугыжа-влакын курымсерыш книгаштышт» возымо.32 Аса ден Израиль кугыжа Вааса коклаште сар эре каен шоген.
33 Иуда кугыжа Асан кумшо ий вуйлатымыж годым пӱтынь Израильын кугыжажлан Вааса, Ахий эрге, шогалын. Тудо Фирцаште коло ныл ий кугыжаланен.34 Господь шинча ончылно Вааса шуко осал пашам ыштен, тудо Израильым сулыкыш пуртышо Иеровоамын корныж дене коштын да тыгаяк сулык-влакым ыштен.
*а 15:10 Грек текстыште тиде ӱдырамашын лӱмжӧ Ана, а еврей текстыште Мааха.
Глава 15