Выбрать язык
Книги Ветхого Завета
Книги Нового Завета
с русским текстом1 Ииуйлан, Ананий эргылан, Вааса шотышто Господь деч тыгай шомак лийын:2 «Мый тыйым пурак гыч нӧлталынам да Израиль калыкемын вуйлатышыжлан шогалтенам. А тый Иеровоамын корныж дене каенат да Израиль калыкем сулыкыш пуртенат, тидын дене Мыйын шыдем луктынат.3 Садлан Мый Ваасам, тудын урлыкшым пытарем. Мом Мый Нават эрге Иеровоамын урлыкшо дене ыштенам, тидымак тыйын урлыкет дене ыштем.4 Ваасан тукымжо гыч кӧ олаште кола, тудым пий-влак кочкыт, а кӧ ола деч ӧрдыжтӧ кола – кайык-влак чӱҥген пытарат».
5 Ваасан моло пашаже, мом ыштымыже да сеҥымашыже-влак нерген «Израиль кугыжа-шамычын курымсерыш книгаштышт» возымо.6 Вара Вааса шке ача-кочаж-влак деке каен, тудым Фирцаш тоеныт. Олмешыже кугыжалан Эла эргыже шогалын.
7 Но Вааса да тудын урлыкшо шотышто Господьын шомакше Ананийын Ииуй эргыж гоч ончычак каласыме лийын. Вет Господь шинча ончылно тӱрлӧ осал пашам ыштымыж дене Вааса, Иеровоам тукым семынак, Господьым шыдештарен. Вааса тыгак Иеровоам тукымым пытарен улмаш.
8 Иуда кугыжа Асан коло кудымшо ий кугыжаланымыж годым Израильын кугыжажлан Эла, Ваасан эргыже, шогалын да Фирцаште кок ий вуйлатен.9 Тудын ваштареш Зимри лӱман тарзыже заговорым ыштен. Тудо орван сарзе-влакын пел ужашыштын вуйлатышыже лийын. Кунам кугыжа Фирцаште полат вуйлатыше Арсан пӧртыштыжӧ чот руштмеш йӱын,10 тушко Зимри пурен да Элам пуштын. Тиде Иуда кугыжа Асан коло шымше ий кугыжаланымыж годым лийын. Эла олмеш кугыжалан Зимри шогалын.
11 Кугыжалан шогалмеке да престолыш шичмеке, Зимри Ваасан уло урлыкшым пытарен. Тудо ик пӧръеҥымат – Элам пуштмыжлан ӱчым шуктен кертше родыжымат, йолташыжымат – коден огыл.12 Зимри Ваасан пӱтынь урлыкшым пытарен. Тыге Вааса шотышто Господьын Ииуй пророк гоч каласымыже шукталтын.13 Тиде чылажат Ваасан да тудын Эла эргыжын ыштыме сулыкыштлан, тидын дене Израильым сулыкыш пуртымыштлан, Израильын Господь Юмыжым полган юмышт дене шыдештарымыштлан кӧра лийын.14 Элан моло пашаже, мом ыштымыже нерген «Израиль кугыжа-шамычын курымсерыш книгаштышт» возымо.
15 Иуда кугыжа Асан коло шымше ий вуйлатымыж годым Зимри кугыжалан шогалын да Фирцаште шым кече вуйлатен. Тунам израиль сарзе калык филистим-влакын Гавафон олаштым йыр авырен налын улмаш.16 Зимрин заговорым ыштымыже да кугыжам пуштмыж нерген колмеке, Гавафоным авырен налше калык тудо кечынак станыште Израильын кугыжажлан сарзывуй Амврийым шогалтен.17 Тидын деч вара Амврий ден чыла израильтян-влак Гавафон гыч каеныт да Фирцам авырен налыныт.18 Нунын олам сеҥен налмыштым ужмеке, Зимри кугыжан полатшын кӧргӧ пӧлемышкыже пурен. Тудо полатым йӱлалтен да шкежат тушан колен.19 Тыге Зимри шке сулыкшылан мутым кучен, вет тудо Господь шинча ончылно тӱрлӧ осал пашам ыштен, Израильым сулыкыш пуртышо Иеровоамын сулыкан корныж дене коштын.20 Зимрин моло пашаже да тудын ыштыме заговоржо нерген «Израиль кугыжа-влакын курымсерыш книгаштышт» возымо.
21 Тунам Израиль калык кокыте шелалтын: пел калык Гонаф эрге Фамнийым кугыжалан шогалтынеже улмаш, а вес пелыже Амврий велне лийын.22 Амврий велне улшо калык Гонаф эрге Фамний могырышто улшо калыкым сеҥен. Фамний колен, а кугыжалан Амврий шогалын.
23 Иуда кугыжа Асан кумло икымше ий вуйлатымыж годым Израильын кугыжажлан Амврий шогалын да латкок ий кугыжаланен. Тышечын куд ийжым Фирцаште вуйлатен.24 Амврий Шемер деч кок талант шийлан Самарий курыкым налын да тушан олам чоҥен. Чоҥымо олам тудо курыкын Шемер озаже лӱмеш Самарий манын лӱмден.25 Амврий Господь шинча ончылно тӱрлӧ осал пашам ыштен. Тудын деч ончыч кугыжаланыше-шамыч дене таҥастарымаште, Амврий эшеат удан ыштен.26 Тудо чыла шотыштат Нават эрге Иеровоамын сулыкан корныж дене коштын – сулыкым ыштымыж дене израильтян-шамычымат сулыкыш пуртен, полган юмыж-влак дене Израильын Господь Юмыжын шыдыжым луктын.27 Амврийын моло пашаже, мом ыштымыже да сеҥымашыже-влак нерген «Израиль кугыжа-шамычын курымсерыш книгаштышт» возымо.28 Вара Амврий шке ача-кочаж-влак деке каен, тудым Самариеш тоеныт. Тудын олмеш кугыжалан Ахав эргыже шогалын.
29 Ахав, Амврий эрге, Израильын кугыжажлан Иуда кугыжа Асан кумло кандашымше ий вуйлатымыж годым шогалын. Тудо Самарийыште Израильым коло кок ий вуйлатен.30 Ахав, Амврий эрге, Господь шинча ончылно тӱрлӧ осал пашам тудын деч ончыч кугыжаланыше-шамыч деч шукырак ыштен.31 Нават эрге Иеровоамын сулыкышкыжо пурымо тудлан шагал лийын – Ахав шкаланже Иезавельым, Сидон кугыжа Ефваалын ӱдыржым, марлан налын. Тидын деч вара тудо Вааллан служитлаш, тудлан кумалаш тӱҥалын.32 Самарий олаште Вааллан чоҥымо храмыштыже тудо Вааллан жертвенникым ыштен.33 Ахав тыгак Ашера меҥге-влакым шогалтен да шке пашаж дене Израильын Господь Юмыжым тудын деч ончыч лийше чыла израиль кугыжа деч чотрак шыдештарен. [Тыге тудо шке чонжым пытарен.]34 Ахав кугыжаланыме годым Вефиль гыч Ахиил угыч Иерихоным нӧлталын. Господьын Нав эрге Иисус гоч каласыме шомакше семынак, тудо
«олалан негызым пыштен –
Авирон кугэргыжым йомдарен,
капкам шогалтен –
изирак Сегуб эргыжым йомдарен».*а
*а 16:34 Ончо – Нав эрге Иисусын книгаже 6:25.
Глава 16