Выбрать язык
Книги Ветхого Завета
Книги Нового Завета
с русским текстом1 Галаад кундемысе Фесвийыште [пророк] Илия илен. Тудо Ахавлан каласен: «Мыйын служитлыме Израильын Господь Юмыж дене товатлем: тиде ийлаште лупсат, йӱрат огыт лий. Мый каласем гын веле, йӱр лиеш».
2 Тудлан Господь деч шомак лийын:3 «Тышечын кай. Кай эрвелкыла да Иордан вес велне улшо Хораф йогын воктене шыл.4 Тушечын тый вӱдым йӱаш тӱҥалат, а тыйым пукшаш Мый курныж-влаклан кӱштенам».5 Илия Господь каласыме семынак ыштен: каен да Иордан вес велне улшо Хораф йогын дене верланен.6 Кажне эрдене да кастене курныж-влак тудлан кинде ден шылым конденыт, а вӱдым тудо йогын гыч йӱын.
7 Эл мучко йӱр укелан кӧра тиде йогын икмыняр жап гыч кошкен.8 Илиялан Господь деч шомак лийын:9 «Сидон воктене улшо Сарепта олаш кай да тушан код. Мый тушто ик тулык ватылан тыйым пукшаш кӱштенам».
10 Илия кынелын да Сарепташ каен. Кунам тудо оласе капка дек толын шогалын, тушто пум погышо тулык ватым ужын. Илия тудым ӱжын да каласен: «Поро лий, мылам атеш изишак вӱдым йӱаш кондо».11 Ӱдырамаш вӱдлан каен, Илия почешыже кычкыралын: «Мылам эше кинде шултышым кондо!»12 Тудыжо Илиялан вашештен: «Господь Юмет дене товатлем: кинде мыйын нимынярат уке. Кӧршӧкыштӧ лач ик кормыж ложаш да кувшиныште изишак ӱй уло. Теве изишак укшым погем да каем, шкаланем да эргымлан иктаж-мом кӱэштам. Тидым кочкына, а вара шужен колена».
13 Илия тудлан каласен: «Ит лӱд. Каласымет семынак ыште, но ончыч изи лепошкам кӱэшт да мылам кондо. А шкаланет да эргычлан вара ямдылет.14 Вет Израильын Господь Юмыжо тыге ойла: ”Господьын мландыш йӱрым колтымешкыже, кӧршӧкыштӧ ложаш ок пыте, кувшиныште ӱй ок шагалем”».15 Ӱдырамаш каен да Илиян каласымыж семынак ыштен. Тидын деч вара кочкыш тудланат, Илияланат, эргыжланат эре лийын.16 Господьын Илия гоч каласымыж семынак, кӧршӧкыштӧ ложаш пытен огыл да кувшиныште ӱй шагалемын огыл.
17 Икмыняр жап гыч тиде ӱдырамашын, пӧрт озаватын, эргыже черланен. Тудо начаррак да начаррак лийын, вара шӱлымыжымат чарнен.18 Ӱдырамаш Илиялан каласен: «Мый денем тыйын могай пашат, Юмын айдеме? Тый мый декем сулыкем шарныкташ да эргымым пушташ толынат мо?»19 Илия тудлан вашештен: «Пу мылам эргычым». Тудо озаватын кидше гыч рвезым налын да кӱшкӧ, шке илыме пӧлемышкыже, наҥгаен. Йочам вакшышкыже пыштен20 да Господьым сӧрвален кумалын: «О, Господь, мыйын Юмем! Тиде тулык ватылан, кӧн пӧртыштыжӧ мый илем, Тый осалым ыштынет да тудын эргыжым пуштнет мо?»21 Тудо йоча ӱмбаке кум гана шуйнен возын да Господьым сӧрвален йодын: «Господь, мыйын Юмем! Тек тиде йочан чонжо капышкыже пӧртылеш!»22 Господь Илиям колын – йочан чонжо пӧртылын, да тудо ылыжын.23 Илия йочам налын, шке пӧлемже гыч ӱлыкӧ волтен да аважлан кучыктен. «Ончо, тыйын эргыч илыше», – каласен тудо.24 Ӱдырамаш Илиялан каласен: «Ынде мый палем: тый Юмын айдеме улат, да чынжымак тыйын умшаштет Юмын шомакше!»
Глава 17