Выбрать язык
Книги Ветхого Завета
Книги Нового Завета
с русским текстом1 Рувимын, Израильын кугэргыжын, эргыж-влак. Рувим кугэрге лийын, но кунам тудо ачажын малыме вержым шакшылен, кугэргылыкшым Иосифын, Израиль эргын, эргыж-влаклан пуымо. Но нуно садак тукымвожым возымаште кугэрге семын огыт ончыкталт.*а2 Кеч Иуда шке иза-шольыжо-влак коклаште эн куатан лийын да тудын деч вуйлатыше лектын, кугэргылык Иосифлан куснен.3 Рувимын, Израильын кугэргыжын, эргыж-влак: Ханох, Фаллу, Хецрон да Харми.
4 Иоильын тукымжо: тудын эргыже – Шемай, Шемайын эргыже – Гог, Гогын эргыже – Шимей,5 Шимейын эргыже – Миха, Михан эргыже – Реаий, Реаийын эргыже – Ваал,6 Ваалын эргыже – Беера, тудым Феглафелласар, Ассирий кугыжа, пленыш наҥгаен. Беера Рувим эрге-влакын онышт лийын.7 Тудын иза-шольыжо-влак шке урлыкышт дене, тукым лӱмер*б почеш, теве кӧмыт лийыныт: тукымвуй Иеиел, вара Захарий8 да Бела, Азазын эргыже. Азаз Шеман эргыже, Шема Иоильын эргыже лийыныт. Нунын мландышт Ароер деч Нево ден Ваал-Меон марте шуйнен.9 Галаад мландыште нунын кӱтӱшт пеш чот шукемын, сандене нуно эрвелкыла мландым Евфрат эҥер велыш шуйналтше ир мландын тӱржӧ марте айленыт.10 Саул кугыжаланыме жапыште нуно агарян-влак ӱмбаке сар дене каеныт, нуным сеҥеныт да Галаадын пӱтынь эрвел могырыштыжо омашлаште илаш тӱҥалыныт.
11 Гад эрге-влак нунын воктене Васан мландыште Салха марте иленыт.12 Васаныште Иоиль тукымвуй лийын, Шафан – тудын деч вара кокымшо, вара – Иаанай ден Шафат.13 Нунын иза-шольышт шке урлыкышт дене шымытын лийыныт: Михаил, Мешуллам, Шева, Иорай, Иаакан, Зий да Евер.14 Теве Авихаилын, Хурий эргын, урлыкшо – Хурийже Иароахын эргыже, Иароах Галаадын, Галаад Михаилын, Михаил Иешишайын, Иешишай Иахдон, а Иахдо Бузын эргыже лийыныт.15 Ахи, Авдиилын эргыже, Гунин уныкаже, шке тукымжын вуйлатышыже лийын.16 Нуно Галаадыште, Васаныште да йыр улшо илемлаште Шаронын кӱтымӧ верлажын мучашыже марте иленыт.17 Нуно чыланат Иуда кугыжа Иофам ден Израиль кугыжа Иеровоамын вуйлатымышт жапыште тукымвожым возымашке пуртымо лийыныт.
18 Рувим ден Гад тукым-влакын, тыгак Манассийын пел тукымжын авыртыш ден кердым нумалше, пикшым лӱйкалыше, кредалаш туныктымо нылле ныл тӱжем шымшӱдӧ кудло тале сарзышт лийын.19 Нуно агарян, иетур, нафиш да надав-влак ваштареш кредалыныт.20 Тушман ваштареш кредалмаште нунылан полыш лийын: агарян-влакым, пеленышт лийше-шамычым нуно сеҥеныт, вет кредалмышт годым Юмо деч полышым йодын кумалыныт. Юмо нуным колын, вет нуно Тудлан инаненыт.21 Нуно агарян-влакын кӱтӱштым руалтен налыныт: витле тӱжем верблюдым, кокшӱдӧ витле тӱжем тыгыде вольыкым, кок тӱжем осёлым, тыгак шӱдӧ тӱжем еҥым.22 Тунам пеш шуко еҥ пытен, вет тиде кредалмаш Юмо деч лийын. Агарян-влакын мландыштышт нуно вес вере илаш наҥгайыме марте иленыт.
23 Манассийын пел тукымжын калыкше саде мландыште Васан гыч Ваал-Ермон, Сенир да Ермон курык марте илен. Нуно пеш шукын лийыныт.24 Теве нунын урлыквуйышт: Ефер, Иший, Елиил, Азриил, Иеремий, Годавий да Иагдиил – виян, лӱмлӧ сарзе-влак, шке урлыкыштын вуйлатышышт.25 Но кунам нуно ача-кочаштын Юмышт ваштареш сулыкыш пуреныт да Юмын нунын ончыч поктен колтымо калык-влакын юмыштлан яжарланен кумалаш тӱҥалыныт,26 тунам Израильын Юмыжо Ассирий кугыжа Фулым – вес семынже Феглафелласарым – таратен, да тудыжо Рувим, Гад тукым-влакым да Манассийын пел тукымжым тиде мланде гыч вес вере илаш кусарен. Тудо нуным Халахыш, Хаворыш, Араш да Гозан эҥер деке наҥгаен. Нуно таче кече мартеат туштак улыт.
*а 5:1 Ончо: Тӱҥ 35:22.
*б 5:7 Лӱмер – список.
Глава 5