Выбрать язык
Книги Ветхого Завета
Книги Нового Завета
с русским текстом1 Иссахарын эргыж-влак: Фола, Фуа, Иашув да Шимрон – чылаже нылыт.2 Фолан эргыж-влак: Уззий, Рефаий, Иериил, Иахмай, Ивсам да Самуил. Нуно Фола эрге-шамычын урлыквуйышт, тале сарзе лийыныт. Давидын кугыжа улмыж годым Фола эрге-влакын чотышт коло кок тӱжемат кудшӱдӧ лийын.3 Уззийын эргыже – Израхий. Израхийын эргыж-влак: Михаил, Овадий, Иоиль да Ишший. Нуно визытынат урлыквуй лийыныт.4 Нунын тукымысо урлыклаште кредалаш ямде кумло куд тӱжем сарзе лийын, вет нунын шуко ватышт да эргышт улмаш.5 Иссахар тукымысо моло урлыкышто чылаже кандашле шым тӱжем тале сарзе лийын. Нунын лӱмыштым тукым лӱмерыште возымо.
6 Вениаминын эргыж-влак: Бела, Бехер да Иедиаил – чылаже кумыт.7 Белан эргыж-влак: Эцбон, Уззий, Узиил, Иеримоф да Ири – чылаже визыт. Нуно урлык вуйлатыше, тале сарзе лийыныт. Тукым лӱмерыште нуно коло кок тӱжемат кумло нылытын улыт.8 Бехерын эргыж-влак: Земира, Иоаш, Елиезер, Елиоенай, Омри, Иремоф, Авий, Анафоф да Алемеф. Нине чыланат Бехерын эргыже улыт.9 Нунын урлыкысо тале сарзе-влак тукым лӱмерыште коло кок тӱжемат кокшӱдӧ лийыныт.10 Иедиаилын эргыже – Билган. Билганын эргыж-влак: Иеус, Вениамин, Егуд, Хенаана, Зефан, Фарсис да Ахишахар.11 Иедиаилын чыла тиде эргыже урлык вуйлатыше, тале сарзе лийыныт. Нунын латшым тӱжемат кокшӱдӧ сарзышт улмаш.12 Шупим ден Хупим – Ирын эргыже-влак, а Хушим Ахерын эргыже лийын.
13 Неффалимын эргыже-шамыч: Иахцеил, Гуни, Иецер да Шаллум. Нуно Валлан уныкаже лийыныт.
14 Манассийын эргыже-влак: Асриил, тудо арамей кулватыж деч шочын. Тиде кулватыжак Махирым, Галаадын ачажым, ыштен.15 Махир шкаланже Хупим ден Шупимын шӱжарыштым марлан налын, тудын лӱмжӧ Мааха лийын. Кокымшо эргыжын лӱмжӧ Салпаад улмаш. Салпаадын ӱдыр йочаже-влак гына шочыныт.16 Мааха, Махирын ватыже, эргым ыштен да тудлан Переш лӱмым пуэн. Тудын шольыжын лӱмжӧ Шереш лийын, а эргыж-влак: Улам ден Рекем.17 Уламын эргыже – Бедан. Теве Галаадын, Махир эргын, Манассийын уныкажын, эрге-уныкаже-влак.18 Тудын Молехеф шӱжарже Ишгодым, Авиезерым да Махлам ыштен.19 Шемидан эргыж-влак: Ахиан, Шехем, Ликхи да Аниам.
20 Ефремын тукымжо: тудын эргыже – Шутелах. Шутелахын эргыже – Беред, Бередын эргыже – Тахаф, Тахафын эргыже – Елеад, Елеадын эргыже – Тахаф,21 Тахафын эргыже – Завад, Завадын эргыже – Шутелах. Ефремын тыгак Езер ден Елеад эргыже-шамыч лийыныт, но нуным Гефыште шочын-кушшо да туштак илыше вес калык еҥ-влак кӱтӱштым руалтен налаш тӧчымыштлан пуштыныт.22 Ефрем ачашт нунын шотышто кужу жап шортын. Ефремым лыпландараш манын, тудын деке родо-тукымжо толын коштын.23 Вара тудо шке ватыж дене мален. Ватыже мӱшкыраҥын да эргым ыштен. Ефрем тудлан Берий*а лӱмым пуэн, вет пӧртышкыжӧ ойго толын улмаш.24 Тудын эше Шеера ӱдыржӧ лийын. Шеера Ӱлыл ден Кӱшыл Беф-Ороным, тыгак Уззен-Шеерам чоҥен.25 Берийын Рефай эргыже лийын. Рефайын эргыже-влак: Решеф ден Фелах. Фелахын эргыже Тахан,26 Таханын эргыже Лаедан, Лаеданын эргыже Аммиуд, Аммиудын эргыже Елишама,27 Елишаман эргыже Нав, а Навын эргыже Иисус лийыныт.28 Теве нунын мландышт да илыме верышт: Вефиль да тудын йыр улшо илем-влак, эрвелне Нааран, касвелне Газер да йырже улшо илем-влак, Сихем да тудын йыр улшо илем-влак Газа марте, тыгак Газа йыр улшо илем-влак.29 Манассий эрге-шамычын мландышт велне – Беф-Сан, Фаанах, Мегиддо, Дор да нунын йыр улшо илем-влак. Тушто Израиль эрге Иосифын эргыже-шамыч иленыт.
30 Асирын эргыж-влак: Имна, Ишва, Ишви, Берий. Нунын шӱжарышт Серах лийын.31 Берийын эргыж-влак: Хевер ден Малхиил. Малхиилже Бирзаифын ачаже лийын.32 Хевер деч Иафлет, Шомер, Хофам да нунын Шуя шӱжарышт шочыныт.33 Иафлетын эргыж-влак: Пасах, Бимгал да Ашваф. Тиде Иафлетын эргыже-шамыч улыт.34 Шемерын эргыж-влак: Ахи, Рохга, Ихубба да Арам.35 Гелемын,*б тудын шольыжын, эргыже-шамыч: Цофах, Имна, Шелеш да Амал.36 Цофахын эргыж-влак: Суах, Харнефер, Шуал, Бери, Имра,37 Бецер, Год, Шамма, Шилша, Ифран да Беера.38 Иеферын эргыж-влак: Иефунни, Фиспа да Ара.39 Уллан эргыже-шамыч: Арах, Ханниил да Риций.40 Чыла тиде Асир тукым эрге-влак улыт. Нуно шке урлыкыштын вуйлатышышт, эн тале, уста сарзе, кугу он-влак лийыныт. Тукым лӱмерыште Асирын кредалаш ямде коло куд тӱжем сарзыже лийын.
*а 7:23 «Берий» лӱм еврей йылмыште ’ойго’ мут дене ик семынрак йоҥга.
*б 7:35 «Гелем» – Хофамын вес лӱмжӧ манын шонат, ончо 7:32.
Глава 7