Выбрать язык
Книги Ветхого Завета
Книги Нового Завета
с русским текстом1 Аса олмеш кугыжалан Иосафат эргыже шогалын да, Израиль ваштареш шогаш манын, кучемвийжым пеҥгыдемден.2 Тудо шке сарзыже-влакым Иуда мландысе чоткыдемдыме чыла олаш шогалтен. Тыгак шке отрядше-шамычым Иуда мланде мучко да Ефрем мландыште Аса ачажын руалтен налме олалашкыже вераҥден.3 Господь Иосафат пелен лийын, вет вуйлаташ тӱҥалме ийлаште тудо Давид кугезе кочажын корныж дене коштын. Тудо Ваал-влакым огыл,4 а шке ачажын Юмыжым кычалын да Тудын кӱштымашыже-влакым шуктен шоген. Иосафат израильтян-шамычын корнышт дене каен огыл.5 Господь тудын кугыжаныш кучемжым пеҥгыдемден, пӱтынь Иуда мланде тудлан йозакым тӱлен. Иосафатын поянлыкше шуко лийын, да тудо пеш чот чапланен.6 Иосафат уло шӱм-чонжо дене Господьлан ӱшанле лийын. Тудо тыгак кӱкшакасе кумалме вер ден Ашера меҥге-влакым кораҥден.
7 Кумшо ий кугыжаланымыж годым Иосафат шке онжо-влакым – Бенхаилым, Овадийым, Захарийым, Нафанаилым да Михейым – Иуда олалашке калыкым туныкташ колтен.8 Нунын дене пырля левит-влак – Шемай, Нефаний, Зевадий, Асаил, Шемирамоф, Ионафан, Адоний, Товий, Тов-Адоний – да иерей Елишама ден Иорам лийыныт.9 Нуно Иуда мланде мучко туныктен коштыныт, пеленышт Господьын закон книгаже лийын. Нине еҥ-влак Иудан чыла олаж гоч эртеныт да калыкым туныктеныт.
10 Иуда мланде йыр улшо чыла кугыжанышым Господь деч лӱдмаш авалтен, сандене нуно Иосафат дене кредалын огытыл.11 Филистим-влак кокла гыч южышт Иосафатлан пӧлекым да йозак шотеш шийым конден шогеныт. А араб-шамыч тудлан тыгыде вольыкым конденыт: шым тӱжем шымшӱдӧ вуй тагам да шым тӱжемат шымшӱдӧ вуй казатагам.
12 Иосафат виянрак да виянрак лийын, тудо Иуда мландыште карман ден шапаш аралыме ола-влакым чоҥен.13 Сандене Иуда олалаште шуко шапашыже лийын. А Иерусалимыште тудо шуко тале сарзым вераҥден.14 Теве тукым шот дене нунын лӱмерышт да чотышт. Иуда тукымын сарзывуйжо-влак: Адна, тудын кумшӱдӧ тӱжем тале сарзыже лийын;15 почешыже – Иегоханан, тудын кокшӱдӧ кандашле тӱжем еҥже улмаш;16 почешыже – Амасий, Зихри эрге, тудын кокшӱдӧ тӱжем тале сарзыже лийын. Амасий Господьлан шке кумылын служитлен.17 Вениамин тукым гыч: тале сарзе Елиада, тудын йоҥеж ден авыртышан кокшӱдӧ тӱжем еҥже лийын;18 почешыже – Иегозавад, тудын саргуралан шӱдӧ кандашле тӱжем сарзыже улмаш.19 Кугыжан Иуда мланде мучко чоткыдемдыме олалаштыже вераҥдыме сарзе-влак улмо ӱмбач нине еҥ-шамычат Иосафатлан служитленыт.
Глава 17