Выбрать язык
Книги Ветхого Завета
Книги Нового Завета
с русским текстом1 Иосафатын шуко поянлыкше лийын, да тудо пеш чот чапланен. Шке ешышкыже Ахав тукым гыч ӱдырым марлан налмеке, Иосафат Ахав дене родо лийын2 да икмыняр ий гыч тудын деке Самарийыш каен. Ахав Иосафатлан да тудын еҥже-влаклан шуко тыгыде ден шолдыра вольыкым шӱшкылын да тудым Галаадысе Рамоф ӱмбаке каяш таратен.3 Израиль кугыжа Ахав Иуда кугыжа Иосафат деч йодын: «Галаадысе Рамофыш мый денем пырля кает мо?» Иосафат вашештен: «Кушко тый, тушко мыят. Кушко тыйын калыкет, тушко мыйынат. Мый сарыш тый денет пырля каем».4 Но тыгодымак тудо Израиль кугыжалан каласен: «Эн ончыч йод, мом Господь каласа».5 Израиль кугыжа пророк-влакым поген – нунышт нылшӱдын лийыныт – да йодын: «Мыланна Галаадысе Рамоф ӱмбаке сар дене каяш але уке?» Пророк-влак вашештеныт: «Кай, Юмо тудым кугыжан кидыш пуа».6 Иосафат йодын: «А тыште Господьын эше вес пророкшо уке мо? Тудын дечат йодына ыле».7 Израиль кугыжа тудлан вашештен: «Уло эше икте, Господь деч каҥашым тудын гоч йодаш лиеш. Но мый тудым чытен ом керт: мыйын шотышто сай пророк шомакым нигунам ок ойло, лач удам веле. Тиде – Михей, Иемвлай эрге». Иосафат каласен: «Кугыжа тыге ынже ойло».8 Израиль кугыжа ик сартӧрам ӱжын да каласен: «Михейым, Иемвлай эргым, тышке писынрак кондо!»9 Кугыжан вургемым чийыше Израиль кугыжа ден Иосафат, Иудан кугыжаже, Самарий ола капка воктенысе погынымо верыште шке престолыштышт шинченыт, а нунын ончылно пророк-влак шке пророк шомакыштым ойленыт.10 Седекий, Хенаана эрге, шкаланже кӱртньӧ тӱкӧ-шамычым ыштен да увертарен: «Тыге Господь ойла: нине тӱкӧ-влак дене сириян-шамычым ӧргет да нуным пытарет».11 Пророк-влак чыланат тидымак ойленыт: «Кай Галаадысе Рамоф ӱмбаке, тый тудым сеҥет! Господь тудым кугыжа кидыш пуа!»
12 Ӱжаш колтымо еҥ Михейлан каласен: «Пророк-влак чыланат кугыжалан ик йӱкын сайым гына ойлат. Тек тыйын шомакетат нунын шомакышт дене келшен толеш. Тыят сайым каласе».13 Михей вашештен: «Господь дене товатлем: мом мыйын Юмем каласа, тудым ойлем».
14 Михей кугыжа дек толын. Ахав тудын деч йодын: «Михей, мыланна Галаадысе Рамоф ӱмбаке сар дене каяш але уке?» Тудо кугыжалан вашештен: «Кайыза, тендам сеҥымаш вуча. Господь сириян-влакым тендан кидыш пуа».15 Но Ахав тудлан каласен: «Тыйым мыняр гана товатлен ойлыкташ? Господьын лӱмжӧ дене мылам чын деч молым ит ойло!»16 Тунам Михей манын: «Мый курыклаште шаланен пытыше израильтян-влакым ужым. Нуно кӱтӱчӧ деч посна коштшо шорыкла койыч. Господь тыге каласыш: ”Нунын озашт уке, тек кажныже тыныс дене мӧҥгыжӧ пӧртылеш”».17 Израиль кугыжа Иосафатлан ойлен: «Мый тылат шым каласе мо: тудо мыйын шотышто нигунамат сай пророк шомакым ок ойло, лач удам веле?!»
18 Тунам Михей каласен: «Господьын шомакшым колыштса. Мый престолышто шинчыше Господьым ужым. Тудын воктене, пурла да шола могырышто, кавасе сарзывий шоген.19 Господь йодо: ”Израиль кугыжа Ахав Галаадысе Рамофыш кайыже да тушан колыжо манын, кӧ тудым ондален наҥгая?” Икте иктым темлыш, весе – весым.20 Тунам ик шӱлыш лекте, Господь ончыко шогале да каласыш: ”Мый тудым ондалем”. Господь йодо: ”Кузе?”21 Тудыжо вашештыш: ”Мый каем да чыла пророкшын умшаштышт шояк шӱлыш лиям”. Господь каласыш: ”Тый тудым ондален кертат. Кай, ойлымет семынак ыште”.22 Тыгеракын, кызыт Господь пророк-влакетын умшашкышт шояк шӱлышым пыштен. А тыйын шотышто Господь сайым огыл каласен».
23 Тунам Седекий, Хенаана эрге, Михей деке лишемын, тудым совен да ойлен: «Господьын Шӱлышыжӧ мый дечем кораҥын да тыйын гоч кутыраш тӱҥалын мо?»24 Михей вашештен: «Тудо кечын, кунам ик пӧлем гыч весыш шылын куржталаш тӱҥалат, тый тидым пален налат».25 Тунам Израиль кугыжа каласен: «Кучыза Михейым да ола вуйлатыше Амон ден кугыжа эрге Иоас деке наҥгайыза.26 Тыге манза: ”Кугыжа тыге ойла: тиде еҥым казаматыш шындыза. Мыйын таза-эсен пӧртылмешкем, изишак кинде ден вӱдым пуыза”».27 Михей каласен: «Сар гыч таза-эсен пӧртылат гын, мыйын гоч Господь ойлен огыл!» Эше ешарен: «Тек тидым чылан колыт!»
28 Израиль кугыжа ден Иосафат, Иудан кугыжаже, Галаадысе Рамофыш каеныт.29 Израиль кугыжа Иосафатлан каласен: «Мыйым ынышт пале манын, вес вургемым чием да кредалмашыш ушнем, а тый кугыжа вургеманак код». Израиль кугыжа вес вургемым чиен, да нуно кредалаш тӱҥалыныт.30 А Сирий кугыжа орван сарзывий вуйлатышыже-влаклан тыге каласен улмаш: «Сарзывуй декат, тыглай сарзе декат ида пиж, ик Израиль кугыжа дене веле кредалза, лач ик Израиль кугыжа дене».31 Иосафатым ужын, орван сарзывий вуйлатыше-влак шоналтеныт: «Израиль кугыжа тиде». Ӱмбакше кержалташ манын, нуно тудым авыреныт. Но Иосафат полышым йодын кычкыралын, да Господь тудлан полшен – Юмо нуным Иосафат деч кораҥден.32 Тиде Израиль кугыжа огыл улмым ужын, вуйлатыше-влак Иосафат деч вес могырыш савырненыт.33 А ик сарзе пикшыжым чымалтарен да, шкежат тидым палыде, кӱртньӧ тувырышто улшо виш гоч Израиль кугыжам сусыртен. Кугыжа шке улазыжлан каласен: «Мӧҥгеш савырне да мыйым сӧй гыч лук – мыйым сусыртеныт».34 Но кредалмаш тиде кечын пеш чот талышнен. Израиль кугыжалан сириян-влак ончылно кас марте орваштыже кодаш логалын, да кече шичме годым тудо колен.
Глава 18