Выбрать язык
Книги Ветхого Завета
Книги Нового Завета
с русским текстом1 Тунам Дарий кугыжан кӱштымыж почеш Вавилонышто поянлыкым аралыме верыште улшо кагазгудым шергал лектыныт.2 Мидий кундемыште верланыше Экбатана оласе полатыште вӱдылка книгам муыныт. Тушто тыге возымо улмаш: «Шарныктыш возыш:3 Кир кугыжа икымше ий вуйлатымыж годым Иерусалимысе Юмын пӧрт шотышто тыгай кӱштымашым пуэн: тек тиде пӧрт, надырым кондымо вер, угыч чоҥымо лиеш, тек тудлан чоткыдо негызым пыштат. Тудын кӱкшытшӧ кудло кынергут да лопкытшо кудло кынергут,4 кум рат кугу кӱ дене оптымо лийже, вара ик рат – пырня дене. Роскотым тек кугыжан казна гыч тӱлат.5 А Юмын пӧртысӧ шӧртньӧ ден ший ате-ӱзгарым, кудым Навуходоносор Иерусалимысе храм гыч Вавилоныш наҥгаен, тек шке верышкышт, Иерусалимысе храмыш, пӧртылтат – тек нуно Юмын пӧртыштӧ вераҥдыме лийыт».
6 «Тугеже те, эҥер вес вел кундемтӧра Фафнай, Шефар-Бознай да ты кундемысе тӧра йолташда-влак, ты пашашке ида шӱшкылт,7 тиде Юмын пӧртым чоҥаш чаракым ида шынде. Тек иудей кундемтӧра ден иудей кугурак-влак тиде Юмын пӧртым ончычсо верыштыжак чоҥат.8 Мый дечем тыгай кӱштымаш лиеш: Юмын пӧртым чоҥымаште нине иудей кугураклан те полшышаш улыда – паша чарнен ынже шогал манын, нунылан кугыжан казна гыч, эҥер вес вел кундемыште погымо йозак гыч, оксам кызытак ойырыза.9 Чыла, мо кӱлешым: кавасе Юмылан йӱлалтен пуашлан ӱшкыжым, тагам але пачам, тыгак шыдаҥым, шинчалым, йошкар аракам да олив ӱйым – мом Иерусалимысе иерей-влак йодыт, тек кажне кечын жапым шуйкалыде пуэн шогат.10 Тек нуно кавасе Юмылан келшыше надырым кондат, кугыжа ден эргыж-влаклан эсен илышым йодын кумалыт.11 Мый тыгай кӱштымашым пуэм: иктаж-кӧ тиде пунчалым ок шукто гын, тек тудын пӧртшӧ гыч пырням луктыт, шкенжым нӧлталыт да тиде пырняшке пудалат, а пӧртшым шалатат.12 Иктаж-могай кугыжа але калык тиде пунчалым ок шукто да Иерусалимысе тиде Юмын пӧртлан зияным конда гын, тек Юмо, Кӧн лӱмжӧ тушто ила, нуным пытара. Мый, Дарий, тиде кӱштымашым пуэм. Тек тудо лачымын шуктымо лиеш».
13 Эҥер вес вел кундемтӧра Фафнай, Шефар-Бознай да нунын йолташышт чылажымат Дарий кугыжан кӱштымыж семын ыштеныт.14 Пророк Аггей ден пророк Захарийын, Адда эргын, шомакышт дене келшышын, иудей кугурак-шамыч чоҥымым умбакыже шуеныт, да пашашт воранен толын. Израиль Юмын да Персий кугыжа-влакын – Кирын, Дарийын, Артаксерксын – кӱштымышт почеш нуно чоҥымо пашам мучашке шуктеныт.15 Пӧртым адар тылзын кумшо кечыжлан, Дарий кугыжан кудымшо ий вуйлатымыж годым, чоҥен пытареныт.
16 Израиль эрге-влак – иерей, левит да плен гыч пӧртылшӧ моло еҥ – Юмын пӧртым куанен святитленыт.17 Тыгодым нуно надырлан шӱдӧ ӱшкыжым, кокшӱдӧ тагам, нылшӱдӧ пачам да, Израиль тукым чот дене келшышын, пӱтынь Израильын сулыкшылан надыр шотеш латкок казатагам конденыт.18 Моисейын книгаштыже возымо семынак, Иерусалимыште иерей ден левит пӧлка-влакым черет дене Юмылан служитлаш шогалтеныт.
19 Плен гыч пӧртылшӧ-влак Кугечым икымше тылзын латнылымше кечынже пайремленыт.20 Тиде жаплан иерей ден левит-шамыч эрныме йӱлам эртеныт улмаш. Нуно чыланат, икте кодде, йӱла почеш ару лийыныт. Левит-влак плен гыч пӧртылшӧ чыла еҥлан, шке иерей иза-шольыштлан да шкаланышт кугече пачам шӱшкылыныт.21 Кугече пачам плен гыч пӧртылшӧ израиль эрге-влакат, нунын дек ушнышо еҥ-шамычат кочкыныт. Израильын Господь Юмыжлан кумалаш манын, нунышт тысе калык-влакын йырнык пашашт деч кораҥыныт улмаш.22 Шергинде пайремым шым кече куанен пайремленыт. Вет Господь Юмышт нунылан куаным пуэн: Ассирий кугыжан шӱмжым нунын деке савырен, да тудыжо нунылан Израильын Господь Юмыжын пӧртшым чоҥаш полшен.
Глава 6