Библия
Выбрать язык
Книги Ветхого Завета
Книги Нового Завета
с русским текстом
ПСАЛТИРЬ
108 Псалом
Хор вуйлатышылан. Давидын псаломжо.1 Мыйын моктымо Юмем, шып ит лий!
2 Вет осал да ондалчык еҥ-влак умшаштым ӱмбакем кареныт,
мый денем шояк йылме дене кутырат.
3 Ужмышудымо мут-влакым чыла велым кышкат,
амал деч посна ӱмбакем кержалтыт.
4 Йӧратымемлан нуно мыйым титаклат,
а мый кумалам.
5 Порым ыштымемлан осал дене пӧртылтат,
йӧратымемлан ужмышудымаш дене тӱлат.
6 Тушманем ваштареш осал судьям шогалте,
а пурла велныже тек титаклыше лиеш.
7 Тек судышто тудо лектеш титаканыш,
тудын кумалмыже тек сулыклан шотлалтеш.
8 Илышаш кечыже кӱчык лийже,
тек тудын пашажым весе налеш.
9 Йочаж-влак кодышт тулыкеш,
ватыжат тек тулыкеш кодеш.
10 Перныл коштшо, кӱчызӧ лийышт йочаж-влак,
шаланен пытыше суртышт деч тораште тек нуно йодышт коштыт.
11 Кӱсын пуышо еҥ тудын мо улыжым чыла поген налже,
йот еҥ-влак тудын погыжым агышт.
12 Нигӧ тудын деке поро ынже лий,
тулык йочаж-влакым нигӧ ынже чамане.
13 Пытыже тудын тукымжо,
лӱмжӧ вес тукымыштак йомжо.
14 Тек шарналта Господь ача-кочаж-влакын осал пашаштым,
аважын сулыкшым ок мондо.
15 Тек сулыкышт эре Господь шинча ончылно лиеш,
а тиде тукым нерген шарнымашым
тек Тудо мландымбач ӱштыл кудалта.
16 Вет тиде еҥ порылыкым ончыкташ шонен огыл,
йорло ден незерым поктылын,
ойган еҥым пушташ шонен.
17 Йӧратен тудо каргымашым –
шкенжын ӱмбакшак каргымаш толеш,
келшен огыл тудлан суапландарымаш –
тудо ты еҥ деч тораште лиеш.
18 Тек каргымаш тудын вургемже лиеш,
вӱд семын кӧргышкыжӧ пура,
ӱй гае лулегышкыже вита.
19 Тек каргымаш эре чийыме вургемже,
кажне кечын ӱшталме ӱштыжӧ лиеш.
20 Тыге пӧртылтыжӧ Господь мыйым титаклыше,
мыйын ӱмбакем осалым ойлышо-влаклан!
21 Но мыйын верч, Господь Юмем, шке лӱметлан кӧра шогал,
вет Тыйын порылыкет кугу – мыйым утаре.
22 Мый йорло да незер улам,
шӱмемым сусыртеныт.
23 Мый кас ӱмыл гай йомам,
пуйто шурнышырчыкым мыйым налын кудалтат.
24 Пӱтым кучымо деч чытыра пулвуем,
капем пеш чот явыген.
25 Еҥ-влаклан лийынам мый мыскылтыш:
мыйым ужын, нуно вуйыштым рӱзат.
26 Полшо мыланем, Господь Юмем,
шке порылыкетлан кӧра мыйым утаре:
27 тек палат – тиде Тыйын кидет,
чыла тидым, Господь, Тый ыштенат.
28 Тек нуно каргат, а Тый суапландаре,
ваштареш шогалмышт нунылан тек вожылмашыш савырна,
а Тыйын тарзет тек куана.
29 Титаклышем-влак намыс дене леведалтышт,
вожылмаш тек нунын вургемышт лиеш.
30 А мый Господьым чот мокташ тӱҥалам,
шуко еҥ коклаште Тудым чапландарем.
31 Вет Тудо незер еҥын пурла могырыштыжо шога,
пушташ шонен судитлыше-влак дечын тудым утара.
Тау
Глава 108
