Библия
Выбрать язык
Книги Ветхого Завета
Книги Нового Завета
с русским текстом
ПСАЛТИРЬ
79 Псалом
1 Хор вуйлатышылан. «Лилий-влак» семлан возымо. Асафын таныклымыже. Псалом.2 Колышт мемнам, Израильын Кӱтӱчыжӧ,
кӱтӱ семын Иосифым Вӱдышӧ!
Волгалт лишем, херувим-влак ӱмбалне Шинчыше!
3 Ончыкто шке виетым Ефрем, Вениамин да Манассий ончылно,
тол утараш мемнам.
4 Юмына, мемнам угыч йол ӱмбак шогалте!
Тек чуриет мемнам волгалтара, да ме утарыме лийына!
5 Господь Юмо Саваоф,
калыкетын кумалмыжлан мыняр эше шыдешкаш тӱҥалат?
6 Тый нунылан шинчавӱд киндым пукшенат,
пеш шуко шинчавӱдым йӱктенат.
7 Пошкудына-влак мемнан мландынам тавалат,
тушман-влаклан ме воштылчык улына.
8 Саваоф Юмо, мемнам угыч йол ӱмбак шогалте!
Тек чуриет мемнам волгалтара, да ме утарыме лийына!
9 Египет гыч Тый виноград вондым конденат,
поктен колтен калык-влакым, тудым шынденат,
10 эрыктенат тудлан верым.
Тудо вожым колтен, мланде мучко шарлен.
11 Тудын ӱмылжӧ курык-влакым леведын,
укшыж-влак Юмын кедр гай лийыныт.
12 Шарлен тудын укшыжо теҥыз марте,
игыж-влак эҥер
*а дек шумеш шуыныт.
13 Молан шалатенат тудым авырыше пырдыжым?
Кажне эртен кайыше ынде саскажым кӱрыштеш!
14 Тудым ир сӧсна пургедеш, янлык кочкеш.
15 Саваоф Юмо, савырне, ончал пылпомыш гыч,
тиде виноград вондетым толын ончал!
16 Шке кидет дене шындымым,
вияҥден куштымо игетым арален кодо.
17 Тудо тул дене йӱлалтыме, пӱчкедыме...
Тек Тыйын шыдет деч тушман-влак пытат!
18 Пурла велнет улшо айдеме эргым,
кӧм Тый Шкаланет виян тарзым ыштенат,
тек Тыйын кидет арален шога.
19 Ме Тый дечет огына кораҥ!
Иландаре мемнам, ме Тыйын лӱметым ӱжаш тӱҥалына!
20 Господь Юмо Саваоф,
мемнам угыч йол ӱмбак шогалте!
Тек чуриет мемнам волгалтара, да ме утарыме лийына!
*а 79:12 «Эҥер» – Тыште Евфрат нерген ойлалтеш.
Глава 79
