Библия
Выбрать язык
Книги Ветхого Завета
Книги Нового Завета
с русским текстом
ПРОРОК ИСАИЙЫН КНИГАЖЕ
52 Глава
1 Тек Сион куана. 13 Господьын орланыше Тарзыже.1 Кынел, кынел, вий-куатет дене вӱдылалт, Сион!
Чапле вургемет чие, святой Иерусалим ола!
Пӱчдымӧ, ару огыл еҥ уремлаштет тетла кошташ ок тӱҥал.
2 Пленыш налме Иерусалим,
пуракым ӱмбачет почкалте да кынел!
Пленыш налме Сион ӱдыр,
шӱет гыч шинчырым кудаш!
3 Тыге ойла Господь: «Тендам яра ужаленыт,
ший деч поснак тӱлен налме лийыда».
4 Тыге Господь Юмо ойла:
«Мыйын калыкем ончыч Египетыш каен да тушто илен,
вара нимолан огыл тудым Ассирий шыгыремдылын.
5 А кызыт Мый тыште мом ужам? – ойла Господь.
Мыйын калыкемым яра налыныт,
вуйлатышыже-влак ойгырен шортыт, – ойла Господь. –
Мыйын лӱмем эре, кажне кечын, мыскылымаште.
6 Сандене Мыйын калыкем Мыйым палаш тӱҥалеш,
тудо кечын тудо пален налеш:
Мый Тудак улам, Кӧ каласен: ”Теве Мый улам!”»
7 Могай сай улеш курыклаште тыныслык нерген увертарыше
да поро уверым кондышо еҥын толмыжо –
тудо куанле уверым конда,
утарымашым увертара да Сионлан ойла:
«Тыйын Юмет кугыжаланаш тӱҥалын!»
8 Колышт! Орол-влакет йӱкыштым кугемденыт,
нуно куанен кычкырат –
Господьын Сионыш пӧртылмыжым
нуно шке шинчашт дене ужыт.
9 Иерусалимын шалатыме верлаже,
куанен йывыртыза, мурыза!
Вет Господь шке калыкшым лыпландарен,
Иерусалимым сулен налын!
10 Чыла калык ончылно Господь святой вий-куатшым ончыктен,
да мландын чыла тӱржӧ Юмынан утарымашыжым ужеш.
11 Кайыза, кайыза Вавилон гыч, тушечын лекса!
Ару огыл деке ида тӱкнӧ!
Лекса тушечын, шкендам эрныктыза,
Господьын атыже-влакым нумалше-шамыч!
12 Но корныш те содор огыда лек, огыда курж,
вет тендан ончылно Господь кая,
Израильын Юмыжо шеҥгечда аралтыш лиеш.
13 «Мыйын Тарзем ворана,
Тудо моткоч кӱшкӧ нӧлталтеш да чаплана!
14 Шукынжо, Тудым ужын, лӱдын колтеныт:
Тудым туге чот кыреныт – нимогай айдеме сынже кодын огыл,
койын огыл Тудо айдеме эргыла.
15 Но Тудо шуко калыкым ӧрмашыш пурта,
кугыжа-влак Тудын ончылно умшаштым петырат.
Вет мом нунылан ойлен огытыл, шке шинчашт дене ужыт,
мом ондак колын огытыл, нуно умылат».
Глава 52
