Библия
Выбрать язык
Книги Ветхого Завета
Книги Нового Завета
с русским текстом
ПРОРОК ИСАИЙЫН КНИГАЖЕ
53 Глава
Господьын Тарзыжын орланымыже да чапланымыже.1 [Господь!] Мемнан каласымылан кӧ ӱшанен,
Господьын вий-куатше кӧлан почылтын?
2 Господь ончылно Тудо иге семын лектын,
кукшо мланде гыч одар семын нӧлталтын.
Лийын огыл Тудын мотор сынжат, кугулыкшат –
ме Тудын ӱмбак онченна,
но Тудын тӱсыштыжӧ мемнам Шкеж дек савырыше нимо лийын огыл.
3 Еҥ-влак Тудым шотлен огытыл, лийын Тудо кӱлдымыш лукмо –
орлык ден черым пален налше айдеме,
ме шке чурийнам Тудын деч савыренна.
Тудым шотлен огытыл, ме Тудым нимоэш шынденна.
4 Но Тудо мемнан орлыкнам нумалын,
мемнан чернам Шке ӱмбакше налын.
А ме шоненна: Тудым Юмо перен,
мут кучаш шогалтен, орланаш пуэн.
5 Но Тудо сулыкна верч сусыртымо лийын,
титакна верч Тудым индыреныт.
Мемнан верч Тудым наказатленыт –
тидыже мыланна тынысым конден,
Тудын сусыржо дене ме паремынна.
6 Чылан ме шорык семын йомын коштынна,
кажныже шке корныж дене каен,
но чыла сулыкнам Господь Тудын ӱмбакыже пыштен.
7 Тудым орландареныт, индыреныт,
но Тудо умшажымат почын огыл.
Шӱшкылаш наҥгайыме пача семын,
тӱредше ончылно йӱкым лукдымо шорык семын
Тудат шке умшажым почын огыл.
8 Тудым руалтен кученыт, судитленыт да вӱден наҥгаеныт.
Тудын тукымжо нерген кӧ умылтара?
Илыше-влакын мландышт гыч Тудо налме лийын,
калыкемын сулыкшо верч Тудым пуштыныт.
9 Осал еҥ-влак пелен Тудлан шӱгарым палемденыт,
но поянын шӱгарыштыже тоеныт.
Вет Тудо нимогай осалым ыштен огыл,
умшаштыже шояк мут лийын огыл.
10 Но Тудым индыраш, орлыклан пуаш
Господьын кумылжо улмаш.
Кунам Тудын илышыже сулык верч надыр лиеш,
Тудо ончыкылык тукымжым ужеш да кужун илаш тӱҥалеш,
Тудын гоч Господьын кумылжо шукталтеш.
11 Орлыкшо деч вара Тудо илыш волгыдым ужеш да куана.
Тудо – Чын ыштыше, Мыйын Тарзем –
Тудым пален налме гоч шукыштым чыныш луктеш
да нунын сулыкыштым Шке ӱмбакше налеш.
12 Сандене Мый Тудлан лӱмлӧ-влак коклаште ужашым пуэм,
поген налме поянлыкым Тудо виян-шамыч дене пайла.
Вет Тудо Шкенжым колымашлан пуэн,
законым пудыртышылан шотлалтын,
а Тудо шуко еҥын сулыкшым Шке ӱмбакше налын
да титакан-влак верч кумал шогышо лийын.
Глава 53
