Выбрать язык
Книги Ветхого Завета
Книги Нового Завета
с русским текстом1 Иуда кугыжа Седекийын луымшо ий вуйлатымыж годым Иеремийлан Господь деч шомак лийын. Навуходоносор тунам латкандашымше ий вуйлатен.2 Вавилон кугыжан сарзывийже Иерусалимым авырен налын улмаш, а пророк Иеремий Иуда кугыжан полат пеленысе орол кудывечыш петырыме лийын.3 Седекий, Иуда кугыжа, тудым тушко петырымыж годым каласен улмаш: «Молан тыге пророклен ойлет: ”Тыге ойла Господь: мый тиде олам Вавилон кугыжа кидыш пуэм, тудо олам сеҥен налеш.4 Иуда кугыжа Седекият халдей-влакын кидышт деч ок утло. Тудо Вавилон кугыжа кидыш логалеш, тудын дене шинчаваш вашлийын кутыраш тӱҥалеш.5 Кугыжа Седекийым Вавилоныш наҥгая, тудыжо тушто Мыйын наказатлымешкем лиеш, – ойла Господь. Халдей-влак ваштареш кредалаш тӱҥалат гын, кырен шалатыме лият”».
6 Иеремий каласен: «Мыланем Господь деч тыгай шомак лийын:7 Тый декет Анамеил, Шаллум чузаетын эргыже, толеш да каласа: ”Нал Анафофысо пасуэм, вет тый тукымым аралыше родем улат, тый тудым тӱлен налшаш улат, тидлан кертыжет*а уло”».8 Господьын каласымыж семынак, мый декем орол кудывечыш чузаемын Анамеил эргыже толын да каласен: «Нал Вениамин мландысе Анафофышто улшо пасуэм, вет тый тудын озаже лийшаш улат, тудым тӱлен налаш кертыжет уло. Нал тудым шкаланет!» Тунам мый умыленам: тиде шомак Господь деч лийын.9 Мый чузаемын Анамеил эргыж деч Анафофысо пасужым налынам, тудлан латшым сикль шийым висен пуэнам.10 Мый тидым кагазыш серенам да печать дене петыренам, таныклыше-влакым ӱжынам да виса дене шийым висенам.11 Вара мый ужалыме-налме нерген возымо кок кагазымат – печать дене петырымым да петырыдымым – налынам, тушто чыла лончылен возымо лийын.12 Мый нуным чузаемын Анамеил эргыжын шинча ончылныжо, тыгак тиде кагазыш шке кидыштым пыштыше таныклыше-влакын да орол кудывечыште шинчыше Иуда тукым еҥ-шамычын шинча ончылнышт Варухлан, Нирийын эргыжлан, Масейын уныкажлан, пуэнам.13 Нунын шинча ончылнышт мый Варухлан кӱштен каласенам:14 «Тыге ойла Господь Саваоф, Израильын Юмыжо: ужалыме-налме нерген кагазым – печать дене петырымым да петырыдымым – нал да шун атыш пыште, тек тудо тушто кужу жап аралалтеш.15 Вет Господь Саваоф, Израильын Юмыжо, тыге ойла: пӧрт, пасу да виноград аҥа-влакым тиде мландыште угыч тӱлен налаш тӱҥалыт».
16 Варухлан, Нирий эргылан, ужалыме-налме нерген кагазым пуымеке, мый Господьлан тыге кумалынам:17 «О, Господь Юмем! Кугу куатет дене, нӧлталме кидет дене Тый кава ден мландым ыштенат, Тылат нимо ыштен кертдыме уке!18 Тӱжемле еҥлан Тый порылыкым ончыктет, но ача-коча-влакын сулыкыштлан йочаштым мут кучаш шогалтет. О, кугу да виян Юмо, лӱмет Тыйын – Господь Саваоф!19 Мом шонен пыштымет – кӱдыратле, Тыйын пашат – куатан. Тый айдеме эрге-влакын коштмо корныштым ужат, кажныжлан мом ыштымыже почеш, пашажын саскаже почеш пӧртылтет.20 Ӧрыктарыше паша ден палдарыше пале-влакым Египет мландыште ыштенат, таче кече мартеат Тый нуным Израильыште да айдеме-влак коклаште ыштен шогет – Тый шке лӱметым чапландаренат, таче кечынат тидыже тыгак!21 Шке Израиль калыкетым Тый Египет гыч ӧрыктарыше пале ден палдарыше пале-влак дене, кӱш нӧлталме виян кид дене луктынат. Тидым ужын, чылаштым лӱдмаш авалтен.22 Ача-кочаштлан товатлен сӧрымӧ семынак, Тый нунылан тиде мландым, шӧр да мӱй йогыман мландым, пуэнат.23 Нуно толыныт да тушто озаланаш тӱҥалыныт, но Тыйын йӱкетым колыштын огытыл, законет почеш илен огытыл. Ышташ кӱштыметым нуно шуктен огытыл, сандене нунын ӱмбак Тый чыла нине туткарым колтенат.24 Теве, олам руалтен налаш манын, мланде кӱкшака-влакым нӧлтат. Керде, шужымаш да шучко черлан кӧра тиде ола мемнан ӱмбак кержалтше халдей-влак кидыш пуымо лиеш. Мом Тый каласенат, тиде шукталтеш, тидым Тый ужат.25 А Тый, Господь Юмем, мыланем ойлет: ”Шийым тӱлен, шкаланет пасум нал да таныклыше-влакым ӱж”. Но вет тиде ола халдей-влаклан пуымо лиеш!»
26 Тунам Иеремийлан Господьын шомакше лийын:27 «Мый Господь, чыла илыше-влакын Юмышт улам. Мыланем иктаж-мо ыштен кертдыме уло мо?28 Тыге ойла Господь: Мый тиде олам халдей-влакын да Вавилон кугыжа Навуходоносорын кидышкышт пуэм. Кугыжа тудым сеҥен налеш.29 Олам авырен налше халдей-влак тушко пурат да тулым чыкат. Олам, пӧрт-влакым нуно пӱтынек йӱлалтат – нунын леведыш ӱмбалнышт Вааллан тӱтыреныт, йот юмо-влаклан йошкар арака надырым конденыт да тидын дене Мыйым шыдештареныт.30 Вет Израиль ден Иуда калык самырыкышт годсекак Мыйын шинча ончылнем эре осалым ыштеныт. Израиль калык шке пашаж дене Мыйын шыдем веле луктын, – ойла Господь. –31 Чоҥен пытарыме гыч тачысе кече марте тиде ола Мыйын кугу шыдем луктын шоген, сандене Мый тудым шке чурий ончычем пытарем.32 Израиль ден Иуда калык чыла осал пашашт дене Мыйын шыдем луктыныт – нуно шкешт, нунын кугыжа ден онышт, иерей ден пророкышт, тыгак Иуда мландыште да Иерусалимыште илыше-влак.33 Нуно Мый декем чурийышт дене огыл, а тупышт дене савырненыт. Мый нуным угыч да угыч туныктенам, но нуно колыштын огытыл, туныктымем ӧрдыжыш шӱкалыныт.34 Мыйын лӱмем дене лӱмдымӧ пӧртым шакшылен, тушан йырнык юмышт-влакым шогалтеныт.35 Шке эрге ден ӱдырыштым Молохлан йӱлалташ манын, Енном лапверыште Вааллан кумалме верлам чоҥеныт. Тидым ышташ Мый нунылан кӱштен омыл. Тыгай йырныкым ыштен, Иуда калыкым сулыкыш пуртат манын, Мыйын ушышкемат возын огыл.
36 Тиде ола нерген те ойледа: ”Тудо керде, шужымаш да шучко черлан кӧра Вавилон кугыжа кидыш пуымо лиеш”. Но Господь, Израильын Юмыжо, тыге ойла:37 ”Чыла эл гыч, кушко чот сырымем дене, пеш кугу шыдем дене поктен колтенам, Мый нуным погем да тиде верыш пӧртылтем, нунылан тыныс илышым пуэм.38 Нуно Мыйын калыкем лийыт, а Мый нунын Юмышт лиям.39 Чыла кечылаштышт Мый дечем лӱдын илышт манын, нунылан ик шӱм ден ик корным пуэм – тунам нунын дене, йоча-уныкашт дене чыла сай лиеш.40 Мый нунын дене курымаш ойпидышым ыштем: нунын деч ом кораҥ, а порым ышташ тӱҥалам, шӱмышкышт Мый дечем лӱдмашым пыштем, да нуно Мый дечем огыт кораҥ.41 Уло шӱм-чонем дене Мый нунылан куанаш, порым ышташ тӱҥалам, тиде мландыш нуным эрелан вераҥдем”.
42 Тыге ойла Господь: ”Кузе Мый тиде калык ӱмбак нине кугу ойгым колтенам, тугак нунылан сӧрымӧ чыла суапым колтем.43 Тиде мландын пасужо-влакым угыч налаш тӱҥалыт – тудын нерген те ’тиде ир мланде, тушто еҥат, вольыкат уке, тудым халдей-влак кидыш пуымо’ манын ойледа.44 Пасу-влакым шийлан налаш да ужалыме-налме нерген кагазым возаш, печать дене петыраш да таныклыше-влакым ӱжаш тӱҥалыт – тыге лиеш Вениамин мландыште, Иерусалим йыр улшо илемлаште, Иуда мландысе чыла олаште, курыкласе олалаште, тӧрверысе да кечывалвел мландысе олалаште. Мый нуным плен гыч пӧртылтем!” – ойла Господь».
*а 32:7 Кертыж – право.
Глава 32