Выбрать язык
Книги Ветхого Завета
Книги Нового Завета
с русским текстом1 Кунам Иеремий эше орол кудывечыштак улмаш, тудлан кокымшо гана Господьын шомакше лийын:2 «Тыге ойла Господь, Кӧ мландым ыштен, Кӧ тудым калыплен да пеҥгыдемден, Кӧн лӱмжӧ – Господь:3 Мыйым ӱжын кумал – Мый тылат вашештем, пеш кугум да ӧрыктарышым увертарем, могайжым тый от пале.4 Тиде олан пӧртлаже да Иуда кугыжа-влакын полатышт мланде кӱкшакам нӧлталаш да авырен налше-влак деч аралалташ манын, шалатыме лийыт. Нунын нерген Господь, Израильын Юмыжо, тыге ойла:5 олаште илыше-влак халдей-шамыч дене кредалыт, но чыла вере нунын колышо капышт кияш тӱҥалеш – нуным Мый чот сырымем дене, пеш кугу шыдем дене пытарем. Вет чыла осал пашажлан Мый тиде ола деч шке чурием шылтенам.
6 Но Мый олалан тазалык ден пареммашым пуэм, шке калыкем паремдем, тудлан ласка да тыныс илышым пӧлеклем.7 Иуда ден Израильым плен гыч пӧртылтем, нуным ончычсо гайым ыштем.8 Нуно Мыйын ончылнем сулыкым ыштеныт да Мый дечем кораҥыныт, но Мый нуным сулыкышт деч эрыктем, осал пашаштым кудалтем.9 Тиде олан лӱмжӧ Мыланем куаным, мландымбалысе чыла калык ончылно моктымаш ден чапым конда. Мый тиде олалан могай суапым ыштем, нуно колыт. Тудлан могай сайлыкым ыштымем да эсен илышым пуымем нерген пален налмеке, нуно лӱдын чытыраш тӱҥалыт.
10 Тыге ойла Господь: тиде вер нерген те ойледа: ”Тудо пуста, еҥ-влак ден вольык деч посна”. Но тушто – Иуда мландын пустаҥдыме олалаштыже, Иерусалимын уремлаштыже, кушто илыше еҥат, вольыкат кодын огыл, –11 угыч куан ден веселитлыме йӱк, каче ден оръеҥ йӱк шокташ тӱҥалеш. Тыште Господьын пӧртышкыжӧ тауштымо надырым кондышо да тыге ойлышо-влакын йӱкышт шергылташ тӱҥалеш: ”Господь Саваофым моктыза – Тудо поро, порылыкшо Тудын курымеш!” Мый тиде мланде гыч пленыш наҥгайыме-влакым пӧртылтем, – ойла Господь.
12 Тыге ойла Господь Саваоф: тиде пуста верыште, кушто айдемат, вольыкат кодын огытыл, чыла нине ола воктене угыч кӱтӱчӧ омаш-влак лийыт, тушто кӱтӱчӧ-шамыч кӱтӱшт дене канаш тӱҥалыт.13 Курыкласе олалаште, тӧрверысе да кечывалвел мландысе олалаште, Вениамин тукым мландыште, Иерусалим йыр улшо илемлаште, Иудан олалаштыже шотлышо еҥын кидше йымач угыч кӱтӱ-влак эрташ тӱҥалыт, – ойла Господь.
14 Теве кече-влак толыт, – ойла Господь, – кунам Мый Израиль ден Иуда тукым шотышто сӧрымӧ поро шомакем шуктем.15 Тудо кечылаште, тудо жапыште Мый Давид тукым гыч чын ыштыше Игым куштем, Тудо мландымбалне чын суд ден чын пашам ышташ тӱҥалеш.16 Тудо кечылаште Иуда утарыме лиеш, Иерусалим тыныслын илаш тӱҥалеш. Теве Тудын лӱмжӧ: ”Господь – мемнам чыныш лукшына!”»17 Вет Господь тыге ойла: «Давид тукым еҥ Израиль престолышто эре шинчаш тӱҥалеш.18 А левит-иерей-влак Мыйын ончылнем йӱлалтен пуымо надырым, кинде надырым да моло надырым эре кондаш тӱҥалыт».
19 Иеремийлан Господьын шомакше лийын:20 «Тыге ойла Господь: Мый кече да йӱд дене ойпидышым ыштенам, нунылан кӱштымашым пуэнам, да нуно шке жапыштышт толыт. Кузе те тиде ойпидышем пудыртен огыда керт,21 тугак Давид тарзем дене ыштыме ойпидышемат пудырташ ок лий, тукымжо тудын престолыштыжо эре кугыжаланаш тӱҥалеш, тыгак Мыланем служитлыше левит-иерей-влак денат ыштыме ойпидышем пудыртымо ок лий.22 Кузе кавасе шӱдыр-влакым шотлаш да теҥыз серысе ошмам висаш ок лий, туге Мый Давид тарземын тукымжым да Мыланем служитлыше левит-влакым шукемдем».
23 Иеремийлан Господьын шомакше лийын:24 «От уж мо? Нине еҥ-влак ойлат: ”Ойырен налме кок тукымжо деч Господь кораҥын!” Нуно Мыйын калыкем огыт шотло, эсогыл тудым калыкеш огыт уж.25 Тыге ойла Господь: кузе Мый кече да йӱд дене ойпидышым ыштенам, кава ден мландылан законым пуэнам,26 тугак Мый Иаков ден Давид тарземын тукымышт деч ом кораҥ – Авраам, Исаак да Иаков тукымын вуйлатышыже-влакым Мый Давидын тукымжо гыч ойырен налам. Мый шке калыкем серлагем, плен гыч пӧртылтем».
Глава 33