Выбрать язык
Книги Ветхого Завета
Книги Нового Завета
с русским текстом1 Моав шотышто Господь Саваоф, Израильын Юмыжо, тыге ойла:
«Ойго Неволан, тудо пустаҥдыме лиеш!
Лиеш Кириафаим намыслыме, руалтен налме,
Мизгав намыслыме, шалатыме лиеш.
2 Уке тетла Моавын чапше,
Есевонышто тудлан осалым шонат:
”Каена, калык-влак кокла гыч тиде калыкым пытарена!”
Мадмен, тыят пытет, вет почешет керде кая.
3 Хоронаим гыч варгыжме йӱк солна,
тушто – кугу пытарымаш, пустаҥдымаш.
4 Моавым кырен шалатеныт,
тудын йочаже-влак шортыт.
5 Лухит тайыл дене шортын-шортын кӱзат,
Хоронаимыш йӧсын кычкырен волат.
6 Куржса, илышдам утарыза,
кукшо мландыште шогышо лӱмегож гай лийза!
7 Вет те паша ден поянлыкланда инаненда,
садлан тендамат кучат.
Онаеҥ да онжо-влак дене пырля Хамосым*а пленыш наҥгаят.
8 Кажне олашке пустаҥдыше толеш,
ик олат ок утаралт.
Господьын каласымыж семынак,
лапвер пыта, тӧрвер пустаҥеш.
9 Пуыза Моавлан шулдырым –
тек тудо чоҥештен кая,
вет олаже-влак пустаҥыт,
илыше-шамыч тушто огыт лий.
10 Каргыме тудо еҥ, кӧ Господьын пашажым кӱлеш семын ок ыште!
Каргыме тудо, кӧ шке кердыж дене вӱрым ок йоктаре!
11 Самырык годсек Моав ласкан илен,
пленыш тудым наҥгаен огытыл.
Лийын тудо кучаж ӱмбалнысе йошкар арака гай,
ик ате гыч весыш тудым темкален огытыл,
садлан тамже ончычсо гаяк кодын,
пушыжо вашталтын огыл.
12 Но жап шуэш, – ойла Господь, –
кунам Мый тудын дек аракатемкалыше-влакым колтем.
Нуно тудым йоктарат, атыже-влакым ярам кодат,
кувшинже-влакым шалатат.
13 Кузе Израиль инанен илыме Вефильжылан кӧра вожылмашке пурен,
тугак Хамослан кӧра Моав вожылмашке пура.
14 Кузе те ойлен кертыда:
”Ме сарзе, кредалмаште лӱддымӧ да тале улына”?
15 Моавым пустаҥдат, олаже-влакым сеҥен налыт,
эн сай самырык пӧръеҥыштым шӱшкылыт, –
ойла Кугыжа, лӱмжӧ Тудын Господь Саваоф.
16 Моавын пытымашыже лишне,
тудын деке ойго вашка.
17 Чыла пошкудыжо да тудын лӱмжым палыше-влак,
тудын шотышто мӱгырен шортса!
Каласыза: ”Тудын кучемвий тояже шаланен,
чап ден куатше пытеныт!”
18 Дивонышто илыше-влак,
чап кӱкшыт гыч волыза
да кошкышо мландышке шичса,
вет Моавым пустаҥдыше тендан деке толеш
да чоткыдемдыме ола-влакдам шалата.
19 Ароерыште илыше-влак,
корно воктеке шогалза да ончыза,
кажне куржшо пӧръеҥ ден утаралтше ӱдырамаш деч йодса:
”Мо лийын?”
20 Моавым намысыш пуртеныт, тудым сеҥеныт!
Шортса, варгыжса,
Моавым пустаҥдыме нерген Арнон серлаште увертарыза.
21 Суд толын тӧрверлашке –
Холон ден Яацыш, Мофафыш,
22 Дивон ден Невош, Бет-Дивлафаимыш,
23 Кириафаим ден Бет-Гамулыш, Бет-Маоныш,
24 Кериоф ден Восораш,
Моав мландын умбалне да лишне улшо кажне олашкыже.
25 Моавын тӱкыжым руал кудалтыме,
кидшым пудыртымо, – ойла Господь. –
26 Руштмешкыже тудым йӱктыза,
вет тудо Господь ончылно шкенжым кӱшкӧ нӧлтен.
Тек Моав шке укшинчышыштыже пӧрдалеш,
тек шкеже воштылчык лиеш.
27 Израиль тыланет, Моав, воштылчык лийын огыл мо?
Израильым вор семын кученыт мо?
Молан тый, кажне гана тудын нерген мутым лукмеке, вуетым рӱзет?
28 Моавыште илыше-влак,
оладам коден кайыза да кӱ курык коклаште илыза,
курыкоҥышто пыжашым ыштыше ир кӧгӧрчен гай лийза.
29 Колынна ме Моавын шкенжым кугуэш ужшо,
чот моктаныше да коштан улмыжо нерген,
тырга да сӱрза, кугешныше шӱман улмыж нерген.
30 Палем Мый, – ойла Господь, – тудын сӱрзалыкшым,
но моктанымыже – яра шомак, ок ыште тудо нимомат.
31 Садлан Мый Моав верч шортам,
пӱтынь Моав верч кугу йӱкын магырем,
Кирхаресын еҥже-влак верч ойганем.
32 Сивмасе виноград аҥа-влак,
кузе мый Иазер верч шортынам,
тыгак тендан шотышто шортам.
Укшет-влак теҥыз велыш шуйналтыныт,
Иазер теҥыз*б деке шуыныт.
Пустаҥдыше кержалтын смоква саскат ӱмбаке,
кӱын шушо виноградым кӱрыштеш.
33 Моавын сад-пакчан мландыже
куан да веселалык деч посна кодын.
Виноград вӱдым темден лукмо верлаште
йошкар аракам ыштымылан Мый мучашым пыштем –
нигӧ тушто виноградым куан йӱк дене ок тошко.
Кычкырыме йӱк шокта, но тудо куанле огыл!
34 Есевон гыч варгыжме йӱк Елеал да Яац марте шокта,
Сигор гыч кычкырыме йӱк Хоронаим да Кумшо Эгла марте солна,
эсогыл Нимрим вӱд кошка.
35 Кӧ Моавысе кӱкшакалаште надырым конда
да тудын юмыжлан тӱтыра,
Мый чылаштым пытарем, – ойла Господь. –
36 Садлан Моав верч, Кирхаресыште илыше-влак верч
Мыйын шӱмем шиялтыш семын шортеш,
вет нунын погымо поянлыкышт йомын.
37 Вуйышт нӱжымӧ, пондашышт пӱчмӧ,
чылаштын кидышт коркалыме,
ӱмбалнышт – чоштыра вургем.
38 Моавысе кажне леведыш ӱмбалне,
кажне уремыште шортмо йӱк шокта,
вет Мый Моавым кӱлдымӧ ате семын шалатенам, – ойла Господь.
39 Шортын ойлаш тӱҥалыт: ”Тудо шалатыме!
Моав намысыш пурен, чурийжым шылтен!”
Чыла пошкудыжлан Моав воштылчыкыш, лӱдыктышыш савырнен!
40 Тыге ойла Господь:
арыслангайык семын тушман чоҥештен толеш,
Моав ӱмбалне шаралта шке шулдыржым.
41 Ола-влак сеҥен налме лийыт,
карман-влакым налыт руалтен.
Тудо кечын моав сарзын шӱмжӧ
азам ыштыше ӱдырамашын гай чытыраш тӱҥалеш.
42 Калык-влак кокла гыч Моав пытарыме лиеш,
вет тудо Господь ончылно шкенжым кӱшкӧ нӧлтен.
43 Шучкылык, вынем да оптыш
вучат тыйым, Моав калык, – Господь ойла.
44 Кӧ шучкылык деч куржеш – вынемыш камвозеш,
а кӧ вынем гыч лектеш – оптышыш логалеш.
Нине туткарым Мый Моав ӱмбаке
мут кучыктымо ийын колтем, – ойла Господь.
45 Куржшо-влакын вийышт лунчырген,
нуно Есевонын ӱмылышкыжӧ шогалыныт,
но Есевон гыч тул лектын,
Сигонын полатше гыч – тулйылме,
тудо Моавын саҥгажым,
вуянче калыкын вуйлепшым йӱлалта.
46 Ойго тыланет, Моав!
Пытен Хамосын калыкше,
вет эргыч-влакым пленыш налыныт,
ӱдырет-шамычым поктен наҥгаеныт.
47 Но жап эртымеке, Моав калыкым Мый пӧртылтем, –
ойла Господь».
Тидын дене Моавым судитлыме шомак мучашлалтеш.
*а 48:7 Хамос – моав-влакын юмышт.
*б 48:32 Иазер теҥыз – Шинчалан теҥыз.
Глава 48