Библия
Выбрать язык
Книги Ветхого Завета
Книги Нового Завета
с русским текстом
ПРОРОК ОСИЙЫН КНИГАЖЕ
10 Глава
Израиль кугыжанышлан Господь мучашым ышта.1 Израиль – ладыра виноград,
тудо шуко саскам конден.
Мыняр шукырак саскаже лийын,
тунар шукырак жертвенник-влакым чоҥен,
мыняр сайрак мландыже лийын,
тунар чотрак онакӱ-влакым сӧрастарен.
2 Израильтян-влакын шӱмышт – кок тӱран кӱзӧ,
сандене нуно мут кучаш шогалтыме лийыт.
Господь жертвенникышт-влакым шалата,
онакӱшт-шамычым пытара.
3 Нуно тыге каласат:
«Мемнан кугыжана уке,
вет ме Господь деч лӱдын огынал.
Кугыжана лиеш гынат,
мом тудо мыланна ышта ыле?»
4 Яра шомакым нуно ойлыштыт,
ондален товатлат, ойпидыш-влакым ыштат,
сандене куралме пасушто аяран шӱкшудо лекме семын
ӱмбакышт суд толеш.
5 Самарий калык Беф-Авенысе ӱшкыж юмыж верч чытыра,
тудын шотышто ойгыра –
ӱшкыжлан ончыч куаныше онаеҥ-влак ынде шортыт,
вет тудыжо чап деч посна кодеш.
6 Ӱшкыжым Ассирийыш наҥгаят,
Иарев кугыжалан пӧлеклат.
Ефрем намысыш пура,
мом ышташ шонымыжлан Израиль вожылтарыме лиеш.
7 Самарийын кугыжаже пыта,
вӱд ӱмбалнысе шоҥ гай йомеш.
8 Авенысе кумалме вер-влак пытарыме лийыт,
вет тушто Израиль сулыкыш пурен.
Жертвенник-шамыч ӱмбалне
шуанвондо ден коршаҥге кушкын шогалыт.
Нуно курык-влаклан каласат: «Мемнам леведса»,
кӱкшака-влаклан: «Ӱмбакна камвочса».
9 «Гива годсо жап гыч тӱҥалын,
тый, Израиль, сулыкым ыштен шогенат,
тачат тыгаяк улат.
Гиваште осал еҥ-влак ваштареш кайыше сар тыйым тӱкен огыл.
10 А кызыт Мый Израильым угыч мут кучаш шогалтынем:
ваштарешыже калык-влак погынат,
да тудо кок сулыкшыланат кылдыме лиеш.
11 Ефрем – туныктымо туна,
шурным шияш йӧратыше,
кӱжгӧ шӱйышкыжӧ омытам Мый Шке чиктем.
Ефремым Мый кычкем –
Иуда куралаш, а Иаков тырмалаш тӱҥалыт.
12 Чынлыкым ӱдыза, тунам порылыкым тӱредыда.
Шке сӧрем мландыдам куралза,
вет Господьым кычалме жап толын шуын –
Тудо толеш да ӱмбакыда чынлыкым йӱр семын йоктара.
13 Но те осалым курал-ӱденда,
садлан чындымылыкым тӱредыда,
шоякын саскаже-влакым кочкыда,
вет те ойырен налме корныланда,
сарзе-влакдан шуко улмыштлан инаненда.
14 Калыкда коклаште сар йӱк нӧлталтеш,
карман-влакда пытарыме лийыт –
лач тыге Салман сӧй кечын Бет-Арбелым шалатен,
тунам ава-влак йочашт дене пуштмо лийыныт.
15 Теве мо тыйым вуча, Вефиль,
вет осал пашат-влак пеш кугу улыт!
Глава 10
