Библия
Выбрать язык
Книги Ветхого Завета
Книги Нового Завета
с русским текстом
ПРОРОК ОСИЙЫН КНИГАЖЕ
11 Глава
Господь деке Израиль эргыже ынеж пӧртыл.1 Тудо кечын, волгыжаш тӱҥалмеке,
Израильын кугыжаже пуштмо лиеш.
Кунам Израиль самырык лийын,
Мый тудым йӧратенам,
шке эргым Мый Египет гыч ӱжынам.
2 Мыняр гана нуным ӱжыныт,
но нуно шке корнышт дене каеныт:
Ваал-влаклан надырым конденыт,
шояк юмо-шамычлан тӱтыреныт.
3 Мый Ефремым кошташ туныктенам,
тудым кидыштем нумалынам,
но нуно умылен огытыл:
тиде Мый нуным паремденам.
4 Мый нуным йӧратымаш кандыра дене,
порылык кандыра дене вӱден каенам.
Мый шӱйышт гыч омытам кораҥденам,
нунын деке кочкышым пуаш тайненам.
5 Но нуно Египетыш огыт пӧртыл,
кугыжашт Ассирий лиеш,
вет нуно Мый декем савырнаш шонен огытыл.
6 Сандене олаштышт керде йолгаш тӱҥалеш,
тудо капка тӱкылтыш-влакым шалата,
мом шонен пыштымышт верч нуным пытара.
7 Мыйын калыкем Мый дечем кораҥаш шонен пыштен.
Кеч Чыла деч Кӱшылысым ӱжын кумалыт,
Тудо нуным тидлан ок мокто.
*а8 Ефрем, Мый тыйым коден кертам мо?
Израиль, Мый тыйым кудалтем мо?
Кузе Мый Адма дене ыштенам,
тый денетат тыге ыштем мо?
Мом Цевоимлан ыштенам, тыланетат ыштем мо?
Шӱмем шулен, кӧргыштем чаманымаш ылыжын!
9 Уке, Мый шыдемлан эрыкым ом пу,
Ефремым ом пытаре,
вет Мый айдеме огыл, а Юмо улам,
тендан коклаште Святой.
Кугу шыде дене Мый ом тол.
10 Нуно Господь почеш каят,
да Тудо лев семын ырла.
Шке йӱкшым Тудо луктеш,
да касвел гыч эргыж-влак толыт пырткен.
11 Кайык-влак семын лӱдын-чытырен
толыт нуно Египет гыч,
Ассирий мланде гыч кӧгӧрчен семын толыт.
Мый нуным шке пӧртышкышт илаш пуртем, – ойла Господь. –
12 Ефрем Мыйым авырен шояк дене,
Израиль тукым – ондалчык дене.
А Иуда Юмо деч кораҥын огыл,
святой-влак дене пырля ӱшанле кодын».
*б
*а 11:7 «Кеч Чыла деч Кӱшылысым ӱжын кумалыт, Тудо нуным тидлан ок мокто»: тидым «Тудым Чыла деч Кӱшылысӧ дек савырнаш ӱжыт, но Тудо нуным ок нӧлтал» манынат кусараш лиеш. Еврей текстыште мом возымым умылаш неле.
*б 11:12 Тидым тыгеат кусараш лиеш: «А Иуда Юмым эшеат ок колышт, шояк юмо-влаклан кумалмыжым ок чарне».
Глава 11
