Библия
Выбрать язык
Книги Ветхого Завета
Книги Нового Завета
с русским текстом
ПРОРОК МИХЕЙЫН КНИГАЖЕ
6 Глава
1 Господь Израильым титакла. 6 Теве мом Господь айдеме деч йодеш. 9 Израильын титакше да тудым мут кучыктымаш.1 Колыштса, мом Господь ойла:
«Кынел, курык-влак ончылно судитлалт,
тек кӱкшака-влак йӱкетым колыт!
2 Колыштса, курык-влак, Господьын титаклымыжым,
тыят, мландын пеҥгыде негызше!
Господь шке калыкше дене судитлалтеш,
Тудо Израиль ваштареш шогаш тӱҥалеш.
3 Калыкем, мом Мый тылат ыштенам?
Мо дене илышет нелемденам? Вашеште Мылам.
4 Мый тыйым Египет гыч луктынам,
кул лийме вер гыч сулен налынам,
тыйын ончычет Моисейым, Аароным да Мариамым колтенам.
5 Мыйын калыкем, шарналте –
мом Моав кугыжа Валак шонен пыштен
да могай вашмутым тудлан Веор эрге Валаам пуэн,
Ситтим гыч Галгалыш кайыме годым мо лийын.
Тунам ужат, мыняр чынле пашам тылат Господь ыштен».
6 Мо дене мылам Господь ончыко шогалаш,
кавасе Юмо ончылно вуем саваш?
Шогалаш мо Тудын ончыко
йӱлалтен пуымо надыр дене, икияш презе-влак дене?
7 Лиеш мо тӱжемле тага дене
але шотлен пытарыдыме олив ӱй йогын дене
Господьлан келшаш?
Пуэм мо надырлан Тудлан осал пашам верч кугэргем,
сулыкем верч – шке шочшем?
8 О айдеме, Господь тылат каласен –
мо сай, да мом Тудо тый дечет йодеш:
чыным ышташ, порылыкым йӧраташ
да Юмет ончылно ӱҥышын кошташ.
9 Господьын йӱкшӧ олалан кычкыра,
мунлылык Тудын лӱмжӧ деч лӱдаш ӱжеш:
«Кучемвий тоям да тудым пеҥгыдемден шогалтыше Господьым колыштса!
10 Осал паша дене ыштен налме поянлык
да иземден ончыктышо йырнык висыме ате
осалым ыштен илыме пӧртыштӧ огытыл мо?
11 Чыташ тӱҥалам мо шояк висам
але ондалыше кир-влакым?
12 Поян еҥ-шамыч тиде олаште темден илат,
тушто илыше-влак ондалкалат,
умша ден йылмыштышт – шояк.
13 Садлан Мый ӱмбакет черым колтем,
сулыкетлан тыйым пустаҥдем.
14 Тый кочкаш тӱҥалат, но от тем – пагарет яра лиеш.
Погаш тӱҥалат, но арален от керт.
А мом арален кодет – Мый кердылан пуэм.
15 Ӱдаш тӱҥалат, но от тӱред;
оливым темдаш тӱҥалат, но ӱй дене шкендым от шӱрӧ;
виноградым темдаш тӱҥалат, но йошкар аракам от йӱ.
16 Тый Амврийын йӱлажым
да Ахав тукымын чыла пашажым шуктен шогет,
нунын каҥашышт почеш ыштет.
Садлан Мый тыйым пустаҥдем,
еҥет-влакым намыс дене леведам.
Те, Мыйын калыкем, мыскылтыш лийыда».
Глава 6
