Библия
Выбрать язык
Книги Ветхого Завета
Книги Нового Завета
с русским текстом
ПРОРОК МИХЕЙЫН КНИГАЖЕ
7 Глава
1 Израиль калыкын осал пашаже-влак. 8 Господь шке еҥже-шамычым утара. 14 Шке калыкше деке Тудо угыч поро лиеш.1 Ойго мыланем! Мый тудо еҥ гай улам,
кӧ кеҥежымсе саскам погаш лектын,
но тиде жап эртен, виноград аҥа яра кодын –
кочшашлык ик орлаҥгат уке,
кочкаш шонымо икымше смоква ок кой.
2 Тыгакак элыштына поро еҥ-влакым от му,
калык коклаште чын ыштыше уке.
Вӱрым йоктараш ваҥен шинчат,
икте-весыштлан оптышым шындат.
3 Осалым ышташ нунын кидышт мастар:
вуйлатыше пӧлекым йодеш,
судья взяткылан судитла,
а виян-влак шке кумылышт почеш ыштыктат –
тыге нуно чыным вес семын савырат.
4 Нунын кокла гыч эн сайже – иман вондер дене иктак,
эн чын ыштышыже – шуркалыше воштыран пече деч ударак.
Толеш тудо кече, мут кучыктымо кече,
кудын нерген пророк уверзет-влак ойленыт,
тунам калык аптыранымашыш пура.
5 Лишыл еҥетлан ит ӱшане,
йолташетлан ит инане.
Ӧндалтышыштет кийыше дене кутырымет годым
умшат гыч лекше шомакым эскере.
6 Эрге ачажым шӱктара,
ӱдыр аваже ваштареш шогалеш,
шешке – авалийшыже ваштареш,
айдемылан мӧҥгысыжӧ-влак тушманыш савырнат.
7 А мый ончалтышем Господь дек савырем,
мыйым утарыше Юмемлан инанем:
Тудо мыйым колеш.
8 Тушманем, ойгемлан ит куане!
Кеч мый камвозынам, но угыч кынелам,
кеч пычкемыште улам, но Господь мылам волгыдо лиеш.
9 Господь ончылно сулыкыш пуренам,
садлан мылам чын судым ыштымешкыже
да мыйым арален налмешкыже,
Тудын шыдыжым чытышаш улам.
Господь мыйым волгыдыш луктеш,
да мый Тудын чынлыкшым ужам.
10 «Кушто Господь, тыйын Юмет?» манын ойлышо тушман,
тидым ужын, намысыш пура.
Шке шинчам дене ужам мый,
кузе тудым уремысе лавыра семын тошкаш тӱҥалыт.
11 Толеш тудо кече,
кунам ола пырдыжетым угыч чоҥат,
мландетым кумдаҥдат.
12 Тудо кечын тый декет чыла вер гыч толыт:
Ассирий ден Египетысе олала гыч,
Египет деч Евфрат эҥер марте шуйнышо кундемла гыч,
теҥыз деч теҥыз, курык деч курык марте
шуйналтше мландыла гыч.
13 А коден кайыме мланде пуста лиеш –
тушто илыше-влаклан кӧра,
нунын осал пашаштлан кӧра.
14 Пондет дене кӱтӧ, Господь, шке калыкетым,
сай мланде
*а покшелнысе чодыраште посна илыше кӱтӱэтым.
Тек тудо ожнысо семын
Васан ден Галаадыште кочкын коштеш!
15 «Египет гыч лекме годсо семын
Мый тылат ӧрыктарыше паша-влакым ончыктем».
16 Калык-влак тидым ужыт
да вий-куатышт улмо ӱмбач вожылмашыш пурат.
Кидышт дене нуно умшаштым петырат,
пылышышт соҥгыра лиеш.
17 Кишке семын, мланде ӱмбалне нушкын коштшо семын
тӱҥалыт нуно пуракым нулаш.
Чытырен лектыт шке карманышт гыч,
Господь Юмына деч лӱдыт.
Тый дечет, Господь, нуно ӧрткымашыш пурат!
18 Уло мо Тый гает Юмо,
Кӧ титакым кудалта,
калыкшын утаралт кодшыжо-влакым
осал пашаштлан ок наказатле?
Курымешлан огыл Тудын шыдыже,
вет Господь серлагаш йӧрата.
19 Тудо мемнам угыч чамана,
чыла осал пашанам ӱштыл шуа,
сулыкнам теҥыз пундашыш кудалта.
20 Кугезе кочана-влаклан ожно годым товатлымет семынак
Тый Иаковлан ӱшанле лият,
Авраамлан порылыкым ончыктет.
*а 7:14 «Сай мланде» – тидым «Кармил» манынат кусараш лиеш; «кармил» мут ’сад-пакчан мланде’ манмым ончыкта.
Глава 7
