Выбрать язык
Книги Ветхого Завета
Книги Нового Завета
с русским текстом1 Сулыкыштым да ару огыл улмыштым мушкын колташ манын, Давид тукым ден Иерусалимыште илыше-влаклан тудо кечын памаш лектеш.2 Тудо кечын, – ойла Господь Саваоф, – Мый тиде мландыште шояк юмо-влакын лӱмыштым пытарем, нуным тетла огытат шарналте. Тиде мландыште тыгак шояк пророк-влак ден йырнык шӱлышым пытарем.3 А иктаж-кӧ тидын деч варат шояк пророк шомакым ойлаш тӱҥалеш гын, тудым шочыктышо ачаж ден аваже тудлан каласат: ”Тый илышаш отыл, вет тый Господьын лӱмжӧ дене шоякым ойлет”, да пророк шомакым ойлымыжлан шке ачаж ден аваже тудым шуралтен пуштыт.
4 Тунам тыгай пророк-влак ужмо кончымашыштым увертарыме деч вожылыт да, ондалаш манын, чоштыра межан пророк вургемыштым тетла огыт чий.5 Нунын кокла гыч кажныже каласа: ”Мый пророк огыл, а мланде пашаеҥ улам, изи годымак мыйым кулым ыштеныт”.6 Тудын деч йодыт: ”Оҥысо сусыр палет-влак кушечын лектыныт?” Тудо вашешта: ”Мыйым йолташем-шамычын пӧртыштышт кыреныт”.
7 О, керде! – ойла Господь Саваоф. –
Мыйын кӱтӱчем, Мыйын лишыл еҥем ӱмбаке нӧлталт.
Перен шу кӱтӱчым, тек шорык кӱтӱ шалана,
а Мый шке кидем пача-влак ӱмбаке нӧлталам.
8 Пӱтынь эл мучко, – ойла Господь, –
кум ужаш гыч кокытшо колен пыта,
лач ик ужашыже илен кодеш.
9 Тиде ик ужашым Мый тулыш пуртем,
ший семын левыктем, шӧртньӧ семын эрыктем.
Нуно Мыйын лӱмем ӱжын кумалыт,
а Мый нунылан вашештем,
тыге каласем: ”Тиде Мыйын калыкем”,
а нуно маныт: ”Господь – мыйын Юмем!”»
Глава 13