Выбрать язык
Книги Ветхого Завета
Книги Нового Завета
с русским текстом1 Теве Господьын кечыже лишемеш, кунам агыме погыдам тендан ончылно шеледаш тӱҥалыт.2 «Тунам Мый чыла калыкым Иерусалим ваштареш сарлан погем. Олам руалтен налыт, пӧрт-влакым агат, а ӱдырамаш-шамыч виешлыме лийыт. Олаште илыше пел калыкым пленыш наҥгаят, но молыжо олаштак кодыт».
3 Тунам Господь лектеш да нине калык дене сӧй кечын кредалме семын кредалаш тӱҥалеш.4 Тудо кечын Господьын йолжо Иерусалим деч эрвелныла верланыше Елеон курыкыш шогалеш. Тунам Елеон курык эрвел гыч касвелкыла кокыте шелалтеш. Курыкын пел ужашыже йӱдвелкыла, вес пелыже кечывалвелкыла кораҥыт, коклаштышт кугу лапвер лиеш.5 Те курык кокласе тиде лапвер дене куржыда, тудыжо Асил марте шуйнаш тӱҥалеш. Те Иуда кугыжа Озий годым лийше мланде чытырналтмаш деч куржмо семын куржыда. Тунам мыйын Господь Юмем толеш, Тудын дене пырля – святой Суксо-влак.
6 Тудо кечын волгыдо йомеш,
тӱняволгалтыш-влак кораҥ каят.*а
7 Тиде кече ойыртемалтше
да Господьлан гына палыме лиеш:
кечат огыл, йӱдат огыл,
кас шумекат, волгыдо лиеш.
8 Тудо кечын Иерусалим гыч илыше вӱд йоген лектеш:
пелыже – эрвел теҥыз деке,
пелыже – касвел теҥыз деке.
Кеҥежымат, телымат тыге лиеш.
9 Господь уло тӱнян Кугыжаже лиеш.
Тудо кечын лач ик Господь лиеш,
Тудын лӱмжым гына ӱжын кумалаш тӱҥалыт.
10 Пӱтынь тиде мланде, Гева деч Риммон марте – тудыжо Иерусалим деч кечывалвелныла – тӧрверыш савырна. А Иерусалим кӱшнӧ шке верыштыже шогаш тӱҥалеш, тудо Вениамин капка деч Икымше ден Лукысо капка-влак марте, Хананел башне деч кугыжан виноград темдыме верже марте шуйна.11 Тушто еҥ-шамыч илаш тӱҥалыт, ола тетла каргыме да шалатыме ок лий, Иерусалим лӱдыкшым палыде илаш тӱҥалеш.
12 А Иерусалим ваштареш кредалше калык-влаклан Господь теве могай орлыкым колта: нунын капышт эше йол ӱмбалне шогымышт годымак шӱеш, тыгак шинчалакыште шинчашт да умшаште йылмышт шӱйыт.13 Тудо кечын Господь нунын ӱмбаке кугу пудыранымашым колта: икте-весыштын кидыштым руалтен кучен, нуно ваш-ваш кредалаш тӱҥалыт.14 Иуда тукымат Иерусалим ваштареш кредалаш тӱҥалеш.*б Тунам йыр улшо чыла калыкын поянлыкше – пеш шуко шӧртньӧ, ший да вургем – поген налме лиеш.15 Станыште улшо имне, мул, верблюд, осёл да моло вольык ӱмбакат еҥ-влакын гаяк орлык толеш.
16 Иерусалим ваштареш кредалше калык-влак кокла гыч кӧмыт илыше кодыт, нуно ий гыч ийыш Господь Саваоф Кугыжалан вуйыштым саваш да Омаш пайремым пайремлаш толыт.17 Мландымбалысе иктаж-могай калык Иерусалимыш Господь Саваоф Кугыжалан вуйым саваш ок тол гын, нунын дене йӱр огеш лий.18 Египтян-влак корныш огыт лек да [тушко] огыт мий гын, нунын денат йӱр ок лий – Омаш пайремыш толдымо калык-влаклан логалше орлыкым Господь нуныланат колта.19 Теве могай наказаний Египетым да Омаш пайремыш толдымо чыла калыкым вуча.
20 Тунам эсогыл имньын оҥгырлаштыже «Господьлан святитлыме» манын возымо лиеш, Господьын пӧртыштӧ улшо под-влакат жертвенник ончылнысо кӱмыж семын святой лийыт.21 Тыгак Иерусалимыште да Иуда мландыште улшо чыла под Господь Саваофлан святитлыме лиеш. Надырым кондаш толшо еҥ-влак нуным налыт да тушан шолтат. Тунам Господь Саваофын храмыштыже торгайыше ик еҥат*в ок лий.
*а 14:6 Еврей текстыште тыште мом возымым умылаш неле.
*б 14:14 Тидым тыгеат кусараш лиеш: «Иуда тукым Иерусалим верч (але: Иерусалимыште) кредалаш тӱҥалеш».
*в 14:21 «Торгайыше еҥ»: тыште кучылтмо еврей шомакым «хананей» манынат кусараш лиеш.
Глава 14