Выбрать язык
Книги Ветхого Завета
Книги Нового Завета
с русским текстом1 Иисус пушыш шинчын, вес могырыш вончен да шке олашкыже толын.2 Теве Тудын деке йыжыҥдыме еҥым вакшышеш пыштен конденыт. Иисус, нунын ӱшанымыштым ужын, йыжыҥдыме еҥлан каласен: «Ит лӱд, эргым, тыйын языкет кудалтыме лиеш».
3 Тунам закон туныктышо-влак кокла гыч южышт шке кӧргыштышт шонкаленыт: «Тудо Юмым мыскыла».4 Нунын шонымыштым пален, Иисус каласен: «Молан те шӱмыштыда удам шонкаледа?5 Можым куштылгырак каласаш: ”Тыйын языкет кудалтыме лиеш” але ”Кынел да ошкыл” манаш?6 Но те пален лийза: Айдеме Эргын мланде ӱмбалне языкым кудалташ кучемвийже уло». Вара йыжыҥдыме еҥлан ойлен: «Кынел, вакшышетым нал да мӧҥгышкет кае».7 Тудо кынелын да мӧҥгыжӧ каен.8 Тидым ужмеке, калык ӧрын да айдемылан тыгай вийым пуышо Юмым чапландарен.
9 Иисус, ола гыч лекшыжла, йозак окса погымо верыште шинчыше Матфей лӱман еҥым ужын. «Почешем кай», – ойлен тудлан. Матфей кынелын да Иисус почеш каен.
10 Пӧртыштӧ Иисусын кочмыж годым тушко йозак погышо да языкан-влак шукын толыныт, Иисус да тунемшыж-влак дене пырля кочкыныт.11 Тидым ужмеке, фарисей-влак Иисусын тунемшыж-влаклан каласеныт: «Молан тендан Туныктышыда йозак погышо да моло языкан-влак дене пырля кочкеш да йӱэш?»12 Иисус тидым колын да нунылан ойлен: «Таза еҥлан огыл эмлызе кӱлеш, а черлылан.13 Мийыза, тунемза: ”Надырым огыл, а порылыкым ужнем”*а манме мо лиеш? Мый чын ыштыше-влакым огыл, а языкан-влакым языкышт деч кораҥаш да Юмо деке савырнаш ӱжаш толынам».
14 Тунам Иоаннын тунемшыж-влак Иисус деке толыныт да ойленыт: «Молан ме да фарисей-влак чӱчкыдын пӱтым кучена, а Тыйын тунемшет-влак пӱтым огыт кучо?»15 Иисус нунылан каласен: «Каче пеленышт улмо годым сӱаныш толшо уна-влак ойгырен кертыт мо? Но тугай жап толын шуэш, кунам каче нунын деч налалтеш, тунам пӱтым кучат.16 Тошто вургемеш ошемдыдыме куэм дене тумышым нигӧ ок шынде, вет тыгай тумыш туртеш, вургемжым кушкедеш, да рож утларак кугемеш.17 Тыгак шуын шудымо йошкар аракам тошто шувышыш огыт теме, уке гын, шувыш кушкедла, аракажат йога, шувышыжат йӧрдымӧ лиеш. Шуын шудымо аракам у шувышыш опталман, тунам тидыжат, тудыжат аралалтеш».
18 Иисусын тидын нерген ойлымыж годым Тудын деке ик вуйлатыше лишемын да кумык возын ойлен: «Ӱдырем кызыт гына колыш, но, миен, ӱмбакыже кидетым пыште – илаш тӱҥалеш».19 Иисус кынелын да тунемшыж-влак дене пырля тудын почеш каен.
20 Латкок ий вӱр йоген орланыше ӱдырамаш Иисус деке шеҥгечше миен да Тудын вургем тӱржӧ деке тӱкнен,21 вет тудо шонен: «Тудын вургемже деке гына тӱкнем гын, паремам».22 Иисус, шеҥгеке савырнен, ӱдырамашым ужын да каласен: «Ит лӱд, ӱдырем, ӱшанымет тыйым утарен». Ӱдырамаш тунамак таза лийын.
23 Вуйлатышын пӧртышкыжӧ миен шумеке, Иисус шиялтыш дене шоктышо-влакым да йӱкланыше тӱшкам ужын.24 Нунылан ойлен: «Тышеч лекса, ӱдыр колен огыл, мала веле». Но Тудым воштылыныт.25 Калыкым поктен лукмеке, Иисус ӱдыр деке пурен да кидше гыч кучен. Ӱдыр кынелын.26 Тидын нерген шомак тусо чыла кундем мучко шарлен.
27 Иисусын тушечын кайымыж годым почешыже кок сокыр ошкылын да кычкырен: «[Иисус,] Давидын Эргыже, мемнам чамане!»28 А пӧртыш пурымекыже, Иисус деке нине сокыр-влак лишемыныт. Иисус нунылан каласен: «Мый тидым ыштен кертмемлан ӱшанеда мо?» «Туге, Господь», – вашештеныт.29 Тунам Иисус нунын шинчашт деке тӱкнен да каласен: «Тек ӱшанымыда семынак лиеш».30 Нунын шинчашт почылтын. Иисус пеҥгыдын ойлен: «Шекланыза, тидын нерген нигӧ ынже пале».31 А нунышт лектыныт да Иисус нерген кундемышт мучко чыла вере каласкаленыт.
32 Сокыр-влак лекме годым Иисус деке ия кучыман йылмыдыме еҥым вӱден конденыт.33 А иям поктен лукмеке, йылмыдыме еҥ мутланаш тӱҥалын. Калык ӧрын ойлен: «Израильыште тыгайым нигунам ужын огытыл».34 А фарисей-влак каласеныт: «Тудо ия-влакын тӧраштын вийже дене иям поктен луктеш».
35 Иисус чыла олашке да ялышке миен коштын, синагоглаште туныктен, Пылпомыш Кугыжанышын Поро Увержым каласкален да еҥ-влакым тӱрлӧ чер, тӱрлӧ туешкыме деч паремден.36 Калыкым ужын, Иисус тудым чаманен: нуно ярныше, кудалтен кодымо, кӱтӱчӧ деч посна кодшо шорык тӱшка гай лийыныт.37 Тунам тунемшыж-влаклан ойлен: «Тӱредаш пеш шуко, а пашаеҥ шагал.38 Тугеже пашаеҥ-влакым тӱредаш колтыжо манын, лектышын Озаж деч йодын кумалза».
Глава 9