Выбрать язык
Книги Ветхого Завета
Книги Нового Завета
с русским текстом1 Курык гыч Иисусын волымекыже, почешыже шуко еҥ каен.2 Теве Иисус деке проказе черан лишемын да ончыланже возын каласен: «Господь, паремдынет гын, мыйым эрныктен кертат».3 Иисус кидым шуялтен, тудын деке тӱкнен да каласен: «Паремдынем, эрналт». Проказе черже тунамак пытен.4 А Иисус тудлан ойлен: «Шеклане, тидын нерген нигӧлан ит ойло, но кай, шкендым иерейлан ончыкто да Моисейын шӱдымӧ надырым пу. Тидын дене тый паремметым ончыктет».
5 Кунам Иисус Капернаумыш толын, Тудын деке шӱдывуй миен да полышым йодын:6 «Господь, мӧҥгыштем тарзем кия, тудо йыжыҥдыме да моткоч орлана».7 Иисус тудлан каласен: «Мый мием да тудым паремдем».8 Шӱдывуй вашештен: «Господь, пӧртыш пурыметым мый ом шого. Тарзем паремже манын, мутым гына пелеште.9 Мый шкежат кид йымалысе еҥ улам, мыйынат кид йымалнем сарзе-влак улыт. Иктылан ойлем: ”Кае” – тудо кая, весыжлан ”Тышке тол” манам – тудо толеш, тарземлан ойлем: ”Тидым ыште” – тудо ышта».10 Тидым колмеке, Иисус ӧрын да почешыже толшо-влаклан каласен: «Тыланда чынак ойлем: тыгай кугу ӱшанымашым Израильыштат вашлийын омыл.11 Тыланда ойлем: эрвел ден касвел гыч шукын толыт да Пылпомыш Кугыжаныште Авраам, Исаак да Иаков дене пырля ӱстелтӧреш верланат.12 А кӧ шочынак Кугыжанышын эргыже лийын, нуным пычкемышке луктын кудалтат. Тушто шортмаш да пӱйым пурмаш лиеш».13 Иисус шӱдывуйлан каласен: «Кае, тек тылат ӱшанымет семынак лиеш». Шӱдывуйын тарзыже тунамак паремын.
14 Иисус Петрын пӧртышкыжӧ толын да тудын шокшымужо дене орланен кийыше оньыкуважым*б ужын.15 Иисус тудын кидше деке тӱкнен, да шокшымужо пытен. Оньыкува кынелын да нуным унам ыштен.
16 Кас шумеке, Иисус деке ия кучыман шуко еҥым конденыт. Тудо осал шӱлышым шомак дене поктен луктын да чыла черлым паремден.17 Тыге Исаий пророк гоч каласыме шомак шукталтын. Исаий ойлен:
«Тудо ӱмбакыже мемнан орлыкнам налын,
чернам нумал наҥгаен».*в
18 Шке йырже шуко калыкым ужын, Иисус вес серыш вончаш каласен.19 Тунам закон туныктышо ик еҥ лишемын да Тудлан каласен: «Туныктышо! Кеч-кушко Тый кает, мый почешет мием».20 Иисус тудлан ойлен: «Рывыж-влакын илыме рожышт уло, кавасе кайык-влакын – пыжашышт, а Айдеме Эргылан*г вуйым нигушан эҥерташ».21 Тунемшыж кокла гыч весе Тудлан каласен: «Господь, ондак ачамым тояш каяш эрыкым пу».22 Но Иисус тудлан ойлен: «Почешем кае, колышо-влакыштым тояш колышо-влакым кодо».
23 Иисус пушыш шинчын, тунемшыж-влак Тудын деке ушненыт.24 Теҥыз ӱмбалне пеш тале тӱтан тӱҥалын, толкын-влак пуш гоч лупшалтыныт, а Иисус мален.25 Тунемшыж-влак Тудын деке лишемыныт, помыжалтареныт да каласеныт: «Господь, мемнам утаре, пытена!»26 Иисус нунылан ойлен: «Молан тынар лӱдыда, шагал ӱшаныше-влак?» Вара кынел шогалын, мардежлан чарнаш да теҥызлан шыпланаш кӱштен, да пешак тымык лийын.27 Еҥ-влак ӧрын ойленыт: «Кӧ тиде? Мардежат, теҥызат Тудын мутшым колыштыт!»
28 Иисус вес серысе Гергеса калыкын илыме кундемышкыже толын. Тудым ия кучыман кок еҥ вашлийын, нуно шӱгарла гыч лектыныт. Пешак ажгыныше лийынытат, тиде корно дене нигӧ коштын кертын огыл.29 А теве нуно кычкыреныт: «Иисус, Юмын Эрге, мом Тый мемнан дене ыштынет? Тый мемнам жап шудеак орландараш толынат?»30 Умбалне кугу сӧсна кӱтӱ коштын.31 Ия-влак Иисус деч йодыныт: «Мемнам поктен луктат гын, сӧсна кӱтӱшкӧ колто».32 Тудо нунылан каласен: «Кайыза». Нуно лектыныт да сӧсна кӧргыш пуреныт. Тунам уло кӱтӱ тура сер гыч теҥызыш шуҥгалтын да вӱдыш пурен каен.
33 Кӱтӱчӧ-влак куржыныт, да олашке мийымеке, чылажымат увертареныт, ия кучыман-влак дене мо лиймымат каласкаленыт.34 Тунам оласе уло калык Иисусым вашлияш лектын, Тудым ужмеке, шке кундемышт гыч каяш йодын.
*а 8 Шӱдывуй – книга мучаште мутерым ончо.
*б 8:14 Оньыкува – ватыжын аваже.
*г 8:20 Айдеме Эрге – книга мучаште мутерым ончо.
Глава 8