Выбрать язык
Книги Ветхого Завета
Книги Нового Завета
с русским текстом1 Латкок тунемшыжлан тыгай каҥашым пуымеке, Иисус тушечын каен да тиде кундемысе олалаште туныктен каласкалаш тӱҥалын.
2 Христос мом ыштыме нерген колмеке, казаматыште шинчыше Иоанн Тудын деке кок тунемшыжым йодаш колтен:3 «Толшашлыкше Тый улат, але мыланна весым вучыман?»4 Иисус нунылан вашештен: «Кайыза, ужмыдам-колмыдам Иоаннлан каласкалыза:5 сокыр-влак ужыт, окшак-влак коштыт, проказе черан-влак эрнат, чокрак-влак колыт, колышо-влак ылыж кынелыт, йорло-влак*а Поро Уверым каласкалат.6 Ондалалтын, кӧ Мый дечем ок кораҥ, тудо поро пиалан».
7 Иоаннын тунемшыж-влак кайымеке, тудын нерген Иисус калыклан каласкалаш тӱҥалын: «Те ир мландыш мом ончаш лектында? Мардеж дене лӱҥгышӧ омыжым мо?8 Мом те ужаш миенда? Шергакан вургемым чийыше айдемым мо? Шергакан вургеман-влак кугыжа-влакын кӱполатыштышт улыт.9 Те мом ончаш лектында? Пророкым? Туге, тыланда ойлем, тудо пророк, но пророк деч кугурак.10 Возымо: ”Теве Тый дечет ончыч Мый Шкемын Суксем колтем. Тудо Тыйын ончылно корным ямдыла”. Тидым Иоанн нергенак каласыме.*б11 Тыланда чынак ойлем: ӱдырамаш-влак деч шочшо коклаште Тынеш Пуртышо Иоанн деч кугурак еҥ уке, но Пылпомыш Кугыжаныште эн изижат тудын деч кугу.12 Тынеш Пуртышо Иоаннын калыклан каласкалаш тӱҥалме жап гыч тачысе кече мартеат Пылпомыш Кугыжаныш вий дене налалтеш,*в да вийым пыштыше-влак тудым налыт.13 Вет чыла пророк ден закон Иоанн марте ончык ужын ойленыт.14 Палынеда гын, тудо – толшаш Илия.15 Кӧн колышташ пылышыже уло, тек колеш.
16 Но тиде тукымым кӧ дене таҥастарем? Тудо пазарыште шинчыше йоча-влак гай. Нуно йолташышт-влаклан кычкырат:17 ”Ме тыланда шиялтыш дене шоктышна, а те ышда кушто, ме тыланда ойган мурым мурышна, а те ышда шорт”.18 Иоанн толын, ок коч, ок йӱ, а ойлат: ”Тудын кӧргыштыжӧ ия!”19 Айдеме Эрге толын, кочкеш, йӱэш, а ойлат: ”Ончалза, теве кочкаш да йӱаш йӧратыше Айдеме, йозак погышо ден языкан-влакын йолташышт”. Икшывыж-влакым ужын, Юмын уш-акылжым чынлан шотлат».
20 Вара Иисус южо оласе калыкым язык деч кораҥде да Юмо деке савырныде илымыштлан шылталаш тӱҥалын, вет Тудын чудыжо-влак кокла гыч эн шукышт нине олалаште ончыктымо лийыныт.21 «Ойго тылат, Хоразин! Ойго тылат, Вифсаида! Могай чудо-влак тендан дене лийыныт, тугаяк чудо-влак Тир ден Сидонышто лийыт ыле гын, нуно шукертак, чоштыра вургемым чиен, ӱмбакышт ломыжым шавен, языкышт деч кораҥыт да Юмо деке савырнат ыле.22 Тыланда ойлем: суд кечын Тир ден Сидонлан тендан деч куштылгырак лиеш.23 Тый, кавашке шумеш нӧлтымӧ Капернаум, тамыкыш*г сӱмыралме лият! Тыйын уремлаштет ончыктымо чудо-влак гай Содомышто лийыт ыле гын, тудо таче мартеат шога ыле.24 Тыланда ойлем: суд кечын Содом мландылан тый дечет куштылгырак лиеш».
25 Тиде жапыште Иисус ойлен: «Ачай, кава ден мландын Господьшо! Тый уш-акылан дечат, кугу ушан дечат тидым шылтенат да изи-влаклан почынат, сандене Тыйым чапландарем.26 Туге, Ачай, тыгай лийын Тыйын поро кумылет!27 Ачам чыла Мыйын кидышкем пуэн. Эргым Ача деч моло нигӧ ок пале, Ачамат Эрге да кӧлан Эрге палдарынеже, нунын деч моло нигӧ ок пале.
28 Орлыкышто илыше да нелым ужшо-шамыч, чылан Мый декем толза, Мый тендам тынысландарем.29 Мыйын нумалтышем шке ӱмбакыда налза да Мый дечем тунемза, вет Мый ӱҥышӧ да пушкыдо кумылан улам. Тунам чонланда тынысым муыда.30 Вет Мыйын нумалтышем нумалаш поро, Мыйын туныктымем*д куштылго».
*а 11:5 «Йорло-влак»: грек ойым «Йорло-влаклан» манынат умылаш лиеш. Тыгак – Лк 7:22.
*в 11:12 «Вий дене налалтеш» – грек мут-влакым «Куат дене толеш» манынат кусараш лиеш.
*г 11:23 Тамыкыш – але: «вес тӱняш».
*д 11:30 «Туныктымем»: грекла ’нумалтышем’.
Глава 11