Выбрать язык
Книги Ветхого Завета
Книги Нового Завета
с русским текстом1 Иерусалим деке лишеммышт годым Елеон курыкеш*а верланыше Виффагий деке шумекышт, Иисус кок тунемшыжым ончык колтен2 да нунылан каласен: «Ончылно койшо ялыш мийыза. Миен шумекыда, йолыштен шогалтыме вӱльӧ осёлым ужыда, пеленже самырык осёл лиеш, нуным мучыштарыза да Мый декем кондыза.3 Тыланда иктаж-кӧ иктаж-мом каласа гын, тыге вашештыза: ”Нуно Господьлан кӱлыт”. Тудо тунамак нуным колта».4 Пророк гоч ойлымо шомак шукталтше манын, тыге лийын. Пророк ойлен:
5 «Сион ӱдырлан каласыза:
теве тый декет Кугыжат толеш,
Тудо – ӱҥышӧ,
вӱльӧ осёл ден самырык осёлым,
кычкыме осёлын шочшыжым, кушкыж шинча».*б
6 Тунемшыж-влак каеныт да, кузе Иисус кӱштен, тугак ыштеныт.7 Вӱльӧ осёл ден самырык осёлым конденыт, нунын ӱмбак вургемыштым шарен пыштеныт, Иисус кушкыж шинчын.8 Тушто моткоч шуко калык лийын, иктышт вургемыштым корнеш шареныт, а весышт пушеҥге укшым пӱчкеденыт да корныш оптеныт.9 Ончылно кайыше калыкат, почеш толшо-влакат виян кычкыреныт:
«Осанна*в Давидын Эргыжлан!
Господь лӱм дене Толшо
тек моктымо лиеш!
Тек осанна кӱшнӧ йоҥгалтеш!»
10 Кунам Тудо Иерусалимыш пурен, уло ола пудыранен, да чыланат йодыштыныт: «Кӧ Тиде?»11 А еҥ-влак вашештеныт: «Тиде Иисус, Галилейысе Назарет гыч Пророк».
12 Иисус Юмын храмыш пурен да ужалыше ден наледыше-влакым чылаштымат тушечын поктен луктын. Окса вашталтыше-влакын ӱстелыштым да кӧгӧрчен ужалыше-влакын теҥгылыштым савырен шуэн13 да нунылан ойлен: «Возымо: ”Мыйын пӧртем кумалме пӧрт лиеш”, а те тудым агыше-влакын пыжашышкышт савыренда».*г
14 Храмыште Иисус деке сокыр ден окшак-влак миеныт, Тудо нуным паремден.15 Иисусын ыштыме ӧрыктарыше пашаж-влакым ужын да йоча-влакын «Осанна Давидын Эргыжлан!» манын храмыште кычкырымыштым колын, архиерей ден закон туныктышо-влак шыдешкенытат,16 Тудлан каласеныт: «Мом ойлымыштым Тый колат?» «Колам, – Иисус нунылан вашештен. – Возымо: ”Изи икшывын да чызе кочшын умшашт гоч Тый моктымашым ямдыленат”. Але те тидым нигунам лудын огыдал?»*д17 Вара нуным коден, ола деч ӧрдыжысӧ Вифанийыш каен да туштак йӱдым эртарен.
18 Эрдене эрак олашке пӧртылмыж годым Иисус шужымым шижын.19 Корно воктене смоква пушеҥгым*е ужмеке, тудын деке лишемын, лышташ деч молым муын огылат, пушеҥгылан каласен: «Тек тый дечет саска ынде нигунам ынже шоч». Смоква пушеҥге тунамак кошкен.20 Тунемшыж-влак, тидым ужмеке, ӧрыныт да ойленыт: «Кузе тыге смоква пушеҥге кенета кошкыш?»21 А Иисус нунылан вашештен: «Мый тыланда чынак ойлем: Юмылан ӱшанымашда лиеш да кокыте огыда шоно гын, смоква пушеҥге дене ыштыме гайым веле огыл ыштен кертыда, а тиде курыклан ”Нӧлталт да теҥызыш шуҥгалт” манын каласеда гынат, тыгак лиеш.22 Кумалмыда годым мом ӱшанен йодыда, чылажымат налыда».
23 Храмыш пурен туныктымыж годым Иисус деке архиерей ден калык кугурак-влак миеныт да каласеныт: «Могай кучемвий дене Тый чыла тидым ыштет? Кӧ Тыланет тидым ышташ кучемвийым пуэн?»24 Иисус нунылан вашештен каласен: «Мыят тыланда йодышым пуэм. Тудлан вашештеда гын, Мыят могай кучемвий дене чыла тидым ыштымем каласем.25 Иоаннын тынеш пуртымыжо кушеч лийын: Пылпомыш гыч але айдеме деч?»
Нуно шке коклаштышт каҥашеныт: «Пылпомыш гыч манына гын, Тудо мыланна каласа: ”Молан вара те тудлан ӱшанен огыдал?”26 Айдеме деч манына гын, калык деч лӱдаш логалеш, вет Иоанным чылан пророклан шотлат».27 Сандене нуно Иисуслан вашештеныт: «Огына пале». Тудат нунылан каласен: «Тугеже Мыят могай кучемвий дене тидым ыштымем ом ойло».
28 «Кузе те шонеда? Ик еҥын кок эргыже улмаш. Иктыж деке миен да каласен: ”Эргым, мий, таче виноград аҥаштем пашам ыште!”29 ”Ыштыме ок шу”, – тудыжо вашештен, а вара ӧкынен да каен.30 Ача вес эргыж деке миен да тидымак каласен. ”Каем, оза”, – манын тидыже, но каен огыл.31 Кокыт гыч кудыжо ачажын кӱштымыжым шуктен?» «Икымшыже», – Тудлан ойленыт. Иисус нунылан каласен: «Тыланда чынак ойлем: яжар ӱдырамаш ден йозак погышо-влак Юмын Кугыжанышыш тендан деч ондак каят.32 Вет Иоанн тендан деке чын илымын корныж дене толын, те тудлан ӱшанен огыдал, а яжар ӱдырамаш ден йозак погышо-влак тудлан ӱшаненыт. Те тидым ужында гынат, варажымат ӧкынен огыдал да тудлан ӱшанен огыдал.
33 Вес туштен каласымым колыштса. Ик сурт оза лийын. Тудо аҥашыже виноградым шынден, йырже печым печен, саска вӱдым темден лукмо верым кӱнчен келыштарен, башньым ыштен. Вара аҥажым виноградым куштышо-влаклан кучаш пуэн да шкеже каен.34 Саска поген налме жап шумеке, виноград лектышлан тарзыж-влакым виноград ончышо-влак деке колтен.35 А виноградым ончышо-влак тудын тарзыж-влакым руалтен кученыт, иктым кыреныт, весым пуштыныт, кумшо ӱмбаке кӱм кышкеныт.36 Ынде тудо ончычсо деч шукырак тарзым колтен, но нунын денат тугак ыштеныт.37 Пытартышлан нунын деке эргыжым колтен да ойлен: ”Эргым ончылно нуно вожылыт”.38 Но виноградым ончышо-влак, эргыжым ужмеке, икте-весылан ойленыт: ”Тиде наследник. Айста миена да тудым пуштына, тунам югыпогыжым ме налына”.39 Тудым руалтен кученыт, виноград аҥа гыч луктын шуэныт да пуштыныт.
40 Аҥа оза, толмекыже, виноградым куштышо-влак дене мом ышта?»41 Иисуслан вашештеныт: «Нине осал-влакым чаманыде пытара, а виноград аҥажым весе-влаклан кучаш пуа. Шке жапыште саскам поген пуышо еҥ-влак аҥажым ончаш тӱҥалыт».42 Иисус нунылан ойлен: «Возымаште каласыме:
”Чоҥышо-влакын йӧрдымыш лукмо кӱышт
негыз пусак кӱ лийын:
тидыже Господь деч,
мемнан шинча ончылнына моткоч ӧрыктарыше”.
Те тидым нигунам лудын огыдал мо?*ж43 Мый тыланда ойлем: Юмын Кугыжаныш тендан деч налалтеш да Кугыжанышын саскажым шочыктышо калыклан пуалтеш.44 Кӧ тиде кӱ ӱмбаке камвозеш, тудо пудырга, а кӧн ӱмбаке кӱ камвозеш, тудым пытара».
45 Иисусын туштен каласкалымыжым колыштмеке, архиерей ден фарисей-влак шкешт нерген ойлымым умыленыт.46 Нуно Тудым руалтен кучаш йӧным кычалыныт, но Иисусым еҥ-влак пророклан шотленыт, сандене калык деч лӱдыныт.
*а 21:1 «Елеон курык» – грекла возымаште «Олив курык» але «Олив пушеҥган курык».
*б 21:5 Ис 62:11, Зах 9:9. «Сионын ӱдыржӧ» – Иерусалим манын умылыман.
*в 21:9 Осанна – тиде мут ’утаре’, ’полшо’ манмым ончыкта.
*е 21:19 Смоква пушеҥге – саскан пушеҥге, кызытсе йылмыште саскажым эн чӱчкыдын инжир маныт.
Глава 21