Выбрать язык
Книги Ветхого Завета
Книги Нового Завета
с русским текстом1 Иисус адак теҥыз воктене туныкташ тӱҥалын. Тудын деке калык пешак шуко погынен, сандене Иисус пушыш шинчынат, сер деч торлен, а уло калык теҥыз серыште лийын.2 Туштен ойлымо дене Иисус нуным шукылан туныктен. Туныктымыж годым нунылан ойлен:3 «Колыштса! Теве ӱдышӧ ӱдаш лектын.4 Ӱдымыж годым икмыняр пырче корно воктеке возын. Кайык-влак чоҥештен толыныт да нуным чӱҥген пытареныт.5 Вес пырче-влак кӱан да шагал рокан верышке возыныт. Рок келге огыл улмылан кӧра нуно пеш вашке шытен лектыныт.6 Кече лекмеке, озым лывыжген, вожшо укелан кӧра кошкен.7 Икмынярже шӱкшудо коклаш возын. Шӱкшудо кушкын да нуным пызыралын. Садлан шурно лектышыже лийын огыл.8 А икмынярже сай мландыш возын, шытен лектын, кушкын да лектышым пуэн: кудо кумло, кудо кудло, а кудыжо шӱдӧ пырчым».9 Вара Иисус каласен: «Кӧн колышташ пылышыже уло – тек колеш!»
10 Иисус шкет кодмеке, Тудын йыр лийше-влак да латкок тунемшыже Тудын деч туштен ойлымыж нерген йодыныт.11 Иисус вашештен: «Юмын Кугыжанышын тайныж-влакым умылаш тыланда пуымо, а тӱжвалысе-влаклан чылажат туштен каласыме гоч веле пуалтеш.12 Сандене
”Шинчашт дене ончат да огыт уж,
пылышышт дене колыт да огыт умыло,
Мый декем огыт савырне, да языкыштым ом кудалте”».*а
13 Вара Иисус каласен: «Тиде туштен ойлымым огыда умыло? Кузе вара те моло туштен ойлымем умылен кертыда?14 Ӱдышӧ шомакым ӱда.15 Корно воктене ӱдымӧ теве мом ончыкта: Юмын шомакшым айдеме колеш веле, тунамак сатана толеш да тудын шӱмеш ӱдымӧ шомакым налын кая.16 Кӱан мландыш ӱдымӧ – тидыже Юмын шомакшым колмеке, тудым вигак шӱмыш куанен пыштыше айдеме.17 Тыгай айдеме вожшо укелан кӧра кужу жап чытен огеш керт. Кунам Юмын шомаклан кӧра нелылык але поктылмаш толеш, тудо вигак ӧрдыжкӧ кораҥеш.18 А шӱкшудо коклашке ӱдымӧ – тидыже Юмын шомакшым колшо айдеме,19 но тудын шӱмышкыжӧ тиде илыш верч тургыжланымаш, поянлыкым йӧратымаш да моло кумыл шупшмаш пурат, шомакым пызырат, сандене шомак саскадыме лиеш.20 А сай мландыш ӱдымӧ урлыкаш – тидыже Юмын шомакшым колшо да шӱмышкыжӧ пыштыше айдеме. Тыгай-влак лектышым пуат: кудо кумло, кудо кудло, а кудыжо шӱдӧ пачаш».
21 Иисус каласен: «Лампым ате йымаке але олымбал йымак шындаш кондат мо? Уке, тудым лампыпӱкеныш шындаш кондат.22 Шылтыме нимо койде ок код, тоен шындымат пален налде ок код.23 Кӧн колышташ пылышыже уло – тек колеш!»
24 Вара ешарен: «Мом колмыда нерген шоналтыза. Могай виса дене те виседа, тыландат, колыштшо-влаклан, тугай денак висалтеш да ешаралтеш.25 Кӧн уло, тудлан пуалтеш. А кӧн уке, тудын мо улыжат налалтеш.»
26 Иисус каласен: «Юмын Кугыжаныш тыгай: мланде ӱмбаке айдеме пырчым ӱда.27 Кече да йӱд-влак эртат. Айдеме мала да кынелеш, пырче шытен лектеш да кушкеш. Кузе тиде лиеш, айдеме ок пале,28 мланде шке кушта. Ондак озым лектеш, кушкеш, парчам колта, вара парча пырче дене темеш.29 Шурно шумеке, айдеме тунамак сорла дене тӱредаш колта, вет тӱредме жап шуын».
30 Иисус ойлен: «Юмын Кугыжанышым мо дене таҥастараш лиеш? Могай туштен каласыме дене тудым ончыкташ?31 Тудо горчице нӧшмӧ гай. Мланде ӱмбаке ӱдымӧ годым горчице нӧшмӧ мландымбалысе чыла моло кушкыл нӧшмӧ дечат изи.32 Ӱдымеке, кушкын шогалеш да пакчасе моло кушкыл деч кугу лиеш. Кугу укш-влакым шарен колта, нунын ӱмылешышт кавасе кайык-влакат шылын кертыт».
33 Шуко тыгай туштен каласкалымаш дене Иисус нунылан колышт кертмышт семын Юмын шомакым ойлен.34 Туштен ойлымо деч посна Тудо туныктен огыл. А тунемшыж-влаклан посна улмышт годым чылажымат умылтарен.
35 Тудо кечынак, кастене, Иисус тунемшыж-влаклан каласен: «Вес серышке вончена».36 Тунемшыж-влак калыкым коденыт да пушышто улшо Иисусым пеленышт налыныт. Нунын деке вес пуш-влакат ушненыт.
37 Виян тӱтан мардеж тарванен. Толкын-влак пуш тӱр гоч лупшеныт, пушышко вӱд темаш тӱҥалын.38 А пушын шеҥгел ужашыштыже, вуйжым тоҥедыш ӱмбаке пыштен, Иисус мален. Тунемшыж-влак Тудым помыжалтеныт да каласеныт: «Туныктышо! Ме пытена. Тый тидын нерген от шоналте мо?»39 Иисус кынелын, мардежым чарен да теҥызлан кӱштен: «Шып лий! Чарне!» Мардеж шыпланен, да моткоч тымык лийын.40 Тудо тунемшыж-влаклан ойлен: «Молан те тыгай лӱдшӧ улыда? Кузе ӱшанымашда уке?»41 Нуным кугу лӱдмаш авалтен, икте-весыштлан ойленыт: «Кӧ Тиде? Тудым мардежат, теҥызат колыштыт!»
*а 4:12 Ис 6:9-10.
Глава 4