Выбрать язык
Книги Ветхого Завета
Книги Нового Завета
с русским текстом1 Святой Шӱлыш дене темын, Иисус Иордан эҥер деч пӧртылын, да Тудым Шӱлыш ир мландышке наҥгаен.2 Тушто Тудым нылле кече диавол алгаштараш тӧчен. Тиде жапыште Иисус нимом кочкын огыл, а нине кече-влак эртымеке, шужымым шижын.3 Диавол Тудлан ойлен: «Тый Юмын Эрге улат гын, тиде кӱлан киндыш савырнаш кӱштӧ».4 Иисус вашештен: «Возымо: ”Айдеме кинде дене гына огыл, а Юмын кажне шомакше дене ила”».*а
5 Вара диавол Тудым кӱкшӧ курык ӱмбаке кӱшкӧ кӱзыктен, уло тӱнян чыла кугыжанышыжым иктатыште ончыктен6 да каласен: «Нине кугыжаныш-влакым да нунын мо дене чапланымыштым мый Тыйын кид йымакет пуэм. Чыла тиде мылам пуалтын, а мый кӧлан пуынем, тудлан пуэн кертам.7 Сукалтен, Мыланем вуетым савет гын, чылажат Тыйын лиеш».8 Иисус вашештен: «Мый дечем кораҥ, сатана! Возымо:
”Шке Господь Юметлан, сукалтен, вуйым саве,
ик Тудланак веле служитле”».*б
9 Вара сатана Тудым Иерусалимыш наҥгаен, храм леведыш тӱрыш шогалтен да каласен: «Тый Юмын Эрге улат гын, тышеч ӱлыкӧ тӧрштӧ.10 Возымо вет:
”Тудо Суксыж-влаклан Тыйым аралаш кӱшта:
11 йолет дене кӱэш ит шӱртньӧ манын,
нуно Тыйым кидешышт нумал наҥгаят”».*в
12 Иисус вашештен: «Каласыме: ”Господь Юметым ит терге”».*г
13 Чыла алгаштараш тӧчымыжым пытарымеке, диавол Тудын деч жаплан кораҥын.
14 Иисус Галилейыш пӧртылын, Святой Шӱлышын куатше Тудын дене лийын. Тудын нерген уло кундем мучко мут шарлен.15 Иисус нунын синагоглаште туныктен, да чылан Тудым чапландареныт.
16 Иисус Назаретыш толын – тиде олаште Тудым ончен-куштеныт – да молгунамсе семынак шуматкечын синагогыш пурен. Тудо Возымашым лудаш шогалын.17 Иисуслан пророк Исаийын книгажым пуэныт. Тудым почын да тыге возымо верым муын:
18-19 «Господьын Шӱлышыжӧ Мыйын ӱмбалнем –
Тудо Мыйым йорло-влаклан
Поро Уверым шараш шӱрен палемден,
сусыргышо шӱм-чонан-влакым паремдаш колтен.
Кучен петырыме-влаклан эрыкыш колтымо нерген,
сокыр-влаклан шинчашт почылтмо нерген увертараш,
индыралтше-влакым эрыкыш лукташ,
Господьын порылык ийже толын шумо нерген увертараш
Тудо Мыйым колтен».*д
20 Иисус книгам петырен, синагог полышкалышылан пуэн да шинчын. Синагогышто улшо-влакын чылаштын шинчашт Тудын ӱмбаке виктаралтын.21 Иисус ойлаш тӱҥалын: «Таче колыштмо тиде возымаш ынде шукталте».22 Чылан «Тудо чын» маныныт да Тудын умшаж гыч лекше порылык шомаклан пешак ӧрыныт. Нуно ойленыт: «Тудо Иосифын эргыже огыл?»23 Иисус нунылан вашештен: «Те Мыланем калыкмутым каласеда: ”Паремдыше, Шкендым Шке паремде! Капернаумышто мо лиймым ме колынна, тудымак тыште шке кундемыштетат ыште”.24 Тыланда чынак ойлем, – Иисус умбакыже ойлен, – нимогай пророкым шке кундемыштыже огыт пагале.25 Чынже дене каласем: Илия илыме годым, кунам кава петырнен, кум ий да куд тылзе кукшо шоген да уло эл мучко кугу шужымаш тӱҥалын, Израильыште шуко тулык ӱдырамаш лийын,26 но нунын кокла гыч иктыж декат Илиям колтымо огыл, а Сидонысо Сарепташте илыше тулык ӱдырамаш деке колтымо.27 Елисей пророк илыме годымат Израильыште проказе черан еҥ шуко лийын, но нунын кокла гыч иктат эрнен огыл, а Сирий гыч толшо Нееман веле».
28 Тидым колмеке, синагогышто чылан чот шыдешкеныт,29 кынелыныт да Иисусым ола гыч поктен луктыныт. Нунын олашт курыкеш чоҥымо улмаш. Иисусым шӱкал шуаш манын, курык сер деке наҥгаеныт,30 но Тудо нунын покшеч эртен каен да кораҥын.
31 Галилейысе Капернаум олаш Иисус толын да шуматкечын калыкым туныктен.32 Туныктымыжлан чылан ӧрыныт: Тудын шомакыштыже куат лийын.
33 Синагогышто шакше ия шӱлыш кучыман еҥ лийын, да тудо уло йӱкын кычкыралын:34 «Мемнам кодо, Назарет Иисус, мом Тый мемнан дене ыштынет? Мемнам пытараш толынат? Кӧ улметым мый палем, Тый Юмын Святойжо улат!»35 Но Иисус осал шӱлышым чарен каласен: «Шып лий! Кӧргыж гыч лек!» Ия тиде еҥым синагог покшелан йӧрыктен да, нимогай эҥгекым ыштыде, тудын кӧргыж гыч лектын.36 Чылан ӧрын-лӱдын шогеныт да икте-весыштлан ойленыт: «Тиде мо тыгай! Тудо куат да кучемвий дене осал шӱлыш-влаклан кӱшта, а нунышт лектыт».37 Тудын нерген йырым-йырысе чыла верлашке шомак шарлен.
38 Иисус синагог гыч лектын да Симонын пӧртышкыжӧ пурен. Симонын оньыкуваже шокшымужо дене чот орланен, да Иисусым тудлан полшаш йодыныт.39 Тудын деке лишеммеке, Иисус шокшымужылан лекташ кӱштен. Чер ӱдырамашым коден. Ӱдырамаш тунамак кынелын да уна-влакым ончаш тӱҥалын.40 А кӧн тӱрлӧ чер дене орланыше лишыл еҥже лийын гын, кече шичме годым чылан Иисус деке нуным конденыт. Тудыжо кажне черле ӱмбаке кидым пыштен да паремден.41 Тыгак шуко еҥын кӧргыж гыч ия-влак кычкырен лектыныт: «Тый Христос, Юмын Эрге улат!» Но Иисус нунылан тыге ойлаш эрыкым пуэн огыл, вет нуно Тудын Христос улмыжым паленыт.
42 Эрдене эрак Иисус лектын да тымык верыш каен. Калык тӱшка Тудым кычалын, а кычал мумеке, Иисус нунын деч ынже кай манын чараш тӧченыт.43 Но Тудо, «Мый Юмын Кугыжаныш нерген Поро Уверым моло олаштат каласкалышаш улам, тидлан Мыйым колтымо», манын44 да Галилейысе синагоглаште увертарен каласкален.
*а 4:4 Зак.уш 8:3.
*г 4:12 Зак.уш 6:16.
Глава 4