Выбрать язык
Книги Ветхого Завета
Книги Нового Завета
с русским текстом1 Иисус Христосын тарзыже‚ Юмын ӱжмӧ, Тудын Поро Увержым каласкалаш ойырен налме Апостол Павел деч7а Юмын йӧратыме да ӱжмӧ Римысе святой-влаклан.
2 Поро Уверым Юмо пророкшо-влак гоч Святой Возымаште ончылгоч сӧрен‚3 тидыже Тудын Эргыж нерген ойла‚ Тудыжо кап могырым – Давидын урлыкшо деч шочшо‚4 а шӱлышыжын святой улмыж могырым – Юмын Эрге, тидым колымаш гыч кугу куат дене ылыжме гоч почын ончыктымо. Тудо – мемнан Господьна Иисус Христос‚5 ме Тудын гоч порылыкым да Апостол пашам налынна да чыла калыкым Тудын лӱмжылан кӧра ӱшанымаш мутым колыштмашке виктарышаш улына.6 Теат‚ Иисус Христосын ӱжмӧ еҥже-влак‚ нунын кокла гыч улыда.
7б Тыланда мемнан Юмо Ачана деч да Господь Иисус Христос деч порылык да тыныслык лийже.
8 Тендан ӱшанымыда нерген уло тӱняште ойлат, сандене эн ондак Иисус Христос гоч чыланда верч Юмемлан таум ыштем.9 Эргыж нерген Поро Уверым каласкален‚ мый Юмылан шӱм-чон шӱлышем дене служитлем, да Тудо мыланем танык: мый чарныде тендам ушыштем кучем10 да‚ пытартышлан мыйын корнем Юмын кумылжо почеш тендан деке виктаралтше манын‚ кумалмем годым эреак йодам.11 Тендам пеҥгыдемдашлан Святой Шӱлышын иктаж-могай пӧлекшым тендан деке шукташ манын, мый тендам моткоч ужнем‚12 вес семынже‚ тыландат, мыланемат икте-весынан ӱшанымашланна кӧра кумылаҥаш манын шонем.13 Иза-шольо-влак‚ тыланда палдарыде ынем кодо: але марте тидлан чарак лийын гынат, мый шуко гана тендан деке мияш да‚ могай саскам моло калык коклаште налынам‚ тугайымак тендан денат налаш шоненам.14 Эллинлан да варварлан‚ ушанлан да тунемдымылан мыйын парымем уло‚15 сандене тыландат‚ Римыште илыше-влаклан‚ Поро Уверым каласкалымем шуэш.
16 Мый Христосын Поро Уверже деч ом вожыл‚ вет тудо – Юмын куатше, ӱшаныше кажне еҥлан – ондак иудейлан‚ вара эллинлан – утарымашым конда.17 Вет туштыжо Юмын чынже ӱшанымаш гыч ӱшанымашке почылтеш, вет тыге возымо: «Чын ыштыше айдеме ӱшанымашыж дене илаш тӱҥалеш»*а
18 Чыным чын огылын кепшылыштыже кучышо еҥ-влакын кеч-могай мут колыштдымышт да чын огылышт ӱмбаке Юмын шыдыже пылпомыш гыч почылтын толеш.19 Вет Юмо нерген мом палаш лиеш‚ тиде нунылан палыме: Юмо нунылан тидым палдарен.20 Тудын койдымо ойыртемже-влакым – курымашлык куатшым да Юмо улмыжым – тӱням ыштыме гычак пашаж гоч ужаш да умылаш лиеш‚ сандене тыгай еҥ-влак шкеныштым чыныш луктын огыт керт.21 Нуно Юмо нерген паленыт гынат‚ Тудым Юмо семын пагален огытыл да Тудлан тауштен огытыл‚ а нунын шонкалымышт арам лийын‚ да шонен моштыдымо шӱмыштым пычкемыш авалтен.22 Нуно шкеныштым ушан улына маныныт‚ но ушдымо лийыныт23 да колыдымо Юмын чапшым колышаш айдемын‚ кайыкын‚ ныл йоланын‚ нушкын коштшын сын-тӱсышт дене алмаштеныт.
24 Сандене Юмо нуным языкан шӱм шонымашышт дене амырчыкеш коден, тыге нуно капыштым шке намыслат.25 Нуно Юмын чынжым шоя дене вашталтеныт да тӱням Ыштышылан служитлыме олмеш Тудын мом ыштымыжым пагаленыт‚ тидлан кумалыныт. Тӱням Ыштыше курымеш моктымо лийже‚ аминь.
26 Тидлан кӧра Юмо нуным намысле кумыл шупшмылан пуэн: ӱдырамаш-влак пӱртӱс туныктымо почеш вате-марийла илымым пӱртӱс ваштареш улшо койыш дене алмаштеныт‚27 тыгак пӧръеҥ-влакат ӱдырамаш дене пӱртӱс туныктымо почеш вате-марийла илымым кудалтеныт да шакше сутланымышт дене икте-весышт деке ылыжыныт‚ пӧръеҥ ден пӧръеҥ яжарланат‚ да чын койыш деч кораҥмыштлан сулен налме мут кучыктымаш нунылан логалеш.
28 Юмым палымашым нуно йӧрдымыш луктыныт‚ сандене Юмо нуным йӧрдымӧ ушышт почеш илаш кудалтен, да нуно пышткойшым ыштат.29 Нуно тӱрлӧ чын огыл дене тич темыныт. Яжарланымаш‚ чояланымаш‚ опкынланымаш‚ шыдым кучымаш‚ кӧранымаш‚ еҥым пуштедымаш‚ ӱчашымаш‚ ондалкалымаш, еҥлан осалым шонымаш нуным авалтен.30 Нуно осал шомакым шаркалат‚ еҥ ӱмбаке ойлат да Юмым ужмышт огеш шу‚ торжа‚ моктаныше, кугешнылше улыт‚ осал пашам шонен луктын моштат‚ ача-аваштым огыт колышт.31 Нуно шонен моштыдымо улыт‚ ӱшанле огытыл‚ йӧратыдыме‚ икте-весе дене келшыдыме да чаманыдыме улыт.32 Тыге ыштыше-влак колымашым сулен налыт манын, Юмын судитлымыжым нуно палат‚ но тыгайым шке веле огыл ыштат, тыге ыштылше моло еҥымат сайлан шотлат.
Глава 1