Выбрать язык
Книги Ветхого Завета
Книги Нового Завета
с русским текстом1 Але мый Апостол омыл? Але мый эрыкан омыл? Але мый Иисус Христосым, мемнан Господьнам, ужын омыл? Господь дене ушнен шогымыда мыйын пашам огыл мо?2 Молылан мый Апостол омыл гын, тыландаже Апостол улам, вет Господь дене ушнен шогымыланда кӧра те шке мыйын Апостол улмемым ончыктышо пале улыда.
3 Мыйым титаклыше-влак ончылно теве кузе аралалтам:4 кочкаш-йӱаш мемнан эрыкна уке мо?5 Ӱшаныше ӱдырамашым – пелашым – пеленна коштыкташ моло Апостол, Господьын изаже-влак да Кифа семын мемнан эрыкна уке мо?6 Але мыйын да Варнаван гына паша ыштыде илаш эрыкна уке?7 Могай сарзе шке ӱмбач служитла? Кӧ, виноградым шындымеке, саскажым ок коч? Кӧ кӱтӱм кӱта да вольык шӧрым ок коч?8 Мый тидым айдеме шонымо семын веле ойлем мо? Законат тидымак ок ойло мо?9 Моисейын законыштыжо возымо:
«Шурным шийше ӱшкыжын умшажым ит петыре».*а
Тыге ойлен, ӱшкыж верч мо Юмо тырша?10 Але тыгай мут мемнан верч огыл? Тидым мемнан верч возымо, вет вучымым налаш ӱшанен, куралше куралшаш, шийше шийшаш.11 Ме тыланда шӱлышлан кӱлмым ӱденна гын, тендан деч каплан кӱлмым тӱредмаш кугу паша мо?12 Моло еҥынат тендан дене тыгай эрыкышт уло гын, мемнан утларак огыл мо?
Туге гынат ме тиде эрык дене пайдаланен огынал, а Христосын Поро Увержылан нимогай чаракым ышташ огыл манын, чыла чытена.13 Храмыште служитлыше-влак храм деч кочкышым налыт, жертвенник воктене служитлыше-влак жертвенник гыч шке ужашыштым налыт манын, але огыда пале?14 Тыгак Поро Уверым каласкалыше айдемат Поро Уверым каласкалыме гыч илышлан мо кӱлешым налшаш манын, Господь кӱштен.15 Но мый тыгай йӧн дене пайдаланен омыл, да шкаланем тыгайым йодаш манын огыл тидым возенам. Тыге ыштымеш, мылам колаш сайрак! Тек моктаныме амал деч посна мыйым нигӧ ок кодо.16 Мый Поро Уверым каласкалем гын, тыште мылам нимо дене моктанаш, тиде мыйын шуктышаш пашам. Поро Уверым ом каласкале гын, мылам ойго!17 Мый тидым шке кумыл дене ыштем гын, мыйым пашадар вуча, а Юмылан служитлыме пашам шукташ мыланем кумылем ваштареш ӱшанен пуымо гын,18 тугеже могай мылам пашадарже? Теве тыгай: Христос нерген Поро Уверым каласкалымем годым тудым яра увертарем, Поро Уверын пуымо эрыкше дене мый ом пайдалане.
19 Мый эрыкан улам да нигӧн кулжо омыл, но лийме семын шукырак еҥым савыраш манын, мый шкемым чылалан кулыш пуэнам.20 Иудей-влакым Поро Увер деке савыраш манын, мый иудей-влаклан иудей гай лийынам, закон йымалысе-влакым савыраш манын, закон йымалысе-влаклан нунын гаяк лийынам.21 Мый Юмын закон деч посна ом иле, вет Христосын законжо йымалне улам, но закон деч посна илыше-влакым савыраш манын, мый закон деч посна илыше-влаклан закон деч посна илыше гай лийынам,22 вийдыме-влакым савыраш манын, вийдыме-влаклан вийдыме гай лийынам. Кеч южыштым кузе-гынат утараш манын, мый чылалан чыла лийынам.23 Чыла тидым мый Поро Уверлан кӧра ыштем, вет мый шкеат тудын сайжым налнем.
24 Але те огыда пале: таҥасыме верыште ӱчашен куржшо-влак чылан куржыт, но пӧлекым икте налеш. Теат, налаш манын, тыге куржса.25 Кажне тыршыше чыла шотыштат шкенжым куча: нуно – шӱйшаш вуйшӱдышым налаш манын, а ме – шӱйдымым.26 Тугеже мый кушко куржмем палыде ом курж, южым арам ом лупшо.27 Мый, молылан Поро Уверым каласкалыше айдеме, шкежак йӧрдымыш ынем лек, сандене капем индырем да кулыш савырем.
*а 9:9 Зак.уш 25:4.
Глава 9