Выбрать язык
Книги Ветхого Завета
Книги Нового Завета
с русским текстом1 Иза-шольо-влак, чыла ачанан пыл йымалне лиймышт да теҥыз гоч эртымышт нерген тендам палдарыде ынем кодо.*а2 Пыл дене да теҥыз дене нуно чыланат Моисей дене ушнен шогаш тынеш пурталтыныт.3 Чылан Юмын Шӱлыш пуымо тудо кочкышымак кочкыныт,4 да чылан Шӱлыш пуымо тудо йӱышымак йӱыныт, вет нуно пеленышт коштшо пылпомышысо кӱ гыч йӱыныт, а кӱжӧ Христос улмаш.5 Туге гынат нунын кокла гыч шукыракышт Юмылан келшыше лийын огытыл. Тидым ир мландыште пытаралтмышт ончыкта.6 Тыгеракын, тиде мыланна шижтарымаш лийын: нунын семын ме осаллан сутланыше лийшаш огынал.7 Нунын кокла гыч южышт семын шояк юмылан ида кумал, тидын нерген «Калык кочкаш-йӱаш шинчын, вара намысдымын веселитлаш кынелын»*б манын возымо.8 Нунын кокла гыч южыштын яжарланымышт семын ме яжарланышаш огынал: тыгайже ик кечыште коло кум тӱжем колен.9 Нунын кокла гыч южыштын тергымышт семын ме Христосым тергышаш огынал: нуно кишке чӱҥгалме дене коленыт.10 Нунын кокла гыч южыштын ӧпкелымышт семын ида ӧпкеле: нуным пытарыше суксо пуштын.*в11 Чыла тиде нунын дене шижтарымаш семын лийын, а мыланна, пытартыш саманыште илыше-влаклан, туныкташ манын возен кодымо.12 Сандене, кӧ шкенжын нерген шогем манын шона, тек камвочмо деч шеклана.13 Тыланда могай тергымашым эрташ логалеш, тидыже айдемын тыглай тергымашыже веле. Юмо ӱшанле, Тудо тыланда вий шутымо деч кугурак тергымашыш логалаш ок пу. Тендам тергыме годым тушеч лекташ корнымат ямдыла, тыге те чытен кертыда.
14 Сандене, йӧратымем-влак, шояк юмылан кумалме деч кораҥ коштса.15 Мый тыланда шонен моштышо еҥ-влаклан каласкалыме семын ойлем. Мом ойлымем нерген шке шоналтыза.16 Мемнан благословитлен йӱмӧ чашына, суапландарымашын чашыже, – Христосын Вӱржӧ дене ушнымаш огыл мо? Тодылмо киндына Христосын Капше дене ушнымаш огыл мо?17 Кинде икте, сандене ме шукын ик кап улына, вет чылан ик кинде деч ужашым налына.18 Израиль калыкым ончалза: надырлан пуымым кочшо-влакын жертвенникыште ужашышт уке мо?19 Мом вара мый каласынем? Шояк юмо ала-мо ойыртемалтше улеш манын ойлем мо? Але шояк юмылан пуымо надыр ала-мо ойыртемалтше улеш манын ойлем мо?20 Уке, мый тидым каласынем: шояк юмылан кумалше-влак надырыштым Юмылан огыл, а ия-влаклан пуат. А тендам ия дене ушнышым ынем уж.21 Те Господьын чашыж гыч йӱыда гын, ия-влакын чашышт гыч йӱын огыда керт, да Господьын ӱстелже гыч кочкыда гын, ия-влакын ӱстелышт гыч кочкын огыда керт.22 Але ме Господьын шыдыжым ылыжтынена? Але ме Тудын деч виянрак улына?
23 «Кеч-мом ышташ эрыкем уло», но чылаже огыл пайдале; «кеч-мом ышташ эрыкем уло», но чылаже огыл туныктен пеҥгыдемда.24 Тек нигӧ шкаланже пайдам ок кычал, а весылан кычалже.25 Пазарыште мом ужалат, совестьлан кӧра йодышым пуыде, чыла кочса,26 вет «Мланде да тушто мо уло, чыла Господьын».*г27 Христослан ӱшаныдыме еҥ тендам уналыкеш ӱжеш, да те кайынеда гын, мом ончыкыда шындат, совестьлан кӧра йодышым пуыде, чыла кочса. –28 Но иктаж-кӧ тыланда «Тиде – шояк юмылан надырлан пуымо кочкыш» манеш гын, тидым увертарышылан кӧра да совестьлан кӧра тудым ида коч, вет «Мланде да тушто мо уло, чыла Господьын».29 А мый шке совесть нерген огыл, а весын совестьше нерген ойлем. – Молан вес еҥын совестьше мыйын эрыкемым судитлышаш?30 Мый кочкышемлан Юмылан тауштем гын, мо верч мый таум ыштем, тудын верч мыйым молан шылталаш?
31 Тугеже, те кочкыда але йӱыда, але мом гына ыштеда, чыла тидым Юмын чапше лӱмеш ыштыза.32 Иудей-влакланат, эллин-влакланат, Юмын черкыжланат шӱртняш амалым ида пу.33 Шукын утаралтышт манын, мыят шкаланем огыл, а молылан пайдам кычалын, чыла еҥлан чыла шотыштат йӧрышӧ лияш тыршем.
*а 10:1 Ончо: Лекм 13:18-21, 14:21-22.
*б 10:7 Лекм 32:6.
*а 10:8-10 Ончо: Шотл 16:41-49‚ 21:5-6‚ 25:1-18.
Глава 10