Выбрать язык
Книги Ветхого Завета
Книги Нового Завета
с русским текстом1 Юмын кумылжо почеш Иисус Христосын Апостолжо лийше Павел да Тимофей иза деч Юмын Коринфысе черкыжлан да уло Ахаийысе чыла святой еҥлан.
2 Мемнан Юмо Ачана деч да Господь Иисус Христос деч тыланда порылык да тыныслык лийже.
3 Мемнан Господьна Иисус Христосын Юмыжо да Ачаже, чаманыше Ача, чыла лыпландарымашын Юмыжо моктымо лийже.4 Тудо мемнам кеч-могай нелылык годымат лыпландара, тыгеракын, могай лыпландарымаш дене Тудо шкенам лыпландара, меат кеч-могай нелылыкыште улшо-влакым тугай лыпландарымаш денак лыпландарен кертына.5 Кузе Христосын орланымыже мыланна шукемеш, тугак лыпландарымашат Христос гоч мыланна шукемеш.6 Ме йӧсланена гын, тыланда лыпландарымаш да утарымаш лийже манын йӧсланена. Могай йӧсланымашым ме чытена, теат тугайымакым чытеда гын, Юмо тыланда утарымашым пуа.7 Тендан нерген мемнан ӱшанна пеҥгыде. Мыланна лыпландарымаш пуалтеш гын, тыланда лыпландарымаш да утарымаш толышт манын лиеш. Ме палена: кузе те мемнан орланымашке ушнеда, тугак лыпландарымашкат ушнеда.
8 Иза-шольо-влак, Асийыште мыланна логалше нелылык нерген тендам палдарыде ынена кодо. Ме моткоч чот, вий шутымо деч утларак кугу нелылыкыш логалынна ыле, илен кодашат ӱшаннам йомдаренна,9 колымашлан судитлыме улына манын шоненна. Ме шкаланна огыл, а колышо-влакым ылыжтыше Юмылан ӱшанышаш улына, сандене тыге лийын.1011 Юмо тыгай колымаш лӱдыкшӧ гыч мемнам утарен да утара. Теат мемнан верч кумалмыда дене мыланна полшеда гын, Тудо мемнам ончыкыжымат утараш тӱҥалеш манын, ме Тудлан ӱшаннам пыштенна. Тыгеже шуко еҥын кумалмыштлан кӧра мыланна ыштыме порылык верч Юмылан шукын таум ыштат.
12 Теве мо дене кугешнена: тиде тӱняште да поснак тендан коклаште ме айдеме уш-акыл почеш огыл, а Юмын порылыкшо почеш, Юмылан келшыше поро чон да яндарлык дене иленна манын, шке совестьна таныкла.1314 Ме тыланда весым огыл, а мом те лудыда, мом те умыледа, тудым веле возена. Те мемнам икмыняр ынде умыленда, но мучаш марте тидым ыҥледа манын ӱшанымем шуэш: Господьна Иисусын кечынже те мемнан дене кугешнеда, меат тендан дене кугешнена.
15 Тиде ӱшан дене мый тендан деке ончычак мийынем ыле. Те Юмо деч кокымшо гана порылыкым налза манын шоненам.16 Македонийыш кайымем годым тендан деке пураш да Македоний гыч угыч тендан деке толаш шоненам, а те мыйым Иудейыш ужатен колтеда ыле.17 Тыге шонымем дене шоналтыде ыштенам мо? Але мый мом ыштышашым кап ден чон йодмо почеш шонен пыштем мо? Ойлем мо ик жапыштак «туге, туге», «уке, уке»?18 Юмо ӱшанле: мом ме тыланда ойленна, ик жапыштак «туге» да «уке» лийын огыл.19 Мемнан – мыйын, Силуанын да Тимофейын – тендан коклаште каласкалыме Юмын Эрге Иисус Христос дене «туге» да «уке» лийын огыл, Тудын дене «туге» лийын.20 Вет Юмын чыла сӧрымыжӧ – Тудын дене «туге» да Тудын дене «аминь». Сандене Юмылан мемнан гоч чапландарымаш лиеш.21 Мемнанат, тенданат Христос дене ушнымынам пеҥгыдемдышыже да мемнам шӱрен палемдышыже – тиде Юмо.22 Тудак мемнам палемден, шӱмышкына залог шотеш Шӱлышым пуэн.
23 Мый тендам чаманымемлан кӧра але марте Коринфыш миен омыл, тидым таныклаш Юмым ӱжам да чонем дене товатлем.24 Туге гынат ме тендан ӱшанымыдам шкенан кид йымалне ынена кучо, а куаныше лияшда ме тендан дене пырля ыштена, вет тендан ӱшанымашда пеҥгыде.
Глава 1