Выбрать язык
Книги Ветхого Завета
Книги Нового Завета
с русским текстом1 Чынжым гын святой-влаклан полшымо нерген тыланда возаш мыланем кӱлешыже уке.2 Вет мый тендан пуаш шонымыдам палем да, Ахаий кундем кодшо ий гычак тидлан ямде манын, Македонийыште илыше-влак ончылно тендан дене кугешнен ойлем. Тендан тыршымыда шукыштым пуаш кумылаҥден.3 Тендан дене кугешнымына тиде пашаште арам ынже лий да те мыйын ойлымем семын ямде шогыза манын, мый иза-шольо-влакым колтенам.4 Македонийыште илыше-влак мый денем пырля толыт да тендан ямде огыл улмыдам ужыт гын, ме тендам тынар моктымыланна кӧра вожылмашке логалына ыле – ойлымо деч поснат раш, могай намыс тыланда лиеш ыле.5 Тугеже мый дечем ончыч тендан деке мияш да ондак сӧрымӧ пӧлекдам шотыш кондаш иза-шольо-влакым йодаш кӱлешлан шотленам. Тунам пӧлек ӧкымлен налме окса семын огыл, а шке кумылын погымо надыр семын ямде лиеш.
6 Тидым ойлем: кӧ чаҥган ӱда, тудо шагал тӱредеш, а кӧ лыҥ ӱда, тудо лыҥак тӱредеш.7 Кажныже шӱмыштыжӧ шонен пыштыме семын пуыжо, ойганен але ӧкымлымӧ почеш ыштыман огыл, вет куанен пуышым Юмо йӧрата.8 Юмын тыланда тӱрлӧ порым лыҥ пуаш куатше уло, сандене те чыла шотыштат эре ситышан лийыда да шуко тӱрлӧ поро пашам ыштен кертыда.9 Тыге возымо:
«Тудо шеледа, йорло-влаклан пуа,
чын ыштымыже курым-курымешлан кодеш».*а
10 А ӱдышылан урлыкашым да кочкаш киндым пуышо Юмо тендам шуко урлыкаш дене пойдара да порым ыштымыдан саскажым шукемда.11 Те тӱрлӧ порылыклан чыла шотыштат поеда, тыгеракын, мемнан пашана гоч тендан пӧлекда Юмылан тауштымашым конда.12 Вет тиде полшымо паша святой-влакын укештым веле огыл тема, но Юмылан шуко еҥын утыр тауштымыжым конда.13 Кунам те тиде пашаште шкендан чын улмыдам ончыктеда, тунам тендан верч Юмым чапландараш тӱҥалыт, вет те Христосын Евангелийжылан ӱшанымыдам почын ойледа, тудым колыштшо улыда да нунын дене да чыла моло дене ару чон дене кылым кучеда.*б14 Нуно тендан верч кумалаш тӱҥалыт, да Юмын тыланда лыҥ ончыктымо порылыкшылан кӧра тендан деке кумылышт савырна.15 Каласен мошташ лийдыме пӧлекшылан Юмылан тау!
*б 9:13 «Нунын дене да чыла моло дене ару чон дене кылым кучеда»: грек мутым «Нунын дене да чыла моло дене кылым кучен, шкендан деч ару чон дене пуэда» манынат кусараш лиеш.
Глава 9