Выбрать язык
Книги Ветхого Завета
Книги Нового Завета
с русским текстом1 Мый, Павел, – тудак, кӧ тендан дене пырля улмыж годым тугай ӱҥышӧ, укеж годым пеҥгыде – тендам Христосын тыматле да поро улмыжо дене шке сӧрвалем:2 тендан деке толмекем, мыйым тыланда пеҥгыдын ида ойлыкто, вет ме пуйто кап да чон йодмо почеш илена манын шотлышо еҥ-влаклан мый чот пеҥгыде лияш шонем.3 Молан манаш гын кап да чон дене илена гынат, ме кап да чон почеш огыл кучедалына,4-5 вет мемнан кучедалме саргурална капын да чонын огыл. Кеч-могай пеҥгыде карманым Юмын куатше дене шалатен кертше саргурална уло, тудын дене тӱрлым шонен пыштымым да Юмым палымаш ваштареш кугешнен нӧлталтше кажне чаракым сӱмыралына да кажне шонымашым Христосым колышташ савырена.6 Тендан мут колыштмыда тичмаш лиймеке, чыла ой колыштдымашым мут кучаш шогалташ ямде улына.
7 Мо тендан шинча ончылныда, тудым ончеда мо? Кӧ Христосын улам манын ӱшана гын, меат тудын семын Христосын улына манын шотлыжо.8 Господь мыланна кучемвийым пуэн, тиде кучемвий дене ме тендам шалатышаш огыл, а пеҥгыдемдышаш улына. Тидын дене мый утларакат кугешнем гын, намысыш ом пуро.9 Тендам серышем-влак дене лӱдыкташ тыршем манын, тыланда ынже кой.10 Вет ала-кӧ ойла: «Павелын серыш-влакше пеҥгыдын йодшо да виян, а мемнан дене шке лиймыж годым вийдыме, ойлымыжат тудын куатдыме».11 Тыгай еҥ тек умыла: укена годым ме серыш мут дене могай улына, улмына годым пашана денат тугаяк улына.
12 Вет кӧмыт шкеныштым шке моктен темлат, тугай-влак дене ме шкенам иктӧрыш шындаш але таҥастараш огына тошт. Нуно, умылен моштыде, шкеныштым шкешт денак висат да шкеныштым шкешт денак таҥастарат.13 А ме палемдыме деч утым огына кугешне, а Юмын мыланна висен пуымыж наре веле, тиде висен пуымо кумдыкшо тендан декат шуэш.14 Ме пуйто тендан деке шудымо гай утыждене огына тырше, вет Христосын Поро Уверже дене ме тендан декат шуынна.15 Ме утым огына кугешне, еҥ паша дене огына моктане, но ӱшанен вучена: ӱшанымашда кушмо дене тендан коклаште мыланна пуымо кумдык чот шарла,16 да, весе-шамычын шке кумдыкыштышт ыштыме паша дене моктаныде, тендан дечат тораште Поро Уверым каласкален кертына.17 «Кӧ моктанынеже гын, тек Господь дене моктана».*а18 Кӧ шкенжым шке моктен темла, тудо сайлан ок шотлалт, а кӧм Господь темла – тудо.
Глава 10