Выбрать язык
Книги Ветхого Завета
Книги Нового Завета
с русским текстом1 Иисус Христосын почмашыже; вашке мо лийшашым шке тарзыж-влаклан ончыкташ манын, тиде почмашым Юмо Тудлан пуэн. Тудыжо чыла тидым Иоанн тарзыже деке колтымо Суксыж гоч палдарен.2 Юмын шомакше да Иисус Христосын таныклымыж нерген, мом ужын, чылаж нерген Иоанн тыште таныклен каласкала.3 Пророклен ойлымо тиде шомакым лудшо да тидым колыштшо-влак, тушан возымым шуктышо-влак пиалан улыт: шукталтме жап чакемын.
4-5 Иоанн деч Асий кундемысе шым черкылан.
Кӧ уло, Кӧ лийын да Кӧ толеш, Тудын деч, Тудын престол ончылнысо шым шӱлыш деч да колышо-влак кокла гыч эн ондак ылыжше, мландымбалысе кугыжа-влакын онышт лийше ӱшанле таныклыше Иисус Христос деч тыланда порылык да тыныслык лийже.
Тудо мемнам йӧратен да шке Вӱржӧ дене языкна деч мушкын эрыктен,6 Юмын, шке Ачажын, кугыжа ден иерейже-влакым мемнам ыштен. Тудлан курым-курымеш чап да вий лийже! Аминь.
7 Теве Тудо пыл коклаште толеш,
Тудым чылан шке шинчашт дене ужыт,
ужыт Тудым шуралтыше-влакат,
мландымбалысе чыла тукым
Тудын верч ойганен шорташ тӱҥалеш.
Тыгак лиеш, аминь.
8 «Мый – Альфа ден Омега,*б Тӱҥалтыш ден Мучаш улам», – ойла Господь, Тудо, Кӧ уло, Кӧ лийын да Кӧ толеш, Чылакучышо.
9 Мый, Иоанн, Иисус Христосын орлыкшым, Кугыжанышыжым да чытымашыжым тендан дене пырля налше изада, Юмын шомаклан да Иисус Христосын таныклымыжлан кӧра Патмос манын лӱмдымӧ отрошто лийынам.10 Господьын кечынже*в мыйым шӱлыш авалтен, да пуч гыч лекше гай виян йӱкым шке шеҥгелнем колынам. Тудыжо ойлен: «Мый Альфа ден Омега, Икымше ден Пытартыш улам.11 Мом тый ужат, книгаш возо да Асийыште улшо черке-влаклан колто: Ефесыш, Смирнаш, Пергамыш, Фиатираш, Сардисыш, Филадельфийыш да Лаодикийыш».
12-13 Мый денем ойлышо йӱк кӧн манын, мый ончалаш савырнышым. Савырнымеке, шым шӧртньӧ светильникым да нунын коклаште Айдеме Эргыла койшым ужым. Тудо кужу вургемым*г чийыше да оҥ тураште шӧртньӧ ӱштым ӱшталше лийын.14 Тудын вуйжо да ӱпшӧ ош меж гай, лум гай ошо, а шинчаже тулйылме гай лийыныт,15 йолжо йолгыжшо той гай, пуйто коҥгаш шуарыме, а йӱкшӧ кугу вӱд лӱшкымӧ гай лийын.16 Пурла кидыштыже Тудо шым шӱдырым кучен, умшаж гыч кок могырге пӱсӧ керде лектын, а шӱргыжӧ – уло вийын йолгалтше кече гай.
17 А кунам мый Тудым ужынам, йол воктекыже колышо гай камвозынам. Тудо пурла кидшым мыйын ӱмбакем пыштен да ойлен: «Ит лӱд. Мый Икымше да Пытартыш18 да Илыше улам; Мый колышо лийынам, а теве Мый курым-курымеш илыше улам, аминь, да колымаш ден тамыкын*д сравочышт Мый денем.19 Тугеже, мом ужметым – мо кызыт уло да тылеч вара мо лийшаш – возо.20 Пурла кидыштем тыйын ужмо шым шӱдыр да шым шӧртньӧ светильник теве тидым ончыктат: шым шӱдыр – шым черкын Суксыж-влак, тыйын ужмо шым светильникше – шым черке.
*а 1 Грек йылмыште тиде книга «Апокалипсис» маналтеш, тиде мут почмашым але кончы машым ончыкта.
*б 1:8 «Альфа ден Омега»: грек буква радамыште икымше ден пытартыш буква.
*в 1:10 «Господьын кечынже»: рушарнян.
*г 1:12-13 «Кужу вургем» – грек текстыште «подир», тиде иудей кугыжа ден архиерей-влакын чийыме вургемышт.
*д 1:18 Тамыкын – але: «вес тӱнян».
Глава 1