Выбрать язык
Книги Ветхого Завета
Книги Нового Завета
с русским текстом1Ся пинкнень Сеннааронь*а оцязорсь Амрафел, Елласаронь оцязорсь Ариох, Еламонь оцязорсь Кедорлаомер и Гоимонь оцязорсь Фидал2марса тусть тюрема Содомонь оцязорть Берань, Гоморрань оцязорть Биршань, Адмань оцязорть Шинавонь, Севоимонь оцязорть Шемеверонь каршес и Бела ошть, лиякс мярьгомс, Сигорть оцязоронц каршес.3Сембе ня вете оцязорхне кочказь ушмовийснон*б Сиддим лашмоса, коса тяни Салу оцюведсь*в.
4Кемгафтува киза синь ульсть Кедорлаомеронь кядялонза, а кемголмувоце кизоня кеподсть.5Кемнилиеце кизоня сась Кедорлаомер и оцязорхне, конат ульсть мархтонза, и сяськозь рефаипнень Аштероф-Карнаимса, зузипнень Гамса, эмипнень Шаве-Кириафаимса,6и хорейхнень Сеир пандснон лангса, кона таргавсь Эл-Фаранть самс, кона шавмодать ваксса.7Тоста синь мрдасть меки и састь Мишпат лихтибряти, кона нинге лемневи Кадескс, и сяськозь амаликитятнень, и сявозь синь сембе модаснон, тяконь лаца тисть аморрейхнень мархтонга, конат эрясть Хацацон-Фамарса.
8Эста Содомонь оцязорсь, Гоморрань оцязорсь, Адмань оцязорсь, Севоимонь оцязорсь и Белань, лиякс мярьгомс, Сигоронь оцязорсь лиссть ня оцязорхнень каршес, и Сиддим лашмоса стяфтозь ушмовийснон, и тюремась ушедсь:9Еламонь Кедорлаомер оцязорть, Гоимонь Фидал оцязорть, Сеннааронь Амрафел оцязорть и Елласаронь Ариох оцязорть мархта, – ниле оцязорхне вететнень каршес.10Сиддим лашмоса ламоль лоткта, конат пяшкотьфтольхть педи модавайса*Г. Ворьгодемста Содомонь и Гоморрань оцязорхнень кой-кона ушманцна прасть-ваясть ня лоткненди, а лиятне ворьгодсть панттненди.11Сяськихне сявозь Содомть и Гоморрать сембе уликс-пароснон, сембе ярхцамбяльснон и тусть.12Синь сявозь Лотоньге, Аврамонь брадонц цёранц, кона ся пингть эрясь Содомса. Тяфта жа синь сявозь сонь уликс-паронцка.
13Шиса лятфнень эзда фкясь сась еврейти Аврамонди и азондсь тейнза тянь колга. Ся пингть Аврам эрясь тумоналть ваксса, кона ульсь Мамренне, Амореень ломанть. Мамре ульсь Эшколонь и Анеронь брадсна, и сембе синь кирдезь Аврамонь ширенц.14Мзярда Аврам кулезе: брадонц цёрац сявф полонц*Д, сон кочкась эсь урензон эзда колма сятт кемгафксува аля, конат шачфтольхть сонь кудсонза и маштсть тюрема, и мольсь ниле оцязорхнень мельге Данть самс.15Тоса сон явозень эсь ломанензон, и веньгучкать сембе марс вргятсть каршек молихнень лангс, сяськозь синь и ласьксть мельгаст Ховать самс, кона Дамаскть эзда кельме ширеса.16Аврам мрдафтозе сембе уликс-пароть, Лотонь – брадонц цёранц, и сембе сонь уликс-паронц, аватненьге, и лия ломаттненьге.
17Мзярда Аврам мольсь меки Кедорлаомеронь и лия оцязорхнень сяськомдост меле, конат ульсть Кедорлаомеронь мархта, Содомонь оцязорсь лиссь каршезонза Шаве лашмоти, кона нинге лемневи Оцязоронь лашма.18Мелхиседек*е, Салимонь оцязорсь, кандсь Аврамонди кши и вина. Сон ульсь Инь Вярдень Шкайть озксвятиец*ж,19и сон бславазе Аврамонь, мярьгомок:
«Аврам, катк Инь Вярдень Шкайсь,
менельть и масторть Тииец, бславатанза тонь.
20Катк ули шнаф-бславаф Инь Вярдень Шкайсь,
кона макссь тейть сяськомс лангозт молихнень».
Аврам максозе тейнза кемонце пяльксть тюремвастста сембе сявфть эзда.
21Содомонь оцязорсь мярьгсь Аврамонди: «Максыть тейне монь ломаннень, а уликс-пароть катк эстейть».22Но Аврам мярьгсь Содомонь оцязорти: «Мон кеподьса кядезень Азорти, Инь Вярдень Шкайти, менельть и масторть Тииенцты, и варазь*и азса:23мон мезевок аф сяван тонь уликс-пароцень эзда, аф сюре пакш, аф сандалиянь шнаня. Афолеть мярьгов меле: "Мон козякофтыне Аврамонь".24Тейне аф эряви мезевок, сяда башка, мезсь тусь ломаттненди ярхцамбяленди. И катк эсь пяльксснон сявсазь сят, кит якасть мархтон: Анер, Эшкол и Мамрий, катк синь сявсазь эсь пяльксснон».
*а 14:1 Вавилононь
*б 14:3 ушмовий – войско, армия
*в 14:3 лиякс Кулоф оцюведь; Мёртвое море
*г 14:10 модавай – земляная смола, нефтяная смола
*д 14:14 полон – плен
*е 14:18 Мелхиседек лемть смузец – видексшинь оцязор. Салимонь оцязор – сетьмошинь оцязор.
*ж 14:18 озксвяти – священник
*и 14:22 варамс – клясться
Глава 14