Выбрать язык
Книги Ветхого Завета
Книги Нового Завета
с русским текстом1Азорсь мярьгсь Моисеенди: «Архт фараонти и азк тейнза: "Тяфта корхтай Азорсь, еврейхнень Шкайсна: Нолдак Монь ломаньтналозень, катк сон моли Тейне сюконяма.2А кда тонь аф ули мяльце нолдамс сонь, и тага кармат кирнемонза,3эста, ватт, Азорть кядец прафтсыне тонь жувататнень, конат паксясот: алашатнень, ишипнень, верблюттнень, тракснень-букатнень и учатнень-сяватнень. Лангозост прай пяк стака кулофты урма.4Ся пингть Азорсь явфтсыне Израилень жувататнень Египетонь жувататнень эзда. Израилень ломаньтналть жуватанзон эзда аф кулы фкявок"».5Азорсь ладясь пинге и мярьгсь: «Ванды Азорсь тисы тянь тя масторса».6Омбоце шиня Азорсь тиезе тянь. Кулость Египетонь сембе кудонь жувататне, а Израилень ломаньтналть жуватанзон эзда фкявок ашезь кула.7Мзярда фараонць кучсь содамс тянь колга, тейнза пачфтезь: «Виде, Израилень ломаньтналть жуватанзон эзда фкявок ашезь кула». Но фараонть седиец кевонзась, и сон ашезе нолда ломаньтналть.
8Азорсь мярьгсь Моисеенди и Аарононди: «Сявода пянакудста пяшксе курмозень кулу, и катк Моисей фараонть инголе ёрдасы кулуть менели.9Кулусь тиеви пулькс, кона срады сембе Египетонь масторга, и сембе Египетса ломаттнень и кудонь жувататнень ронгснон лангса лисихть сяряди сыияфкст».10Синь сявсть пянакудста кулу и арасть фараонть инголи. Моисей ёрдазе кулуть менели, и сяряди сыияфксне лисендсть ломаттнень и кудонь жувататнень ронгснон лангса.11Сыияфкснень сюнеда колдуттне мезевок исть тиев Моисеень каршес, сяс мес лангсост и Египетонь сембе ломаттнень лангса ульсть сыияфкст.12Но Азорсь кевонзафтозе фараонть седиенц, и сон ашезень кулхцонда синь, кода и мярьгондсь Азорсь Моисеенди.
13Азорсь мярьгсь Моисеенди: «Ванды стяк варьхмодемшовор, листь фараонть инголи и мярьк тейнза: "Тяфта корхтай Азорсь, еврейхнень Шкайсна: Нолдак Монь ломаньтналозень, катк сон сюконяй Тейне,14афток тяни Мон кучсайне лангозт, тонь покодихнень и ломаньтналцень лангс сембе кальдяфнень: содалить, масторлангса аш кивок Монь лацон.15Кда Мон венептелине кядезень и кучелине лангозт и ломаньтналцень лангс кулофты урманень, эста тон улелеть машфтф масторлангста.16Но Мон ванфтыхтень тонь, сяс мес мялезе няфтемс тейть Эсь виезень, и тянь вельде Монь лемозе арай содаф сембе масторлангть келес.17Тон нинге тянемс кепсесак пряцень Монь ломаньтналозень инголе и молят каршек, аф нолямок сонь?18Ватт, ванды тяка пингть Мон кучан пяк оцю цярахман, конань лаца ашель Египетса ся пингста сявомок, мзярда сонь тиезь-стяфтозь, и тяниень пингть самс.19Сяс тяни кучт ломатть кочкамс лата алу стадатнень и сембоцень, мезсь паксяса. Сембе ломаттнень и жувататнень лангс, конат лядыхть паксяв и аф кяшихть куду, прай цярахман, и синь кулыхть"».20Фараонть ся покодиенза, конат пельсть Азорть валдонза, куроконе кочказь эсь покодиснон и жуватаснон кудга-кардова,21а кит ашезь шарфта седиснон Азорть валонцты, сят кадозь эсь покодиснон и жуватаснон паксяса.
22Азорсь мярьгсь Моисеенди: «Венептьк кядцень менельти, и цярахманць прай сембе Египетонь масторть лангс, ломаттнень, жувататнень и сембе паксянь тишетнень лангс Египетонь масторса».23Моисей венептезе байдеконц менельти, и Азорсь кучсь атям и цярахман, и ёндолсь цяпиесь масторть лангс. Азорсь прафтозе цярахманть Египетонь масторть лангс.24Мольсь цярахман, и ёндолсь кфчиесь цярахманть молемста. Тяфтама вии цярахман ашель сембе Египетонь масторса ся пингста сявомок, кода Египетонь ломаньтналсь кармась эряма тоса.25Цярахманць машфтозе-тапазе Египетонь масторть келес семботь, мезсь ульсь паксяса, ломаттненьге, жувататненьге; сон тапазе паксянь сембе тишеть и синнезень паксянь сембе шуфттнень.26Аньцек Гесем модаса, коса эрясь Израилень ломаньтналсь, ашель цярахман.
27Фараонць кучсь Моисеень и Аарононь мельге, тердезень и мярьгсь тейст: «Тяни мон тиень пеже. Азорсь виде, а мон и монь ломаньтналозе муворуфтама.28Озондода Азорти, лотказа Шкаень атямсь и цярахманць, и эста мон нолдатядязь тинь и оду аф карман кирнемонт».29Моисей мярьгсь тейнза: «Кодак аньцек мон лисян ошста и кеподьсайне кяднень Азорти, эста лоткай атямсь, и цярахманга оду аф ули. Тянь вельде тон содасак: масторсь Азорть кядьса.30Но мон содаса, тон и тонь покодихне тянемс аф пельхтяда Азор Шкайть эзда».
31Иляназсь*а и шужсь*б тапафт цярахманца, сяс мес шужсь кенерсь нолдамс сёропрят, а иляназсь панжемс.32А тозерсь и вишсь*в апак тапакт цярахманца, сяс мес синь сяда меле каяйхть пилькст.
33Моисей лиссь фараонть ширде, тусь ошста и кеподезень кядензон Азорти. Эста атямсь и цярахманць лоткасть, пиземське лоткась молемда масторть лангс.34Мзярда фараонць няезе: пиземсь, цярахманць и атямсь лоткасть, сон поладозе пежень тиеманц, и сон сонць и сонь покодиенза кевонзафтозь эсь седиснон.35Фараонть седиец ульсь кевонзаф, и сон ашезе нолда Израилень ломаньтналть, кода и мярьгондсь Азорсь Моисеень вельде.
*а 9:31 иляназ – лён
*б 9:31 шуж – ячмень
*в 9:32 виш – полба; один из видов пшеницы
Глава 9