Выбрать язык
Книги Ветхого Завета
Книги Нового Завета
с русским текстом1Азорсь мярьгсь Моисеенди: «Архт фараонти. Мон кевонзафтыне сонь седиенц и покодиензон седиснон, сяс мес тянь вельде Мон няфтьсайне дивань тяштьксонень синь ётксост,2и меле тон кармат азонкшнема цёрацти и унокцти сянь колга, мезе Мон тиень Египетса, и ся дивань тяштьксонень колга, конатнень Мон няфтине тоса. Тяфта тинь содасасть – Мон Азорсь».3Моисей и Аарон састь фараонти и мярьгсть тейнза: «Тяфта корхтай Азорсь, еврейхнень Шкайсна: "Мзярс нинге кармат прянь кепсезь молема Тейне каршек? Нолдак Монь ломаньтналозень, катк сон моли Тейне сюконяма.4А кда аф нолдасак ломаньтналозень, эста ватт, ванды Мон кучан циледихть аймакцень лангс.5Синь вельхтясазь модать лангонц, нльне модаське аф кармай няевома. Синь сивсазь сянь, мезе лядсь-ванфтовсь цярахманда меле. Тяфта жа синь порьсазь сембе шуфттнень, конат касыхть тинь паксясонт.6Циледихне пяшкодьсазь тонь куттнень, тонь сембе покодихнень и сембе Египетонь эряйхнень кудснон. Тяфтама исть няенде аф алянте, аф атянь-атянте ся шиста сявомок, кода синь састь эряма тя масторти, и мянь тячиень шить самс"». Моисей шарфтсь и тусь фараонть эзда.
7Эста фараонть покодиенза мярьгсть фараонти: «Ламос нинге сон кармай маятафнемонк? Нолдайть ня ломаттнень, катк синь молихть и сюконяйхть Азорти, Шкайснонды. Дяряй тон нинге аф няйсак: Египетсь юмси-арси?»8Моисеень и Аарононь мрдафтозь фараонти, и фараонць мярьгсь тейст: «Арда и сюконяда Азорти, эсь Шкаентенди. Аньцек кит-кит эздонт молихть?»9Моисей мярьгсь: «Минь сембе мольхтяма, оттневок, сиретневок. Минь мольхтяма цёраньконь и стиреньконь мархта, учаньконь-сяваньконь и траксоньконь-буканьконь мархта, сяс мес минь ётафттама Азорти ила».10Фараонць мярьгсь тейст: «Катк Азорсь ули мархтонт станя же, кода мон нолдасайне мархтонт идентень. Мон няйса, тинь седисонт каннетяда аф пара тев!11Аф! Катк аньцек алянте молихть и сюконяйхть Азорти стане, кода тинь вешеде кядьстон». И синь панезь фараонть эзда.
12Эста Азорсь мярьгсь Моисеенди: «Венептьк кядцень Египетонь масторть шири, и катк циледихне врьгятихть Египетть лангс, и сивсазь сембе модань касыкснень, семботь, мезсь ванфтовсь цярахманда меле».13Моисей венептезе байдеконц Египетонь масторть шири, и Азорсь кучсь ся масторть лангс шинь стяма ширдень варма, кона уфась шиньберьф и веньберьф. Мзярда сась шобдавась, шинь стяма ширдень вармась усксь циледихть.14Циледихне вргятсть сембе Египетонь масторть лангс и пяк оцю лувксса вельхтязь сембе модать. Тяда инголе тняра циледи вестевок ашель, и тяда мелевок аф ули.15Синь сяшкава вельхтязь сембе модать лангонц, нльне модась ашезь няев. Синь сивозь модань сембе касыкснень и шуфтста сембе имошнень, конат ванфтовсть цярахманда меле. Сембе Египетонь масторса ашезь ляда мезевок сянгяря: аф шуфттнень лангса, аф паксянь тишеса.
16Эста фараонць курокста тертьфтезень Моисеень и Аарононь и мярьгсь: «Мон тиень пеже Азорть, тинь Шкаентень, инголе и тинь инголент.17Тяни мон эняльдян, тага весть нолдасть монь пежезень и озондода Азорти, эсь Шкаентенди, катк сявсы монь эздон тя куломань зиянть».18Моисей лиссь фараонть ширде и озондсь Азорти.19И Азорсь кучсь шинь валгома ширде пяк вии варма, кона салазень циледихнень и ёрдазень синь Якстерь оцюведти. Сембе Египетонь масторса ашезь ляда фкявок циледи.20Но Азорсь кевонзафтозе фараонть седиенц, и сон ашезе нолда Израилень ломаньтналть.
21Азорсь мярьгсь Моисеенди: «Венептьк кядцень менельти, и Египетонь масторть лангс валги шобда, пяк туста шобда».22Моисей венептезе кяденц менельти, и сембе Египетть лангс валгсь туста шобда, кона кирдсь колма шит.23Ломаттне ашесть няе фкя-фкянь, и колма шит кивок ашезь стякшне эсь вастстонза. Валдоль аньцек тоса, коса эрясь Израилень ломаньтналсь.
24Фараонць тердезе Моисеень и мярьгсь: «Арда сюконяда Азорти. Идентевок катк молихть мархтонт, но учанте, сяванте, траксонте и буканте катк лядыхть тяса».25Но Моисей мярьгсь каршезонза: «Максыть тейнек жуватаньконьге, вдь тейнек эряви кандомс озксказнет и марнек плхтамань озксказнет Азорти, Шкаеньконди.26Катк стаданьке молихть мархтонк, и фкявок жувата тяза ляда тяса, сяс мес синь эздост минь сяфтяма озксказненди Азорти, Шкаеньконди. Mзярс минь аф сатама тов, минь аф содасаськ, мезе кандомс Азорти озксказненди».27Но Азорсь кевонзафтозе фараонть седиенц, и сонь ашель мялец нолдамс синь.28Фараонць мярьгсь тейнза: «Тук эздон, и ватт, оду тят сашенда монь сельминголен. Ся шиня, мзярда няйсак монь шамазень, тон кулат».29Моисей мярьгсь каршезонза: «Кода тон азыть, стане и ули. Мон оду аф няйса тон шамацень».
Глава 10