Выбрать язык
Книги Ветхого Завета
Книги Нового Завета
с русским текстом1«Тяйть пачфне васькафни корхтафтоматнень пилеста пилес и васькафнема вельде тяк аралакшне муворуть судса.
2Тят моле ламотнень мяльснон мельге кяжень тиемаса и судса тят корхта аф видеста ламотнень мяльснон ваноманкса.3Ашутьке ширес тят арсе туфталфтома, но судонь тефнень ваныть фкакс видеста.
4Кда мусак душманцень эрьготьф буканц али ишимонц, эста вятьк сонь тейнза.5Кда няйсак душманцень ишимонц, кона праф стака канксонц ала, тяк кадонда сонь тяфтак, но лезтт тейнза кеподемс ишимть.
6Тяк суденда ашуть пялькстомань тевонц аф видеста.7Ворьготть аф виде муворгофтомать эзда и тяк шавонда аф муворуть и виде ломанть, сяс мес Мон аф лувса видексшинь ломанькс сянь, кие тии кяжи тев.8Тят сявонде мялень полафты казнет*а, сяс мес тяфтама казнетне няихнень тиендьсазь сокоркс и колсесазь виде ломаттнень тевснон.
9Ширде сафть тяк обжа: тинь содасать, мезе стамсь улемс ширде сафокс, сяс мес тинць уледе ширденнекс Египетонь масторса».
10«Кота кизот витцек модацень и кочксить иможензон,11но сисемце кизоня тяк соксе сонь, макст модати ваймамс. Катк тя пингста эздонза андыхть пря тонь ломаньтналцень ашувонза, а сянь мезе ляды мельгаст, катк сивсазь паксянь жувататне. Тяконь лаца тиентть виноградонь и вайшуфтонь перетнень мархта.12Кота шит тиендить эсь тефнень, а сисемце шиня тят покоде: ваймаза букацевок, ишимцевок, и кочказа вийхть аваурецень цёрац и ширде сафське.
13Тиендесть семботь, мезе Мон мярьгонь тейнть. Лия шкайхнень лемснон тясть кунце. Тяст маряв синь тинь кургстонт».
14«Колмоксть кизоти ётафнеда Тейне илат.15Ётафнек аф шапама кшинь илать: сисем шит ярхцак аф шапама кшида, кода Мон кошардыхтень тонь. Тиентьк тянь Авив ковть ладяф пингстонза, сяс мес ся ковста тон лисеть Египетста. И катк кивок аф сашенды Монь шамаликозень инголи шавонь кятть.16Ётафнек нумань илатьке, мзярда кочкасайть васень имошнень, конатнень тон витцить эсь паксясот. А кизоть песта, мзярда тон кочкасайть паксястот сембе озафтф имошнень, ётафнек сёронь урядама илать.17Колмоксть кизоти сембе алянтенди эряви сашендомс Сембонь Кирдить, Азорть, шамаликонц инголи.
18Мзярда кандат Тейне озксказненди жувата, тяк валонда сонь веронц кшить лангс, кона ичф шапафтома мархта, и илань озксказнезень куянц тяк кадонда шобдавать самс.
19Кандыть Азорть, Шкайцень, кудозонза васень имошнень эзда инь цебярьхнень, конат кочкафт паксястот.
Тяк пице сявань лефксть тядянц лофцсонза».
20«Ватт, Мон кучан тонь инголет ангел, кона кармай ванфнемот тонь ки лангса и вяттянза ся вастти, конань Мон аноклайне.21Сембе мяльса пяшкотькшнек сянь, мезе Сон мярьги, тят моле Тейнза каршек. Сон аф нолдасыне тинь пежентень, сяс мес эсонза Монь лемозе.22Кда тон улят кулхцондыкс сонь вайгяленцты и кармат пяшкотькшнемонза семботь, мезе Мон азан, эста Мон аран душманкс тонь душматтненди и каршек моликс тонь лангозт каршек молихненди.23Ангелсь, конань Мон кучине, кармай молема тонь инголет и вяттянза тонь аморрейхненди, хеттейхненди, ферезейхненди, ханаанейхненди, евейхненди и иевусейхненди, и Мон машфтсайне синь.24Тят сюконякшне синь шкайснонды и тят покоде тейст, и тят тиенде ня ломаньтналхнень тевснон коряс, но срафтыть синь шкайснон и лазыть синь озксонь кевснон.25Покодеда Азорти, эсь Шкаентенди, и Сон бславасы кшицень и ведцень; и Мон сявсайне сярядематнень тинь ёткстонт.26Тинь модасонт аф кармайхть улема пингта инголи шачфни ават и идьфтома ават, и Мон максан тейнть топодемс эрямс кизонтень.27Мон тисайне каршек молиентень эздон пеликс и абонфтса эрь ломаньтналть, конанди тон саят. Мон ласькфтьсайне тинь эздонт каршек молиентень.28Мон кучан тонь инголет оцю кендихть*б, и синь ласькфтьсазь тонь ингольдет евейхнень, ханаанейхнень и хеттейхнень.29Мон паньцайне синь тонь ингольдет аф фкя кизонь пингста, афток шами модась и вирьбаксянь жувататне ламолгодыхть тинь ётксонт.30Мон карман аф ламонь паньцемост синь тонь эздот, мзярс тон аф ламолгодат и аф сявсак тя модать эсь азорксшицень алу.31Мон таргасайне тонь модатнень Якстерь оцюведть эзда сявомок Филистимань оцюведть*в самс, и шавмодаста сявомок Евфратть самс. Тя модань сембе эряйхнень Мон макссайне тонь кядялот, и тон паньцайть синь эсь кистот.32Тят латце кодамовок соткст аф синь мархтост, аф шкайснон мархта.33Тят макссе тейст эрямс тонь масторсот, афток синь вяттядязь тонь пежес Монь инголен. Кда тон кармат покодема синь шкайснонды, тя ули тейть туворкс*г».
*а 23:8 мялень полафты казне – взятка
*б 23:28 кенди – оса; оцю кенди – шершень
*в 23:31 Филистимань оцюведь – Модакучкань оцюведь; Средиземное море.
*г 23:33 тувор – капкан
Глава 23