Выбрать язык
Книги Ветхого Завета
Книги Нового Завета
с русским текстом1Моисей тердезе Израилень ломаньтналть сембе пуромксонц и азозе тейст: «Вага мезе Азорсь мярьгсь тиендемс:2Кота шит тиендесть тевонтень, а сисемце шить лувость инярукс, тя Азорть ваймамань шиц. Эрсь, кие кармай покодема тя шиня, ули максф куломас.3Ваймамань шиня тяда крьвясне тол эсь кудонтень потмоса».
4Моисей мярьгсь Израилень ломаньтналть сембе пуромксонцты: «Вага мезе Азорсь мярьгсь:5Максода эсь эздонт казнет Азорти: эрсь эсь мяленц коряс кандоза Азорти казненди зрня, сия, сере,6валда-сенем, якстерь, шобда-якстерь тюсса пона, иляназ, сявань пона,7боранонь кетть, конат архтфт якстерьста, сенем кетть, акация шуфта,8вай валдоптоматненди, танцти шине надобият вадемань вайти и качафтоманди,9оникс кевнят и лия питни кевнят ингольксть лангс и мяштелангаксть лангс.10Ёткстонт сембе маштыкядь ломаттне катк сайхть и тисазь семботь, мезть Азорсь кошардсь тиемс:11иняру кошть, сонь вельхтерданц, лангонь вельхксонц, кячказонзон, стена-седяфонзон, олгонзон, орванзон и алксонзон,12сотксонь арзять, сонь олгонзон, пежень нолдама вельхксонц и котфонь перяфксть, конац перясы арзять,13шрать, сонь олгонзон и семботь сянь, мезсь моли шрать мархта, и тяфта жа иняру кшитнень, конатнень путнесазь Азорть инголе,14валдонь максы валдоптомань кирдемать и семботь, мезсь моли мархтонза, тяфта жа сонь валдоптоманзон и валдонь кирдемс вайть,15качафтомань алтарть, сонь олгонзон, вадемань вайть, танцти шине нолдаматнень и иняру кошть сувама вастонц вельхксс котфонь перяфксть,16марнек плхтамань озксказненди алтарть, сонь лангозонза путневи решёткать, кона тиф сереста, алтарть олгонзон и семботь, мезсь моли алтарть мархта, тяфта жа штамань кядьготь и сонь алксонц,17пирьфть котфонь перяфксонзон, орванзон, синь алксснон и пирьфу сувама вастть котфонь перяфксонц,18иняру кошть пяльнянзон, пирьфть пяльнянзон и синь сотксснон;19иняру вастса покодемань щапнень, Аарон озксвятить иняру щамонзон и сонь цёранзон щамснон озксвятемаса покодеманди».
20Тяда меле сембе Израилень ломаньтналть пуромксоц тусь Моисеень ваксста.21Эрсь, кинь мялецоль и кинь ладяфоль тянди ваймоц, сашендсь и каннесь Азорти казнет васедемань кошть тиеманцты, тоза сембе эрявиксти и иняру щапнеди.22Сашендсть алят и ават, и сембе синь седиень тердемаснон коряс кандсть эрь кодама зрнянь паршихть: сюлгапт, пилькст, тяштькс мархта суркст, кргань уськонят. Эрсь, кинь ульсь мялец, кандсь Азорти зрнянь озксказне.23Тяфта жа эрсь, кинь ульсть валда-сенем, якстерь и шобда-якстерь понань сюренза, шуваня иляназоц, сявань понац, якстерьста архтф боранонь кеденза и сенем кеденза, каннезень синь.24Сят, кит каннесть сия али сере, каннезь кода казне Азорти. И эрть кинь ульсь акация шуфтоц, каннезе сонь иняру кошть эрь кодама тевонзонды.25Сембе маштыкядь аватне кштирдсть пона эсь кядьсост и каннесть валда-сенем, якстерь и шобда-якстерь сюрет, и шуваня иляназ.26Сембе аватне, конат маштсть кштирдема, седиень тердемаснон коряс кштирдсть сявань пона.27Юромонь оцюнятне каннесть оникс кевнят и лия питни кевнят, конат щафневсть ингольксти и мяштелангаксти.28Тяфта жа синь каннесть танцти шинень нолдамат, вай валдоптоматненди и танцти шине надобият вадемань вайти и качафтоманди.29Израилень эрь алясь и авась, седиень тердемаснон коряс, каннезь эсь казнеснон ся тевти, конань Азорсь Моисеень вельде мярьгсь тиемс. Синь эсь мяльхть каннесть казнет Азорти.
30Моисей мярьгсь Израилень ломаттненди: «Ванода, Азорсь кочказе Веселеилонь, Уриянь цёранц, Хуронь уноконц, кона Иудань юромста.31Азорсь пяшкодезе сонь Шкаень Ваймопожфса, смузьшиса, шарьхкодемаса, содамошиса и эрь кодама маштомаса.32Сон маштыкядь эрь кодама тевса: котци котфт, тиенди эрь месть зрняста, сияста и сереста,33керси питни кевнят и тонгондсыне лотконяс, керси шуфтста паршихть и маштозь тиенди эрь кодама мазышит.34Азорсь макссь тейнза маштомаши тонафнемс тянди лиятнень. Сон максозе тя маштомашить тейнза и Аголиавонди, Ахисамахонь цёранцты, кона Данонь юромста.35Азорсь пяшкодезень синь маштомашиса, содалезь, кода керсемс кевста и шуфтста, маштозь кодамс, тиендемс сёрмат валда-сенем, якстерь, шобда-якстерь и шуваня иляназонь котфнень лангс, и кодамс. Синь маштсть арьсемс и тиемс сембе тефнень, конатнень тиендьсазь маштыкядь ломаттне».
Глава 35