Выбрать язык
Книги Ветхого Завета
Книги Нового Завета
с русским текстом1Отысь берытскыса, асьмеос Васан пала мынӥмы, Едрея дорысен асьмемын Васанлэн Ог эксэез аслаз вань калыкеныз ӵош ожмаськыны кутскиз.2Соку Кузё-Инмар мыным шуиз: «Эн кышка солэсь, сое Мон тынад киулад сёто – вань калыксэ но, быдэс музъемзэ но, солы озьы карод, кызьы карид Есевонын улӥсь аморрейёслэн Сӥгон эксэйзылы».3Инмармы Кузё-Инмар Васанлэсь Ог эксэйзэ, солэсь вань калыксэ киуламы сётӥз; ми сое погыртӥмы, – одӥг мурт но улэп ӧз кыльы;4со виын солэсь вань городъёссэ киуламы басьтӥмы, одӥгез но городзы, киуламы сюрытэк, ӧз кыльы: куатьтон городэз, быдэс Аргов улосвылэз, Васанлэн Ог эксэезлэсь быдэс музъемзэ киултӥмы;5вань та городъёс ӝужытэсь борддоръёсын, ӟезьыосын котыртэмын, тунгонъёсын пытсамын вал, трос гинэ юнматымтэ городъёссэ но киултӥмы;6Есевонлэн Сӥгон эксэезлэсь кадь ик солэсь но вань городъёссэ быдтӥмы, отын улӥсь пиосмуртъёсты, кышномуртъёсты, нылпиосынызы ӵош, быдтӥмы;7нош вань пудоез, городъёсысь киултэм ваньбурез асьмелы каримы.
8Со виын та музъемез киултӥмы, кык аморрей эксэйёслэсь музъемзэс – Иордан тапалась, Арнон ӧр дорысен кутскыса Ермон гурезёзь кыстӥськись музъемез – киуламы басьтӥмы, –9сӥдон калык Ермонэз Сӥрион шуэ, нош аморрейёс сое Сенир шуыса нимало, –10ӵошкыт интыысь вань городъёсты, быдэс Галаадэз, Салхаен Едрея дорозь кыстӥськись быдэс Васанэз, Васанлэн Ог эксэезлэн музъемысьтыз городъёсты киултӥмы;11рефаимъёс пӧлысь Ог гинэ, Васанлэн эксэез, улэп кылиз на. Тани, солэн кӧлан интыез, корт валес, со али но аммон пиос киын Равваын возиське на: солэн кузьдалаез укмыс гырпум кузьда, нош пасьталаез пиосмуртлэн ньыль гырпумез кузьда.
12Со виын киултэм музъеммы Арнон ӧр вӧзысь Ароер бордысен кутскиз, отчы ик пыризы Галаадлэн гурезё шаерысьтыз ӝыны люкетэз, отысь городъёс, та люкетэз Рувим но Гад выжыослы мон сётӥ;13Галаадлэсь кылем люкетсэ, быдэс Васанэз – Ог эксэйлэсь музъемзэ – быдэс Аргов улосвылэз, Васанэн ӵош, Манассия выжылэн ӝыны люкетызлы мон сётӥ. [Со шаер рефаимъёслэн музъемзы шуыса нимаське.]14Манассиялэн Иаир пиез киултӥз быдэс Аргов улосвылэз, Гессур, Мааха музъемъёслэн гожзы-межазы дорозь кыстӥськись интыез киултӥз; Васанлы аслэсьтыз нимзэ сётӥз, сое «Иаирлэн гуртъёсыз» шуыса нимаз. Со шаерез туннэ нуналозь но озьы нимало.
15Махирлы мон Галаадэз сётӥ;16нош Рувим но Гад выжыослы Галаадысен Арнон ӧр дорозь кыстӥськись музъемез мон сётӥ, Арнон ӧр дорысен Иавок ӧр дорозь кыстӥськись музъемез, со сьӧрын улэ ни аммон калык.17Та сяна, нёжал музъемез, Иордан дуртӥ, Киннереф зарезь дурысен, нёжаллэн зарезез – Сылало зарезь дурозь, шундыӝужан палтӥз Фасги гурезьлэн выжыозяз кыстӥськись музъемез мон соослы сётӥ на.
18Соку мон тӥледлы таӵе косон сётыса шуи: «Тӥляд Инмарды Кузё-Инмар та музъемез тӥляд киулады сётӥз; ваньды, ожмаськыны быгатӥсьёс, ожмаськон тӥрлык кутыса, агай-вынъёстылэн, израиль пиослэн, азьпалазы мынэ оже,19нош тӥляд кышноосты, нылпиосты, пудоосты – мон тодӥсько тӥляд пудоды трос шуыса – мынам тӥледлы сётэм городъёсам мед кылёзы,20[Инмар] Кузё-Инмар тӥледлы кадь ик агай-вынъёстылы но каньылэн улон сётӥз ке, Инмардылэсь Кузё-Инмарлэсь Иордан сьӧрысь соослы сётоно музъемзэ киулазы басьтӥзы ке, соку ваньды мынам тӥледлы сётэм музъемам берытскоды».
21Со виын мон Иисуслы курыса-косыса шуи: «Тон ас синмыныд адӟид, мар кариз Инмарды Кузё-Инмар та кык эксэйёсын; озьы кароз Кузё-Инмар мукет эксэйлыкъёсын но, кудъёсыз пыр тон ортчод.22Эн кышка соослэсь, уго Инмарды Кузё-Инмар тӥ понна Ачиз ожмаське».
23Со виын мон Кузё-Инмарлы тазьы вераса вӧсяськи:24«Дунне Кутӥсь Кузё-Инмаре! Тон мыным, Аслад ляльчиедлы, Аслэсьтыд быдӟымлыктэ, [Аслэсьтыд кужымдэ,] кужмо кидэ, [юн суйбыгыттэ] возьматыны кутскид; инмын яке музъем вылын Тон кадь ужъёс лэсьтыны быгатӥсез, Тон кадь быдӟым кужмоез кыӵе инмар вань?25Лэзь монэ, Иордан шур сьӧры выжыса, со ӟечлыко музъемез адӟыны, со чеберлэсь но чебер гурезез, Ливанэз адӟыны».
26Нош Кузё-Инмар тӥледлы луыса мыным вожзэ поттӥз, куриськемме санэ ӧз басьты. Кузё-Инмар мыным шуиз: «Тырмоз тыныд! Азьланяз та сярысь Мыным номыр но эн ни вера;27Фасги гурезьлэн йылӥяз тубыса учкы зарезь пала, уйпала, лымшор пала шундыӝужан пала, ас синмыныд учкы, малы ке шуоно тыныд Иордан тупала выжыны уз кылды;28Иисусэз визьма, нодъя, юнматы сое, уго со та калыклэн азьпалаз мыноз но тынэсьтыд адӟоно [быдэс] музъемдэ соослы люкылоз».
29Озьы асьмеос Беф-Фегорлы ваче беринэ интыяськем нёжалэ дугдӥмы.
Глава 3