Выбрать язык
Книги Ветхого Завета
Книги Нового Завета
с русским текстом1Ми берен берытскимы но Горд Кам зарезь пала нуись сюрес кузя луоё кыр дуннее пыримы, кызьы мыным Кузё-Инмар косон сётӥз; трос дыр ӵоже Сеир гурезь котыртӥ ветлӥмы.2Кузё-Инмар мыным тазьы вераз, тазьы шуиз:3«Тырмоз ини тӥледлы та гурезь котыртӥ ветлыны, уйпала кожытӥське;4калыклы, косон сётыса, тазьы шу: ”Сеирын улӥсь агай-вынъёстылэн, Исавлэн пиосызлэн музъемзы пыр ортчоды, соос тӥлесьтыд кышкатскозы, нош тӥ утиське,5соосын ожмаськыны эн кутске, уго Мон тӥледлы соослэсь одӥг пыдтыш быдӟа музъемзэс но уг сёты, малы ке шуоно Сеир гурезез Мон Исавлы люкет музъемлы сётӥ;6соослэсь сиёнзэс, юон вузэс азвесь тырыса басьтэ но соку сие, юэ;7уго Инмаред Кузё-Инмар киыныд ужано вань ужъёстэ бакель кариз, та быдӟым, [шимес] луоё кыр дуннеетӥ ветлыкуды, Со тӥледлы юрттӥськиз; тани ньыльдон ар ӵоже ини Инмаред Кузё-Инмар тӥледыз уг кельты, номырлы но ёрмыса-ӟудыса уд улӥське”».
8Сеирын улӥсь агай-вынъёсмы, Исавлэн пиосыз вӧзтӥ ми мынӥмы, Елафысен, Ецион-Гаверысен лыктӥсь ӵошалысь сюрес вылысен кожытскимы но Моавысь луоё кыр дунне пала мынӥмы.
9Соку Кузё-Инмар мыным шуиз: «Моав калыкен тушмонъяськыса улыны эн кутскы, соосын ожмаськыны эн кутскы, уго солэн музъемез бордысь пичи люкетсэ но тыныд уг сёты, малы ке шуоно Ар музъемез Мон Лотлэн пиосызлэн киулазы сётӥ».
10Азьвыл отын енак пиос кадесь ик ӝужыт мугоро, трос лыдо, быдӟым калык – емимъёс – улӥзы,11соосты енак пиосты кадь ик рефаимъёс пӧлы пырто; моав калык соосты емим шуыса нима.12Сеирын азьвыл хоррейёс улӥзы, нош Исавлэн пиосыз соосты отысь уллязы, ас азьысьтызы быдтӥзы но соослэн интыязы асьсэос улыны кутскизы, – лэсьтӥзы озьы ик, кызьы израиль пиос Кузё-Инмарлэн соослы люкетлы сётэм музъеменыз каризы.
13«Табере султэ, Заред нёжалэз выже». Заред нёжалэз ми выжимы.14Кадес-Варние мыныны потэммы дырысен Заред нёжалэз выжеммы дырозь куамын тямыс ар ортчиз ини; оже ветлэмъёслэн ёзысьтызы-выжыысьтызы асьмелэн станамы одӥг но адями ӧз ни кыльы, озьы луиз, кызьы [Инмар] Кузё-Инмар соослы кыл сётыса шуиз.15Кузё-Инмарлэн киыз соосты быдтыны дась улӥз, станамы соос пӧлысь одӥгез но улэп ӧз кыльы.16Калык пӧлысь оже ветлэмъёс ваньзы кулыса бырем бере17Кузё-Инмар мыным тазьы вераз, тазьы шуиз:18«Тон Моав музъем вӧзтӥ, Ар вӧзтӥ ортчиськод,19аммон калыклэн матаз вуид, но соосын тушмонъяськыса улыны эн кутскы, ожмаськыны эн кутскы, уго аммон пиослэн музъемзылэсь тыныд люкетлы номырзэ но уг сёты, малы ке шуоно Мон сое Лотлэн пиосызлы люкетлы сётӥ».
20Та музъем но рефаимъёслэн музъемзы шуыса лыдъяське вал, азьвыл отын рефаимъёс улӥзы; аммон калык соосты замзумим шуыса нима;21соос енак пиос кадесь ик ӝужыт мугороесь, трос лыдо, быдӟым калык; аммон пиослэн азязы Кузё-Инмар соосты быдтӥз, аммон калык соосты улляз но соослэн музъемазы улыны интыяськизы.22Сеирын улӥсь Исавлэн пиосызлы но Кузё-Инмар тазьы ик кариз: соослэн азязы хоррейёсты быдтӥз, Исавлэн пиосыз соосты уллязы но соослэн интыязы улыны кутскизы, отын туннэ нуналозь но уло;23Газа дорозь кыстӥськись шаерысь гуртъёсын улӥсь аввейёсты Кафторысь потэм кафторим калык быдтӥз но та шаере улыны интыяськиз.
24«Султэ, мынэ, Арнон ӧр вамен выже; аморрей пиез, Есевонлэсь Сӥгон эксэйзэ, Мон тӥляд киулады сётӥсько, солэсь музъемзэ но; сое киултыны кутскы, ожмаськы соин;25та нуналысен кутскыса инбам улын улӥсь вань калыкъёс пӧлы Мон тынэсьтыд кышкан, куалекъян вӧлмытыны кутско; соос тон сярысь кылӥзы ке, куалектозы, туж кышканы кутскозы».
26Кедемоф луоё кыр дуннеысь мон Есевонлэн Сӥгон эксэез доры вераськыны адямиосме лэзи, тупаса улон сярысь вераськыны ыстӥ:27«Музъем ваментӥд потыны лэзь монэ, сюрес кузя мыно, бурпала но, паллян пала но мон уг кожылы;28азвесен мыным сиён вузалля, соин кӧтме тыро; юыны вудэ мыным азвесен сёт, соин сюме юзмато, пыдыным лёгиськыса гинэ музъем вылтӥд ортчо;29мыным озьы лэсьты, кызьы лэсьтӥзы Сеирын улӥсь Исавлэн пиосыз, кызьы лэсьтӥз Арын улӥсь моав калык, – милемлы, Иордан вамен потыса, Инмармылэн Кузё-Инмарлэн милемлы сётоно музъемаз вуыны кулэ».30Нош Есевонлэн Сӥгон эксэез аслаз музъемез пыр ортчыны ӧз лэзьы, малы ке шуоно тынад Инмаред Кузё-Инмар солэсь лулзэ-мылкыдзэ лекомытӥз, сюлэмзэ чурытомытӥз сое тынад киулад сётон понна, кызьы туннэ адӟиськомы.
31Соку Кузё-Инмар мыным шуиз: «Тани, Мон [Есевонлэсь] Сӥгон [эксэйзэ, аморрей пиез], солэсь музъемзэ но тынад киулад сётыны кутскисько; солэсь музъемзэ киулад басьты».32Яаца дорысен [Есевонлэн] Сӥгон [эксэез] вань калыкеныз ӵош асьмемын ожмаськыны кутскиз;33асьмелэн Инмармы Кузё-Инмар сое [асьмелэн киуламы] сётӥз, сое, солэсь пиоссэ, солэсь вань калыксэ погыртӥмы.34Соку солэсь вань городъёссэ киултӥмы, вань городъёссэ, пиосмуртъёссэ но кышномуртъёссэ, нылпиоссэ быдтӥмы, нокинэ но улэп ӧм кельтэ;35пудозэс, киултэм городъёсысьтызы талам ваньбурез гинэ асьмелы басьтӥмы.36Арнон ӧр дорын сылӥсь Ароер дорысен, нёжалын сылӥсь город дорысен Галаад [гурезь] дорозь интыяськем одӥгез но город асьмелы пумитъяськыны ӧз быгаты: Инмармы Кузё-Инмар ваньзэ [киуламы] сётӥз.37Нош аммон калыклэн музъем дораз ӧд мыны, Иавок ӧр котырысь интыосы но, гурезьёсы интыяськем городъёсазы но ӧд мыны, – Инмармылэн Кузё-Инмарлэн [асьмелы] косылымтэ интыяз нокытчы но ӧд мыны.
Глава 2