Выбрать язык
Книги Ветхого Завета
Книги Нового Завета
с русским текстом1Тани Иордан шур сьӧрысь луоё кыр дуннеысен, Суфлы ваче беринысь ӵошкыт интыысен, Фаран, Тофел, Лаван, Асироф но Дизагав каръёс вискысен, израиль калыклы Моисей таӵе кылъёсын вазиськиз.2Хоривысен, Сеир гурезь дорысен Кадес-Варние мынӥсь сюрес кузя лыктоно ке, татчыозь дас одӥг нунал мынонэз.
3Ньыльдонэтӥ арлэн дас одӥгетӥ толэзяз, толэзьлэн нырысетӥ [нуналаз] Моисей [вань] израиль пиослы Кузё-Инмарлэсь со пыр сётэм курон-косонъёссэ ваньзэ вераз.4Есевонын улӥсь аморрей калыклэсь Сӥгон эксэйзэ вием бере, Едреяын, Аштерофын улӥсь Васанлэсь Ог эксэйзэ вием бере5Иордан тупалась Моав музъемысен Моисей та законэз валэктыны кутскиз, со шуиз:6«Инмармы Кузё-Инмар Хоривысен асьмелы тазьы вераз, тазьы шуиз: ”Тырмоз тӥледлы та гурезьын улыны!7Султэ, сюрес вылэ потэ но аморрейёслэн гурезязы мынэ, соослэн вань бускель калыкъёссы доры мынэ – ӵошкытэсь интыосы, гурезьёсы, улыго интыосы, лымшор люкетэ, зарезьлэн дуръёсаз, Ханаан музъеме, Ливан котыре, быдӟым шур дорозь ик – Ефрат шур дорозь – мынэ;8тани та музъемез Мон тӥледлы сётӥсько, мынэлэ, Кузё-Инмарлэсь тӥляд атайёстылы Авраамлы, Исааклы, Иаковлы, соослэн выжыоссылы кыл сётыса сӥзем музъемзэ люкетлы басьтэ”.
9Со виын мон тӥледлы шуи: ”Одӥгнам кивалтыса, тӥледыз нуллыны мынам кужыме уз тырмы;10Инмарды Кузё-Инмар тӥледыз йылэтӥз но, тани, таре тӥ туж трос луиды ни, инмысь кизилиос мында луиды ни;11атайёстылэн Инмарзы Кузё-Инмар тӥледыз али сярысь сюрс пол тросгес мед кароз, бакель мед кароз, кызьы Со тӥледлы вераз!12Кызьы нош мон огнам тӥлесьтыд секытлыкъёстэс, ныпъетъёстэс, тупатэк улонъёстэс нуллом?13Вань выжыосысьтыды быръе визьмо, нодо, улонэз адӟем муртъёсты, соосты мон тӥледлы кивалтӥсе пукто”.
14Тӥ, ответ сётыса, мыным шуиды: ”Ӟеч уж лэсьтыны тон косӥськод”.15Тӥляд выжыосысьтыды мон кузёйыръёсты, визьмо, [нодо,] улонэз адӟем воргоронъёсты басьтӥ, соосты тӥледлы кивалтӥсь кари – сюрс муртэн, сю муртэн, витьтон муртэн, дас муртэн кивалтӥсь кари, вань выжыостылы эскерись-чакласьёсты пуктӥ.
16Со виын мон судьяостылы таӵе косон сётыса шуи: ”Агай-вынъёстэс санэ понэ, агайзэ выныныз, озьы ик тӥ пӧлы улыны лыктэмъёсты но шонер судить каре;17судын ымныр шоры эн учке, покчизэ но, вылӥзэ но кылзӥськыны быгатэ: адями ымнырлэсь эн кышкалэ, уго суд – со Инмарлэн ужез; нош тӥледлы сэрттыны-пертчыны секыт ужез мон доры вае, мон сое учко-эскеро.
18Со виын мон котьмар пумысен но, мар тӥ лэсьтыны кулэ, тӥледлы косонъёс сётӥ.
19Хоривысен асьмеос сюрес вылэ потӥмы но та туж бадӟым, туж шимес луоё кыр дуннеетӥ мынӥмы, кудзэ тӥ адӟиды, Инмардылэн Кузё-Инмарлэн косэмезъя аморрейёслэн гурезьзы доры мыныкуды, озьы Кадес-Варние вуимы.20Мон тӥледлы шуи: ”Инмардылэн Кузё-Инмарлэн асьмелы сётэм аморрейёслэн гурезьзы доры вуиды;21тани, Инмаред Кузё-Инмар та музъемез тыныд сётэ, мын, сое ас киулад басьты, кызьы тыныд вералляз атайёсыдлэн Инмарзы Кузё-Инмар, эн курда, эн куалекъя”.22Нош тӥ ваньды мон доры лыктӥды но шуиды: ”Асьмелэн азямы адямиосты ыстомы, соос со сюрес кузя мыноно музъемез асьмелы мед учкозы-чаклалозы, ивор мед вуттозы, мыноно-пыроно городъёсмы сярысь но ивор мед ваёзы”.23Та верам кыл мыным кельшиз, соку мон тӥ пӧлысь дас кык муртэ бырйи – [котькуд] выжыысь быдэн одӥг адями бырйи.24Соос мынӥзы, гурезе тубизы, Есхол нёжалозь вуизы но котыр ёросэз учкизы-чаклазы;25со музъемын будӥсь емышез бичаса милемлы вайизы, ивор вуттыса шуизы: ”Инмармылэн Кузё-Инмарлэн асьмелы сётоно музъемез ӟеч”.
26Нош тӥ мыныны пумит луиды, Инмардылэн Кузё-Инмарлэн косонэзлы пумитъяськиды,27балаганъёсады тазьы ӟургетыса пукиды: ”Кузё-Инмар асьмеды синазькыль каременыз, аморрейёслэн киулазы сётыса быдтон вылысь асьмеды Египет музъемысь поттӥз.28Кытчы ми мыномы? Агай-вынъёсмылэн адӟемзэс верамъёссы сюлэммес куалектытӥзы: отын, пе, асьмелэсь тросгес калык улэ, ӝужыт-таза мугороесь, пе, соос, бадӟымесь городъёсын, пе, уло, юнматэм борддоръёссы инмозь, пе, вуо, енак пиосты, пе, отысь адӟимы”.
29Соку мон тӥледлы шуи: ”Эн куалектэ, соослэсь эн кышкалэ;30Инмарды Кузё-Инмар тӥляд азяды мынэ; Со тӥ понна ожмаськоз, кызьы Со тӥляд син азяды тӥ понна Египетысен лэсьтӥз,31луоё кыр дуннеысен но, отысен тӥ асьтэос адӟиды, кызьы Инмарды Кузё-Инмар тӥледыз ас пизэ ки вылаз нуись мурт кадь нуллӥз; татчы лыктытозяды ялан тазьы вал.32Нош тӥ озьы но Инмардылы Кузё-Инмарлы ӧд оске,33Со тӥляд азьпалады мынӥз, тӥледлы дугдылон инты бырйылӥз; уйин тыл пушкын, нуназе пилем пушкын мынӥз тӥледлы мыноно сюрестэс возьматон вылысь,34[Инмар] Кузё-Инмар кылӥз тӥлесьтыд верам кылъёстэс, вожзэ поттӥз но кыл сётыса шуиз:35”Та адямиос пӧлысь, та лек ёз-выжы пушкысь одӥгез но ӟеч музъемез уз адӟы, кудзэ Мон тӥляд атайёстылы сётыны сӥзи вал;36Иефоннийлэн Халев пиез гинэ сое адӟоз; Мон солы музъем сёто, кудӥз вылтӥ со ветлӥз, солэн пиосызлы но сёто, малы ке шуоно со Кузё-Инмарлы тэрытскыса улӥз”.
37Тӥледын сэрен Кузё-Инмар мыным но вожзэ поттыса шуиз: ”Тон но отчы уд пыры;38тонэн ӵош ветлӥсь Навинлэн Иисус пиез отчы пыроз; солэсь мылкыдзэ ӝут, уго со израиль калыкез соослы сётэм музъеме пыртоз.39Тӥ шуиськоды вал, нылпиосты тушмон киулэ сюрозы, нош соос отчы пырозы, ӟечез но, уродэз но али тодӥсьтэм пиосты отчы пырозы, соослы со музъемез сёто, соос сое киулазы басьтозы,40нош тӥ берытске но Горд Кам зарезь доры нуись сюрес кузя мынэ луоё кыр дуннее”.
41Нош тӥ, ответ сётыса, мыным шуиды: ”[Инмармы] Кузё-Инмар азьын ми сьӧлыкамы, али нош мыныса ожмаськомы, озьы косӥз Инмармы Кузё-Инмар”. Ваньды тӥ ожмаськон тӥрлыкен кусъёстэс думиды но визьмыныды чик малпаськытэк гурезе тубыны малпады.42Но Кузё-Инмар мыным шуиз: ”Соослы шу: гурезе эн тубе, эн ожмаське, малы ке шуоно Мон тӥ пӧлын ӧвӧл, тушмон тӥледыз погыртыны быгатоз”.43Мон тӥледлы вералляй, нош тӥ верамме санэ ӧд понэ, Кузё-Инмарлэн косонэзлы пумит султӥды, ваменэс сямдэс возьматыса, гурезе тубиды.44Тӥледлы пумит ӝутскиз та гурезьын улӥсь аморрей калык, муш палэп кадь со тӥ сьӧры уйиськыса мынӥз, Сеирысен кутскыса Хормаозь соос тӥледыз погыръязы.45Берен вуиды но Кузё-Инмар азьын бӧрдыны кутскиды, нош Кузё-Инмар викышъяса бӧрдэмдэс ӧз кылы, куриськемдэс санэ ӧз поны.
46Соин ик тӥ Кадесын сокем кема дыр ӵоже улӥды».
Глава 1