Выбрать язык
Книги Ветхого Завета
Книги Нового Завета
с русским текстом1Инмардылэсь Кузё-Инмарлэсь тӥледыз дышетыны косӥсь курон-косонъёссэ, пуктон-косонъёссэ, законъёссэ али киултыны мыноно музъемады улыны интыяськем берады быдэсъяса мед улоды.2Инмаредлэсь Кузё-Инмарлэсь кышканэн мед улод, Солэсь вань пуктон-косонъёссэ, [туннэ] сӥзёно вань курон-косонъёссэ тон но, тынад пиосыд но, пиосыдлэн пиоссы но вань улон нуналъёсты ӵоже быдэсъяса мед улоды, – улоно нуналъёсты тросгес мед луозы.
3Озьыен, кылзы, Израиль, тае быдэстыны тыршы, тыныд умой мед луоз, тӥ трослы мед йылоды, кызьы атайёстылэн Инмарзы Кузё-Инмар тӥледлы вераз: [Со тӥледлы] йӧлын чечыен бызись музъем [сётоз. Та Инмарлэн Кузё-Инмарлэн израиль пиослы Египет музъемысь потыса луоё кыр дуннеын улыкузы сётэм пуктон-косонъёсыз, законъёсыз].
4Кылзы, Израиль: асьмелэн Инмармы Кузё-Инмар – одӥг Кузё-Инмар;5Инмардэ Кузё-Инмарез вань сюлмыныд, вань лулыныд, вань кужмыныд яраты.6Туннэ тыныд сӥзьыса сётэм та кылъёсы тынад сюлмад, [тынад лулад] мед улозы;7та кылъёсты нылпиосыдлы ялан вералля – гуртад пукыкуд но, сюрес кузя мыныкуд но, изьыны выдыкуд но, изьыса султыкуд но.8Пусэз-тодметэз кадь соосты ки бордад дум, кымесад думем йыркерттэт кадь мед луозы.9Гожты соосты коркаедлэн ӧс янакъёсыз борды, озьы ик кар капкаос борды но.
10Авраам, Исаак, Иаков атайёсыдлы тыныд сётыны сӥзьыса верам музъемаз, тынад киыныд лэсьтымтэ бадӟымесь, умоесь городъёсаз Инмаред Кузё-Инмар тонэ пыртӥз ке,11кытын котькыӵе ваньбурен тырмытэм коркаос вань – со ваньбурез тон ӧд люка, изэз кораса лэсьтэм колодчаос вань – со изэз тон ӧд кора, виноградпуд бакчаос, вӧйпу садъёс вань, кудъёссэ тон ӧд мертты, соослэсь емышъёссэс сиёд, кӧттэ тырод,12соку чакласькы-утиськы: [сюлмыд медаз сӧриськы,] Египет музъемысь, ляльчиын улон юртысь, тонэ поттӥсь Инмардэ Кузё-Инмарез медад вунэты.
13Инмаредлэсь Кузё-Инмарлэсь кышка, Солы [Огназлы гинэ] ужаса-тыршыса ул, [Со борды лякиськы,] Солэн нимыныз кыл сёт.14Мурт инмаръёс пала, тӥляд котырады улӥсь калыкъёслэн инмаръёссы доры эн мынэ;15уго тон пӧлын улӥсь Инмаред Кузё-Инмар – кылэз юн юась Инмар; Инмаредлэн Кузё-Инмарлэн вожпотонэз медаз ӝуатскы но музъем вылысь Со тонэ медаз быдты.
16Инмардылэсь Кузё-Инмарлэсь визьзэ сынаса эн улэ, кызьы тӥ Массаысен Солэсь визьзэ сынаса улӥды.
17Инмардылэсь Кузё-Инмарлэсь тӥледлы сӥзьыса сётэм курон-косонъёссэ, пуктон-косонъёссэ, уставъёссэ юн уте,18[Инмаредлэн] Кузё-Инмарлэн син азяз шонерлыко, ӟечлыко ужъёс лэсьтыса ул, соку тынад улонэд ӟечлыко луоз, Кузё-Инмарлэн тынад атайёсыдлы кыл сётыса сӥзем музъемаз пырод но со ӟеч музъемез киулад басьтод.19Кызьы вераз Кузё-Инмар, Со тынад азьысьтыд вань тушмонъёстэ уллялоз.20Азьланьын пиед тынэсьтыд тазьы юаз ке: «Мае возьмато та пуктон-косонъёс, уставъёс, законъёс, кудъёссэ тӥледлы Инмарды Кузё-Инмар сӥзьыса сётӥз?»21Соку тон пиедлы шу: «Египетын ми фараонлэн ляльчиосыз вал, но [Инмар] Кузё-Инмар Аслаз кужмо киыныз, [юн суйбыгытэныз] милемыз Египетысь поттӥз,22[Инмар] Кузё-Инмар милям син азямы паймымон тодметъёс, быдӟымесь паймымон ужъёс возьматӥз, Египетэз, фараонэз, солэн корказ вань улӥсьёсты, [солэсь ожгарчиоссэ] вӧсь кариз;23нош милемыз [Инмармы Кузё-Инмар] отысь поттӥз атайёсмылы сӥзьыса верам музъемзэ милемлы сётон понна, со музъеме милемыз пыртон понна;24Кузё-Инмар милемыз вань та пуктон-косонъёсты быдэсъяса улыны косӥз, Инмармылэсь Кузё-Инмарлэсь кышканэн мед уломы, вань улоно нуналъёсамы милемлы ӟеч мед луоз, али кадь ик улэп мед луомы.25Та бордын асьмелэн шонерлыкмы луоз: Инмармы Кузё-Инмар азьын [законлэсь] вань та курон-косонъёссэ тыршыса быдэсъяса улӥмы ке, кызьы Со милемыз куриз-косӥз».
Глава 6