Выбрать язык
Книги Ветхого Завета
Книги Нового Завета
с русским текстом1Инмаред Кузё-Инмар тонэ али киултыны мыноно музъемад пыртӥз ке, трос лыдо калыкъёсты – хеттейёсты, гергесейёсты, аморрейёсты, хананейёсты, ферезейёсты, евейёсты, иевусейёсты, – тынэсьтыд трос лыдогес, кужмогес сизьым калыкъёсты, тынад азьысьтыд улляз ке,2Инмаред Кузё-Инмар соосты тынад киулад сётоз, тон соосты погыртод, соку соосты быдты, соосын кусып эн кылдыты, эн жаля соосты;3соосын ӵыжы-выжы кусыпъёс эн кылдыты: нылдэ солэн пиезлы кышнолы эн сёты, солэсь нылзэ пиедлы кышно эн басьты;4уго соос мукет инмаръёслы йыбыртъян понна тынэсьтыд пиостэ Мон бордысь палэнтозы, соку Кузё-Инмарлэн вожпотонэз тӥ вылэ ӝуатскоз но, Со тонэ ӝог быдтоз.5Тӥ соослы тазьы каре: курбон сётылон интыоссэс куашкатэ, йыбыртъян юбооссэс пыргытъялэ, вӧсяськон сурдъёссэс коралэ, [инмаръёссылэсь] сульдэръёссэс-идолъёссэс тылын сутэ;6уго тон Инмаред Кузё-Инмар азьын святой калык: тонэ Инмаред Кузё-Инмар, музъем вылын улӥсь вань калыкъёс пӧлысь тон Солэн калыкез мед луод шуыса, бырйиз.
7Вань калыкъёслэсь тӥ трос лыдо луиськоды шуыса, тӥледыз Кузё-Инмар ӧз бырйы, – тӥ вань калыкъёслэсь ӧжыт лыдо калык луиськоды ук, –8но Кузё-Инмар тӥледыз яратэ бере, атайёстылы сётэм кылзэ быдэстон понна Кузё-Инмар кужмо киыныз, [юн суйбыгытэныз] тӥледыз ляльчиын улон юртысь поттӥз, Египет эксэйлэн, фараонлэн, киулысьтыз мозмытӥз.9Озьыен, тод: тынад Инмаред Кузё-Инмар – Со Инмар, зэм, оскиськымон Инмар, Сое яратӥсьёсын, Солэсь курон-косонъёссэ быдэсъясьёсын сӥзён-косон пыр кылдытэм кусыпсэ Со сюрс ёзъёс-выжыос вордскытозь уте, соосты гажамысь-жалямысь уг дугды.10Нош кинъёс Сое адӟемпотостэм каро, соосты ваньзэс вӧсь кароз, быдтоз; Сое синазькыль карисьёслы ӝегатскытэк пунэмзэ берыктоз.
11Озьыен, курон-косонъёсты, пуктон-косонъёсты, законъёсты, кудъёссэ мон туннэ тыныд верасько, быдэсъя-уть.12Та законъёсты кабыл басьтӥд ке, утид, быдэсъяд ке, соку Инмаред Кузё-Инмар но тонэн сӥзён-косон пыр кылдытэм кусыпсэ утёз, Аслэсьтыз гажан-жалянзэ тыныд возьматоз, кызьы Со атайёсыдлы кыл сётыса вераз,13тонэ яратоз, тонэ бакель кароз, выжыдэ трос лыдо кароз, пушкысьтыд потэм емыштэ бакель кароз, музъемедлэсь емышсэ но, ю-няньдэ но, винадэ но, вӧйдэ но, сюро таза пудоедлэсь кунянъёссэ но, ыж уллёосыдлэсь ыжпиоссэс но – атайёсыд азьын тыныд сётыны сӥзем музъем вылысь ваньзэ, маиз вань, ваньзэ бакель кароз.14Вань калыкъёс пӧлысь тон тросгес бакель каремын луод; кидыстэм пиосмуртэд но, нылпи вайисьтэм кышномуртэд но тынад пӧлад уз луы, пудоосты но кунян, ыжпи, кечпи вайисьтэмесь уз луэ;15[Инмаред] Кузё-Инмаред вань висён-курадӟонъёслэсь тонэ мозмытоз, Египетысен адӟем нокыӵе но урод-лек висёнъёсты тон вылэ уз лэзьы, соосты лэзёз вань тушмонъёсыд вылэ;16Инмардылэсь Кузё-Инмарлэсь тӥляд киулады сётоно вань калыкъёсты тӥ быдтоды: тӥ соосты жаляны кулэ ӧвӧл; соослэн инмаръёссылы тон йыбыртъяса улыны кулэ ӧвӧл, уго соос тон понна канжаськон луозы.17Сюлэм пушкад шуид ке: «Та калыкъёс, мынам калыке сярысь, лыдынызы бадӟымесьгес, кызьы мон быгато соосты улляны?»18Но тон соослэсь эн кышка, тодад вай, мар кариз Инмаред Кузё-Инмар фараонэн но, быдэс Египетэн но,19тодад вай со быдӟымесь, ас синмыныд адӟылэм шугадӟонъёсты, [быдӟымесь] паймымон тодметъёсты, паймымон ужъёсты, кужмо киез, юн суйбыгытэз, кудӥныз Инмаред Кузё-Инмар тонэ поттӥз, Инмаред Кузё-Инмар озьы ик кароз тынад вань кышкано калыкъёсыныд;20кылемъёсыз но, тынад син азьысьтыд пегӟемъёс но, кулыса бырытозязылы, Инмаред Кузё-Инмар соос вылэ шекычъёсты ыстоз;21эн кышка соослэсь, уго Инмаред Кузё-Инмар тон пӧлын улэ, Со – быдӟым, кышкыт Инмар.22Тынад Инмаред Кузё-Инмар каллен-каллен тынад азьысьтыд со калыкъёсты уллялоз; ӝог гинэ тон соосты быдтыны уд быгаты, [музъем тырттэм медаз кыльы но] кыр пӧйшуръёс тыныд вормыны луонтэм трос медаз йылэ шуыса;23нош тынад Инмаред Кузё-Инмар соосты тон кие сётоз, туж зол соосты куалекъятоз но, соос бырозы;24соослэсь эксэйёссэс тынад киулад сётоз но, тон соослэсь нимзэс ин улысь быдтод; соосты ваньзэсты быдтытозяд, тыныд пумит сылыны нокин но уз быгаты.
25Соослэн инмаръёссылэсь сульдэръёссэс тылын сутэ; сьӧлтэтэ медад сюры шуыса, сульдэръёс вылысь зарниез, азвесез кулэ эн кары, аслыд эн басьты, уго Инмаред Кузё-Инмар понна со юрӟым;26со кадь карган улэ медад сюры шуыса, юрӟымез корка пушкад эн пырта; солэсь палэнскы, солэсь юрды, уго со каргамын.
Глава 7