Выбрать язык
Книги Ветхого Завета
Книги Нового Завета
с русским текстом1Туннэ тӥледлы сӥзьыса сётэм вань курон-косонъёсме быдэсъяны тырше, улэп мед кылёды, мед йылоды но мыныса [Инмарлэсь] Кузё-Инмарлэсь тӥляд атайёстылы сётыны сӥзем [ӟеч] музъемез мед киултоды.2Тодад вай Инмаредлэсь Кузё-Инмарлэсь тонэ нуллэм быдэс сюрессэ, тонэ зӥбыт-востэм карон понна, тонэ эскерон-чаклан понна, тодон понна: мар тынад сюлмад, Солэсь курон-косонъёссэ быдэсъяса улод-а, уд-а, Со тонэ луоё кыр дуннеетӥ ньыльдон ар ӵоже нуллӥз;3Со тонэ зӥбыт-востэм карылӥз, сютэм возьыса утчаз, маннаен тонэ сюдӥз, со маннаез тон но, атайёсыд но ӧд тодылэ, – Со озьы кариз, тон мед тодод: адями нянен гинэ уг улы, Кузё-Инмарлэн ымысьтыз потӥсь котькудӥныз [кылыныз] со улэ;4тани, ньыльдон ар ӵоже ини дӥськутэд тынад ӧз пӧсьтылы, пыдыд тынад ӧз пыктылы.5Сюлмыныд тод: Инмаред Кузё-Инмар тонэ дышетэ адямилэн пизэ дышетэмез кадь ик.6Инмаредлэсь Кузё-Инмарлэсь курон-косонъёссэ уть, Солэсь кышкаса, Солэн возьматэм сюрес вылтӥз ветлы.
7Инмаред Кузё-Инмар тонэ ӟеч музъеме нуэ ук, кытын шур вуос бызё, нёжалъёсысь, гурезьёсысь ошмесъёс ву потто, тыос пуко,8со музъемын чабей, йыды, виноградпудъёс, смоквапуос, гранатпуос будо, со вӧйпуо, чечыё музъем,9со музъемын тон кӧтыд сюмаса уд улы, номырлы но ёрмыса уд улы; изъёсыз пушкын корт вань, гурезьёсысьтыз тон ыргон поттыны быгатод.10Сиськыса кӧтыд тыриз ке, Инмаредлы Кузё-Инмарлы тау кар тыныд сыӵе умой музъем сётэмез понна.
11Чакласькыса ул, Инмардэ Кузё-Инмарез медад вунэты, Солэсь вань курон-косонъёссэ, законъёссэ, пуктон-косонъёссэ быдэсъяса ул, кудъёссэ тыныд туннэ сӥзьыса сётӥсько.12Сиськыса кӧтыд тыриз ке, умоесь коркаос пуктылыса, [отын] улӥд ке,13сюро таза пудоед, сюро векчи пудоед тынад трос луиз ке, азвесед, зарниед трос луиз ке, котьмаид но тынад трос луиз ке,14чакласькы: сюлмыныд вылтӥяськыны эн кутскы, Египет музъемысь, ляльчиын улон коркась, тонэ поттӥсь Инмардэ Кузё-Инмарез эн вунэты;15Со тонэ быдӟым, шимес, луоё кыр дуннеетӥ, кыйёс, василиск кыйёс, скорпионъёс пӧлтӥ, вутэм, кӧс интыостӥ нуиз; гранит изгурезьысь Со тыныд ву поттӥз;16луоё кыр дуннеын Со тонэ маннаен сюдӥз, кудӥз сярысь [тон но,] атайёсыд но ӧз тодэ, – та тонэ зӥбыт-востэм карон понна, тонэ эскерон-чаклан понна, нош берло тыныд ӟеч карон понна вал;17сюлэм пушкад таӵе малпан медаз кылды: «Ас кужмыным, ас киылэн юнлыкеныз та узырлыкез мон люкай»,18Инмардэ Кузё-Инмарез тодад возь, Со тыныд узырлык люканы кужым сётэ уго, озьы Со та дырозь но атайёсыныды кыл сётыса кылдытэм кусыпсэ уте.
19Нош тон Инмардэ Кузё-Инмарез вунэтӥд но мукет инмаръёслэн сьӧразы мынӥд ке, соослы ужаса-тыршыса, йыбыртъяса улӥд ке, [инмез но музъемез адӟисе ӧтьыса,] тӥ азьын туннэ ялӥсько: тӥ кулоды-быроды;20Инмардылэсь Кузё-Инмарлэсь верам кылъёссэ санэ ӧд ке понэ, соку тӥ быроды озьы ик, кызьы [Инмар] Кузё-Инмар тӥляд азьысьтыды калыкъёсты вие-быдтэ.
Глава 8