Выбрать язык
Книги Ветхого Завета
Книги Нового Завета
с русским текстом1Израиль, кылзы: тон али Иордан тупала выжиськод тынэсьтыд кужмоесьсэгес, трос лыдоесьсэгес калыкъёсты киултыны, бадӟымесь, инмозь ӝутскись борддоръёсын юнматэм городъёсты киултыны,2[быдӟым], трос лыдо, ӝужыт, таза мугоро енак калыклэсь музъемзэ киултыны, соос сярысь тон тодӥськод, кылэмед вань тазьы веранэз: «Енак пиослы пумитъяськыны кин быгатоз?»3Нош али тон тод: тынад Инмаред Кузё-Инмар тынад азьпалтӥд ньылӥсь-сутӥсь тыл кадь мынэ, Со соосты виылоз, тынад азяд погыръялоз но, тон соосты уллялод, ӝог быдтод, кызьы тыныд азьвыл ик вераз Кузё-Инмар.4Инмаред Кузё-Инмар соосты тынад азьысьтыд улляку, сюлмыныд тазьы эн шуы: «Мынам шонер улэме понна Кузё-Инмар монэ та [ӟеч] музъемез киулам басьтыны вайиз», сьӧлыклэсь кышкатэк улэмзы понна уго Кузё-Инмар та калыкъёсты тынад син азьысьтыд улля.5Шонер улэмед понна ӧвӧл, сюлмыныд шонерлыко улэмед понна но ӧвӧл, соослэсь музъемзэс аслыд люкетлы басьтыны мынонэд, та калыкъёслэн сьӧлыклэсь кышкатэк [законлы пумит] улэмзы понна Инмаред Кузё-Инмар соосты тынад азьысьтыд улля, озьы Кузё-Инмар атайёсыдлы Авраамлы, Исааклы, Иаковлы Аслэсьтыз сётэм кылзэ быдэстэ;6соин ик [али] тод тон: Инмаред Кузё-Инмар та ӟеч музъемез тынад киулад шонер улэмед понна уг сёты, уго тон чурыт сюлэмо калык.7Тодад возь, эн вунэты, кӧня тон Инмаредлэсь Кузё-Инмарлэсь луоё кыр дуннеысен вожзэ поттыса улӥд: Египет музъемысь потэмед дырысен та интые вуытозяды тӥ ялан Кузё-Инмарлы пумитъяськиськоды.8Хорив дорысен но Кузё-Инмарлэсь вожзэ поттыса улӥды, Кузё-Инмарлэн тӥледлы вожез потӥз, малпаз вал тӥледыз быдтыны,9тӥледын кусып кылдытон понна Кузё-Инмарлэсь сётэм сӥзён-косонэн гожтэм изпулъёссэ басьтыны гурезь йылэ тубем берам гурезь йылын мон ньыльдон нунал, ньыльдон уй улӥ, нянь ӧй сиы, ву ӧй юы,10Кузё-Инмар мыным кык изпулъёс сётӥз, соос вылын Инмарлэн чиньыеныз гожтэмез вал, люкаськон нуналэ тыл пӧлысен Кузё-Инмарлэн гурезьысен тӥледлы верам вань кылъёсыз соос вылын [гожтэмын вал].
11Ньыльдон нунал но ньыльдон уй ортчем бере Кузё-Инмар кык изпулъёс, сӥзён-косонэн изпулъёс, мыным сётӥз,12соку Кузё-Инмар мыным шуиз: «Султы, ӝоггес татысь кошкы, Египетысь поттэм калыкед сӧриськиз уго; сӥзьыса сётэм сюресэ вылысь соос ӝог палэнскизы; соос ӵыжатыса асьсэлы сульдэр-идол лэсьтӥзы».
13Соку Кузё-Инмар мыным шуиз: [«Мон тыныд одӥг пол но, кык пол но верай:] ”Адӟисько Мон, та калык чурыт сюлэмо шуыса”;14эн куты Монэ, – Мон соосты быдто, музъем вылысь соослэсь нимзэс быдто, нош тон бордысь соослэсь [бадӟымгес,] кужмогес, тросгес лыдо калык потто».
15Мон берытски но гурезь улэ лэзиськи, нош гурезь тылын ӝуаса улӥз; кыказ ик киям сӥзён-косонэн изпулъёс вал;16мон адӟи, кызьы тӥ Инмардылы Кузё-Инмарлы пумит сьӧлыкады, – ӵыжатыса асьтэлы ошпи лэсьтӥды, Кузё-Инмарлэн сӥзьыса тӥледлы сётэм сюрес вылысьтыз ӝог кожиды;17соку мон кыксэ ик изпулъёсты киосысьтым куштӥ но тӥляд син азяды пыргытӥ.18Соку мон тӥляд вань сьӧлыкъёсты понна, [Инмарды] Кузё-Инмар азьын уродзэ лэсьтыса сьӧлыкамды понна, Солэсь вожзэ поттыса улэмды понна [нош ик] Кузё-Инмар азе пыдесъяськи но азьло кадь ик ньыльдон нунал но ньыльдон уй вӧсяськи, нянь ӧй сиы, ву ӧй юы;19уго Кузё-Инмарлэн тӥ вылэ вожпотонэз, йыркурез ӝуатскем понна мон туж кышкаса улӥ, Со тӥледыз быдтыны малпа вал ини. Нош Кузё-Инмар та радаз но мынэсьтым куриськемме санэ понӥз.20Ааронлы но Кузё-Инмарлэн туж вожез потӥз, сое но быдтыны малпаз вал, мон со виын Аарон понна но вӧсяськи.21Нош тӥлесьтыд лэсьтэм сьӧлыктэс – ошпи сульдэрдэс – кутыса тылын сутӥ, пыргытӥ сое, пыры кари сое, сюй пыры кадь луиз но со векчи пырыосты гурезьысь васькись шуре кисьтӥ.
22Тавераысен но, Массаысен но, Киброт-Гаттааваысен но [Инмардылэсь] Кузё-Инмарлэсь вожзэ поттыса улӥды.23Кадес-Варниысь Кузё-Инмар тӥледыз тазьы вераса лэзиз вал: «Мынэлэ, тӥледлы сётоно музъемме киулады басьтэ», нош тӥ Инмардылэн Кузё-Инмарлэн косонэзлы пумит кариськиды, Солы ӧд оске, Солэсь верам кылзэ санэ ӧд понэ.24Тӥледыз тодэм дырысеным тӥ котьку но Кузё-Инмарлы тэрытскисьтэмесь вал.
25Кузё-Инмар азе уськытскыса, ньыльдон нунал но ньыльдон уй ӵоже мон вӧсяськыса улӥ, уго Кузё-Инмар малпа вал тӥледыз быдтыны;26Кузё-Инмар азьын вӧсяськыса, мон шуи: «Кузёе Кузё-Инмаре [инмаръёслэн эксэйзы], эн быдты Аслэсьтыд калыктэ, Аслэсьтыд люкеттэ, сое Тон [кужымедлэн] быдӟымлыкеныз мозмытӥд, Аслад кужмо киыныд, [юн суйбыгытэныд] Египетысь поттӥд;27тодад вай Аслэсьтыд ляльчиостэ Авраамез, Исаакез, Иаковез, [соос азьын Тон Аслад нимыныд кыл сётӥд]; эн учкы та калыклэн тэрытскытэк вог сюлмын улэмез шоры, сьӧлыклэсь кышкатэк улэмез шоры, солэн сьӧлыкъёсыз шоры,28милемыз поттэм музъемын [улӥсьёс] шуоно медаз луэ: ”Кузё-Инмар сӥзем музъемаз соосты пыртыны ӧз быгаты, соосты адӟемпотостэм карыса быдтон вылысь луоё кыр дуннее поттӥз”;29нош соос Тынад калыкед, Тынад люкетэд, соосты Тон быдӟым кужыменыд, юн суйбыгытэныд [Египет музъемысь] поттӥд».
Глава 9