Выбрать язык
Книги Ветхого Завета
Книги Нового Завета
с русским текстом1Яраты аслэсьтыд Инмардэ Кузё-Инмарез, мае Со утьыны косӥз – Солэсь пуктон-косонъёссэ но, Солэсь законъёссэ но, Солэсь курон-косонъёссэ но – вань нуналъёс ӵоже утьыса ул.
2Туннэ тодады возе, – али мон тӥляд пиосыныды уг вераськиськы, кудъёсыз Инмардылэсь Кузё-Инмарлэсь вӧсь каремзэ уг тодо, ӧз но адӟе сое, – тодады возе Солэсь быдӟымлыксэ, Солэсь кужмо кизэ, юн суйбыгытсэ,3Солэсь Египетын, Египетлэн эксэеныз, фараонэн, солэн быдэс музъем вылаз лэсьтэм Солэсь паймымонэсь тодметъёссэ, Солэсь ужъёссэ,4мар Со кариз Египетлэн ожгарчиосыныз, валъёсыныз, ожмаськон уробоосыныз, кызьы Со соосты Горд Кам зарезьлэн вуосаз выйытӥз соослэн тӥ сьӧры уйиськон дыръязы, – [Инмар] Кузё-Инмар соосты туннэ нуналозьлы быдтӥз;5та интые вуытозяды, мар Со луоё кыр дуннеын тӥледлы лэсьтӥз,6мар Со кариз Рувимлэн Елиав пиезлэн Дафан но Авирон пиосыныз, – музъем ымзэ усьтӥз но израиль калык пушкысь соосты, соослэсь семьяоссэс, соослэсь балаганъёссэс, кыӵе гинэ ваньбурзы вал, – ваньзэ ньылӥз;7тӥ уго Кузё-Инмарлэсь лэсьтэм вань быдӟым ужъёссэ ас синмыныды адӟиды.8Соин ик [Солэсь] вань курон-косонъёссэ утелэ-быдэсъялэ, соосты мон [улэп мед кылёды], мед юнмалоды но мыныса, [Иордан сьӧры] потыса, отысь музъемез киулады мед басьтоды шуыса, туннэ тӥледлы ивортӥсько;9Кузё-Инмарлэн тӥляд атайёстылы, соослэн кидыссылы-выжызылы сётыны сӥзем йӧлын чечыен бызись музъем вылэ пырыса, тӥ кема аръёс-вапумъёс отын мед улоды.
10Тынад киултыны пыроно музъемед Египет музъемлы уг укша, кытысь тӥ потӥды, отын тон кидыстэ кизиськод но, бакчаез кадь, пыдъёсыд вылэ пыкиськыса, [со вылэ] ву киськаськод вал;11али киултыса улыны интыяськоно музъемды нёжало, гурезё, со инмысь виясь вуэн мускыта, –12со музъем сярысь Инмаред Кузё-Инмар сюлмаське: Инмаред Кузё-Инмар со шоры арлэн кутсконысеныз арлэн пумозяз, синзэ кыньылытэк, учкыса улэ.13Туннэ верам курон-косонъёсме кабыл басьтыса улӥды ке, Инмардэс Кузё-Инмарез яратӥды ке, вань сюлмыныды, вань лулыныды Солы ужаса-тыршыса улӥды ке,14соку Мон тӥляд музъемдылы вазьзэ но, берзэ но зорез ас дыраз сёто, нош тон ю-нянен, винаен, вӧйын узыр луод;15пудодэ сюдыны бусыяд турын сёто, – кӧттыро улоды, сиёнлы уд ёрме.
16Утиське-чаклаське: сюлэмды медаз сӧриськы но кырыже медад кошке, мурт инмаръёслы ужаны-тыршыны, йыбыртъяны медад кутске;17соку уго Кузё-Инмарлэн вожпотонэз тӥ вылэ ӝуатскоз но Со инэз ворсалоз: куазь уз ни зоры, музъем емышсэ уз ни будэты, соин ик Кузё-Инмарлэн тӥледлы сётэм ӟеч музъем вылысьтыз тӥ ӝоген кулыса быроды.
18Озьыен, Мынэсьтым та верам кылъёсме сюлмады понэ, лулады пыртэ, пусэз-тодметэз кадь соосты ки вылады думе, син йылады йыркерттэт интыын соос мед луозы;19та кылъёсты нылпиостылы вералэ, нылпиостэс дышетэ, – коркад пукыкуд но, сюрес кузя мыныкуд но, изьыны выдыкуд но, изьыса султыкуд но;20со кылъёсты коркаедлэн ӧс янакъёсыз борды, ӟезьыосыд борды гожъя,21музъем йылын кӧня нунал инбам возиськоз, Кузё-Инмарлэн атайёстылы сётыны сӥзем музъем вылаз сыӵе ик трос тӥляд улоно нуналъёсты, нылпиостылэн улоно нуналъёссы мед луозы.
22Уго вань та курон-косонъёсты быдэсъяса улӥды ке, кудъёссэ быдэсъяны курисько, Инмардэс Кузё-Инмарез яратӥды ке, Солэн вань сюресъёсыз кузя ветлӥды ке, Со борды лякиськыса улӥды ке,23соку Кузё-Инмар вань та калыкъёсты тӥляд азьысьтыды уллялоз, соку тӥ асьтэлэсь кужмоесьгес, трос лыдоесьгес калыкъёсты киулады басьтоды.24Кыӵе гинэ интые пыдтышкыныды уд лёгиське, со инты тӥляд луоз: луоё кыр дуннеысен, Ливан дорысен, шур дурысен, Ефрат шур дурысен, шундыпуксёнпал зарезь дорозь ик кыстӥськозы улоно интыостылэн йыранъёссы-межаоссы.25Нокин но тӥледлы пумит сылыны уз быгаты: Инмарды Кузё-Инмар тӥляд азьпалтӥды, кытчы гинэ тӥ уд лёгиське, кызьы Со тӥледлы вераз ни, кышкан, куалекъян лэзёз.
26Тани, мон туннэ тӥледлы бакель карон яке карган ӵектӥсько:27туннэ тӥледлы мынэсьтым ивортэм Инмардылэсь Кузё-Инмарлэсь курон-косонъёссэ кабыл басьтӥды ке, бакель карон басьтоды,28нош Инмардылэсь Кузё-Инмарлэсь курон-косонъёссэ кабыл ӧд ке басьтэ, туннэ тӥледлы быдэстыны возьматэм сюрес вылысь кожиды ке, тӥледлы тодмотэм, мурт инмаръёс сьӧры мынӥды ке, карган басьтоды.
29Киултыны мыноно музъемад Инмаред Кузё-Инмар тонэ пыртӥз ке, соку тон Гаризим гурезь йылысен бакель карон кылъёсты вера, нош Гевал гурезьысен карган кылъёсты вера;30тани со гурезьёс Иордан шур сьӧрын, шундыпуксён пала мынон сюрес дурын, Море тыпы сурдлы матысь интыын, Галгаллы ваче беринын, ӵошкыт интыосын улӥсь хананейёслэн музъем вылазы.
31Уго тӥ Иордан шур сьӧры выжиськоды Инмардылэсь Кузё-Инмарлэсь тӥледлы [пумтэм вапумъёс ӵожелы люкетлы] сётоно музъемзэ киултыны, сое тӥ киулады басьтоды но отын улоды.32Соин ик тӥ [Солэсь] вань пуктон-косонъёссэ, законъёссэ, кудъёссэ мон туннэ тӥледлы кабыл басьтыны ӵектӥсько, быдэсъяны тырше.
Глава 11