Выбрать язык
Книги Ветхого Завета
Книги Нового Завета
с русским текстом1Тани Атайёсыдлэн Инмарзылэн Кузё-Инмарлэн тынад киулад сётэм музъем вылаз вань улоно нуналъёсады быдэсъяса улыны сётэм пуктон-косонъёс но законъёс.
2Киулады басьтоно музъем вылысь ӝужытэсь гурезьёсы, мувыр йылъёсы, вань ваё-куаро писпу улъёсы мукет калыкъёслэсь асьсэ инмаръёссылы лэсьтэм йыбыртъян интыоссэс – ваньзэ, одӥгтэм быдтэ;3курбон сётон интыоссэс куашкатэ, юбооссэс пыргытэ, вӧсяськон сурдъёссэс тылын сутэ, инмаръёссылэсь сульдэръёссэс сузмытэ, со интыысь соослэсь нимзэс ик быдтэ.4Сыӵе макеосты, Инмардылы Кузё-Инмарлы сӥзьыса, ноку но эн лэсьтэ;5нош вань выжыостылэн музъем вылазы Инмардылэн Кузё-Инмарлэн нимыз мед улоз шуыса, Солэн быръем интыяз вӧсяське, со интые ветлэ,6отчы тӥ тылын сутӥськись курбонъёстэс, салам-кузьымъёстэс, дасэтӥ люкет сётондэс вае, вылэ ӝутон курбонъёстэс, сӥзиськемъёстэс, ас мылкыдыныды курбонъёс сётондэс, [тупаса улонлы сӥзем курбонъёстэс] вае, нырысь вордскем ошпиостэс, такапиостэс вае;7отын Инмарды Кузё-Инмар азьын соосты сие, шулдыръяське вань ӵыжы-выжыосыныды ӵош, шумпотэ асьтэ киосыныды быдэстэм ужъёсты понна, кудъёссэ бакель кариз Инмаред Кузё-Инмар.
8Кызьы али татын асьмеос лэсьтӥськомы, отын тӥ озьы лэсьтыны кулэ ӧвӧл; татын уго котькудӥз лэсьтэ, кызьы солы аслыз шонер кадь потэ,9уго тӥ али каньылэн улон интые ӧд на пыре, Инмаредлэн Кузё-Инмарлэн тыныд сётоно люкет музъемаз ӧд на пыре.10Нош тӥ Иордан шур сьӧры выжиды но Инмардылэн Кузё-Инмарлэн тӥледлы сётоно люкет музъемаз улыны интыяськиды ке, Со тӥледыз котырады улӥсь вань тушмонъёстылэсь мозмытэм бере каньылэн, кышкатэк улыны кутскиды ке,11соку Инмардылэн Кузё-Инмарлэн Аслаз нимызлы улыны быръем интыяз вае ваньзэ, мае [али] мон тӥледлы вайыны косо: тылын сутӥськись курбонъёстэс, салам-кузьымъёстэс, сётоно дасэтӥ люкеттэс, вылэ ӝутон курбонъёстэс, вань сӥзиськемъёстэс, мае бырйыса [Инмардылы] Кузё-Инмарлы вайыны кыл сётӥды;12Инмарды Кузё-Инмар азьын шулдыръяське, – асьтэос но, пиосты но, нылъёсты но, ляльчи пиосты, ляльчи нылъёсты но, тӥ пӧлын улӥсь левит но, уго солы тӥ пӧлы люкет но, люкет музъем но сётэмын ӧвӧл.
13Утиськы-чакласькы: кытчы сюрем, отын тылын сутӥськись курбонъёстэ эн сётъя;14[Инмаредлэн] Кузё-Инмарлэн быръем интыяз гинэ, одӥгезлэн выжыедлэн музъем вылаз, тылын сутӥськись курбонъёстэ сёт, мар [туннэ] тыныд верало, сое ваньзэ лэсьты.
15Нош тон куке сюлмыд куриз, соку ик Инмаредлэн Кузё-Инмарлэн бакель каремезъя пудодэ вандыны но Солэсь тыныд сётэм сӥльзэ сиыны быгатод вань улон интыосад: чылкыт муртъёс но, кырсь луэм муртъёс но кыркечлэсь яке пужейлэсь сӥльзэ кадь ик тае сиыны быгатозы;16только вирзэ эн сие, вуэз кадь сое музъем вылэ кисьтэ.17Нош ю-нянед пӧлысь, винаед пӧлысь, вӧед пӧлысь сётоно дасэтӥ люкеттэ тыныд улоно интыяд уг яра сиыны, нырысь вордскем ошпиостэ, такапиостэ, вань сӥзиськемъёстэ, мае вайыны кыл сётӥд, мылкыдыныд ваем салам-кузьымъёстэ, вылэ ӝутон курбонъёстэ но тыныд улоно интыяд уг яра сиыны;18тон таосты Инмаредлэн Кузё-Инмарлэн быръем интыяз, Солэн азяз [гинэ] си-ю, озьы мед карозы тонэн ӵош пиед но, нылыд но, ляльчи пиед, ляльчи нылыд но, тон пӧлын улӥсь левит но, [лыктэм мурт но]; Инмаред Кузё-Инмар азьын шумпот-шулдыръяськы ваньмыз понна, мар лэсьтэмын тынад киыныд.19Ас музъемад [улыкуд], ноку но эн вунэты левитэз.
20Инмаред Кузё-Инмар, кызьы Со тыныд кыл сётыса вераз, улоно музъемдэ паськытатӥз ке, тон шуид ке: «Сӥль сиё», уго сюлмыд сӥль сиыны куроз, – соку сюлмыд куремъя сӥль си.21Инмаредлэн Кузё-Инмарлэн Аслаз нимызлы улыны быръем интыез тынад улон интыедлы кыдёкын ке, соку [Инмаредлэн] Кузё-Инмарлэн тыныд сётэм сюро таза, сюро векчи пудоез пӧлысь кудзэ ке ванды, кызьы мон тыныд косӥ, сое улон интыяд си, кызьы тынад лулыд-сюлмыд куре;22но тон соосты си, кызьы кыркеч, пужей сӥлез сиё; кырсь мурт чылкыт мурт кадь ик [тон дорын] тае сиыны быгатэ;23но юн чакла: вирзэс эн си, малы ке шуоно вир – со лул, лулэз сӥлен валче эн сиы;24вирез эн си, вуэз кадь сое сюй вылэ кисьты;25эн си сое, тыныд аслыд но, тон бере улӥсь нылпиосыдлы но [пумтэм вапумъёс ӵоже] ӟеч мед луоз, [Инмаредлэн] Кузё-Инмарлэн азяз шонерлыко, [ӟечлыко] ужъёс лэсьтыса улӥд ке.
26Но святыня шуыса нимаськись курбонъёстэ, сӥзиськемъёстэ но [Инмаредлэн] Кузё-Инмарлэн быръем интыяз вай, [Солэн нимызлы вазиськон интые];27тылын сутӥськись курбонъёстэ, сӥльзэ но, вирзэ но, Инмаредлы Кузё-Инмарлы курбон сётон ӝӧк вылын сут; нош мукет курбон пудоедлэн вирыз Инмаредлы Кузё-Инмарлы курбон сётон ӝӧклэн вӧзаз кисьтэмын мед луоз, нош солэсь сӥльзэ си.28Кылзы, вань та верам кылъёсме быдэсъя, тыныд аслыд но, тон бере улоно нылпиосыдлы но пумтэм вапумъёс ӵоже ӟеч мед луоз, – Инмаред Кузё-Инмар азьын ярамонэсь, ӟечлыкоесь ужъёс лэсьтыса улӥд ке.
29Инмаред Кузё-Инмар тынад азьысьтыд калыкъёсты быдтӥз ке, кудъёсыз доры тон мынӥськод соосты аслад киулад басьтон понна, тон соосты киултод но соослэн музъемазы улыны интыяськод;30но соку утиськы: калтонэ медад сюры, соосты азьысьтыд быдтэм бере, соослэсь адӟем карыса, соослэсь инмаръёссэс эн утча, тазьы эн шуы: «Кызьы со калыкъёс инмаръёссылы ужаса-тыршыса улӥзы, озьы ик мон но лэсьто»;31Инмаредлы Кузё-Инмарлы тазьы эн лэсьты, уго мае синазькыль каре Кузё-Инмар, марлэсь Со юрдэ, со ужъёсты та калыкъёс инмаръёссылы лэсьто: соос асьсэлэсь пиоссэс но, нылъёссэс но, тылын сутыса, инмаръёссылы курбон сёто.
32Мае быдэсъяса улыны сӥзисько, тырше соосты быдэсъяны; со борды номыр но эн ватсалэ, со бордысь номырзэ но эн куштэ.
Глава 12